മൂവാറ്റുപുഴ: മൂന്നാര് മുതല് കൊച്ചി വരെ ദേശീയ പാതയില് വികസന പ്രവര്ത്തനങ്ങള് ആരംഭിക്കുന്നതിനായുള്ള സജ്ജീകരണങ്ങള് ആരംഭിച്ചുവെന്ന് ഡീന് കുര്യാക്കോസ് എം.പി .വ്യക്തമാക്കി. 1208 കോടി രൂപയുടെ വികസന പദ്ധതിയില് നേര്യമംഗലത്ത് പുതിയ പാലത്തിന്റെ സ്കെച്ച് പൂര്ത്തിയായി. ലാന്റ് അക്വിസിഷന് നടപടികള് ആരംഭിച്ചു. ആയതിനായി 3എ നോട്ടിഫിക്കേഷന് വിജ്ഞാപനം പുറപ്പെടുവിച്ചു. പെരിയാറിന്റെ ഇക്കരെ കവളങ്ങാട് വില്ലേജില് സ്വകാര്യ വ്യക്തികളുടെ സ്ഥലവും , അക്കരെ കുട്ടമ്പുഴ പഞ്ചായത്തില് ഫോറസ്റ്റ് ഭൂമിയുമാണ് ഏറ്റെടുക്കേണ്ടതുളളത്.
കൂടാതെ പദ്ധതിക്കായി നിലവിലുള്ള റോഡിന്റെ യഥാര്ത്ഥ വീതി എത്രയെന്ന് നിജപ്പെടുത്തി അതിര്ത്തി സ്ഥാപിക്കേണ്ടതായിട്ടുണ്ട്. ഇതുസംബന്ധിച്ച് റവന്യു റെക്കോര്ഡ്സ് പരിശോധിക്കുന്നതിന് വേണ്ടിയും തീരുമാനിച്ചു. മൂന്നു തഹസില്ദാര്മാരെ അതിനായി ചുമതലപ്പെടുത്തിയിട്ടുണ്ട്. വിശദമായ റവന്യൂ രേഖകള് ലഭ്യമാക്കി റോഡിന്റെ വീതി തിട്ടപ്പെടുത്തിയതിന് ശേഷം നിര്മാണപ്രവര്ത്തനങ്ങള് ആരംഭിക്കുന്നതിന് തീരുമാനമെടുത്തു. വരുന്ന ആഴ്ചയില് റിവ്യു മീറ്റിംഗ് വിളിച്ചു ചേര്ക്കുന്നതിനും ധാരണയായി. അതോടൊപ്പം മൂവാറ്റുപുഴ, കോതമംഗലം രണ്ട് ബൈപ്പാസുകളുടെയും ഡി പി ആര് വര്ക്ക് പുരോഗമിക്കുന്നതായും താമസിക്കാതെ പൂര്ത്തികരിക്കുമെന്നും തുടര്ന്ന് ഭൂമി ഏറ്റെടുക്കല് നടപടി ആരംഭിക്കാമെന്നും ദേശിയപാതാ വിഭാഗം അറിയിച്ചു.
ഡീന് കുര്യാക്കോസ് എം.പി അധ്യക്ഷത വഹിച്ച യോഗത്തില് ജില്ലാ കളക്ടര്ക്ക് വേണ്ടി മൂവാറ്റുപുഴ ആര്.ഡി.ഒ അനി പി.എന് , മുനിസിപ്പല് ചെയര്മാന്മാരായ പിപി എല്ദോസ് (മൂവാറ്റുപുഴ) ടോമി എബ്രാഹം (കോതമംഗലം),ഗ്രാമ പഞ്ചായത്ത് പ്രസിഡന്റുമാര്, എന്എച്ച്എഐ പ്രോജക്ട് ഡയറക്ടര് പി. പ്രദീപ് , ഹൈവേ എഞ്ചിനീയറിംങ് കണ്സള്ട്ടന്സി പ്രതിനിധികളായ ആര്. രാജേഷ് കുമാര്, എ. വിശ്വനാഥ റാവു, എ.ആര്. ആനന്ത റെഡ്ഡി, മറ്റ് വിവിധ വകുപ്പുമേധാവികള് എന്നിവര് പങ്കെടുത്തു.