മുവാറ്റുപുഴ: അനധികൃത മണ്ണെടുപ്പ് ചോദ്യം ചെയ്തതിന് ദളിത് പെണ്കുട്ടിയെ മര്ദ്ദിച്ച കേസില് പ്രതി അന്സാറിന്റെ മുന്കൂര് ജാമ്യം എറണാകുളം ജില്ലാ പ്രിന്സിപ്പള് സെഷന്സ് കോടതി തള്ളി. പ്രതിക്ക് ജാമ്യം നല്കുന്നത് സമൂഹത്തിന് തെറ്റായ സന്ദേശം നല്കുമെന്ന് കോടതി വിലയിരുത്തി. പ്രതി ചെയ്ത കുറ്റകൃത്യത്തിന്റെ ഗൗരവം കൂടി പരിഗണിച്ചാണ് കോടതി വിധി.
പെണ്കുട്ടിക്ക് മുഴുവന് നിയമ സഹായവും യൂത്ത് കോണ്ഗ്രസ് നിയോജക മണ്ഡലം കമ്മിറ്റിയുടെ നേതൃത്വത്തില് ലഭ്യമാക്കിയാണ് നിയമ പോരാട്ടം നടത്തിയത്. പെണ്കുട്ടിക്ക് വേണ്ടി ഹൈക്കോടതി അഭിഭാഷകനായ പി എ മുഹമ്മദ് അസ്ലം ഹാജരായി. മുന്കൂര് ജാമ്യ ഹര്ജി ജില്ലാ കോടതി തള്ളിയ സാഹചര്യത്തില് പ്രതിയെ ഉടന് അറസ്റ്റ് ചെയ്യണമെന്ന് യൂത്ത് കോണ്ഗ്രസ് നിയോജക മണ്ഡലം പ്രസിഡന്റ് സമീര് കോണിക്കന് ആവശ്യപ്പെട്ടു,