മൂവാറ്റുപുഴയില്‍ മുസ്ലീംലീഗ് കോണ്‍ഗ്രസ് ബന്ധത്തിലുണ്ടായ പടലപിണക്കങ്ങള്‍ പറഞ്ഞുതീര്‍ക്കാനായി വിളിച്ചുചേര്‍ത്ത ലീഗ് യോഗത്തിലും നേതാക്കള്‍ക്ക് തിരിച്ചടി. പായിപ്രയില്‍ തല്‍ക്കാലം വിട്ടുവീഴ്ച വേണ്ടെന്നും കോണ്‍ഗ്രസുമായി യോജിക്കേണ്ട സാഹചര്യം നിലവിലില്ലന്നും യോഗത്തിനെത്തിയവര്‍ തുറന്നടിച്ചതോടെ നേതാക്കള്‍ വെട്ടിലായി. പ്രവര്‍ത്തകരുടെ നിലപാടിനൊപ്പമാണ് തങ്ങളെന്ന് യോഗത്തില്‍ പങ്കെടുത്ത സംസ്ഥാന ജില്ലാ നേതാക്കളും പറഞ്ഞതോടെ സൂത്രത്തില്‍ പ്രശ്‌നപരിഹാരം നടത്താനെത്തിയ ചില നേതാക്കളും പഞ്ചായത്ത് അംഗവും വെട്ടിലായി.
വൈസ് പ്രസിഡന്റിനെതിരെ അവിശ്വാസം വ്യാഴാഴ്ച ചര്‍ച്ചക്കെടുക്കാനിരിക്കെ കോണ്‍ഗ്രസ് നേതാക്കള്‍ നടത്തുന്ന ചര്‍ച്ചകള്‍ പ്രസിഡന്റു തെരഞ്ഞടുപ്പിന് മുന്നേ നടത്താത്തതും ലീഗിന് പ്രസിഡന്റ് പദം നഷ്ടമാക്കിയതും ചര്‍ച്ചയില്‍ പങ്കെടുത്ത് സംസാരിച്ചവര്‍ ചൂണ്ടിക്കാട്ടി. പഞ്ചായത്ത് പ്രസിഡന്റ് തിരഞ്ഞെടുപ്പിനെ ചൊല്ലി യുഡിഎഫില്‍ ഉണ്ടായ പൊട്ടിത്തെറി പരിഹരിക്കാന്‍ നേതാക്കള്‍ നടത്തിയ ശ്രമങ്ങള്‍ ഇതോടെ പരാജയപ്പെട്ടു. മുന്നണി നേതാക്കളുടെ അഭ്യര്‍ത്ഥന മാനിച്ച് മുസ്ലിം ലീഗ് നേതൃത്വം വിളിച്ചു ചേര്‍ത്ത യോഗത്തിലും നേതാക്കള്‍ കൂട്ടത്തോടെ മുന്നണി ബന്ധം വേണ്ട എന്ന് അഭിപ്രായം പറഞ്ഞതോടെ വൈസ് പ്രസിഡണ്ടിനെതിരേയുള്ള അവിശ്വാസവും പ്രതിസന്ധിയിലാവും.
പ്രസിഡണ്ട് സ്ഥാനത്തേക്ക് മത്സരിച്ച് ലീഗ് നേതാവ് എം എസ് അലി പരാജയപ്പെട്ടതിനെ ചൊല്ലി തുടങ്ങിയ തര്‍ക്കമാണ് കോണ്‍ഗ്രസ് ലീഗ് ബന്ധം നഷ്ടമാക്കിയത്. കെപിസിസി നടത്തിയ യാത്രയിലും ലീഗ് നേതൃത്വം വിട്ടുനിന്നു. മുസ്ലിം ലീഗിന് പ്രസിഡന്റ് പദം ജില്ലയില്‍ ലഭിച്ച ഏകപഞ്ചായത്താണ് കോണ്‍ഗ്രസ് നേതാവായിരുന്ന പി.എം അസീസിന്റെ മുന്നണിമാറ്റവും മറ്റൊരു കോണ്‍ഗ്രസ് അംഗം നിസാമൈതീന്റെ വോട്ട് അസാധുവായതിലും തട്ടി നഷ്ടമായത്.
പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പിന് മുന്നോടിയായി പ്രതിസന്ധിയറിഞ്ഞ ലീഗ് നേതൃത്വം കോണ്‍ഗ്രസ് നേതൃത്വത്തെ പായിപ്രയിലെ അപകടസാധ്യത പലവട്ടം ധരിപ്പിച്ചിരുന്നു. എന്നാല്‍ ഇവിടെ ഒന്നും സംഭവിക്കില്ല എന്ന സ്ഥിരം പല്ലവിയാണ് ലീഗ് നേതാക്കളോട് കോണ്‍ഗ്രസ് പറഞ്ഞുവെച്ചത്. പഞ്ചായത്ത് പ്രസിഡന്റ് തിരഞ്ഞെടുപ്പില്‍ ആവശ്യമായ ചര്‍ച്ചയ്‌ക്കൊ മുന്നൊരുക്കങ്ങള്‍ക്കോ തയ്യാറാകാതിരുന്ന നേതാക്കള്‍ ഇപ്പോള്‍ ഒന്നാകാന്‍ പറയുന്നതിനേയും നേതാക്കള്‍ വിമര്‍ശിച്ചു.
നിലവിലെ ഭരണപക്ഷമായ എല്‍ഡിഎഫ് നേതൃത്വം വൈസ് പ്രസിഡനെതിരെ അവിശ്വാസ നോട്ടീസ് നല്‍കിയതോടെ വലിയ ചര്‍ച്ചകള്‍ക്ക് കോണ്‍ഗ്രസ് നേതൃത്വം താഴെത്തട്ടിലേക്ക് എത്തിയതോടെയാണ് മുന്‍പത്തെ സംഭവം ചൂണ്ടിക്കാട്ടി ലീഗ് അണികളും നേതാക്കളും ഒരുപോലെ എതിര്‍പ്പുമായി രംഗത്ത് വന്നത്. പ്രശ്‌നപരിഹാരത്തിനായി ചൊവ്വാഴ്ച വൈകിട്ട് ഏഴിന് മൂവാറ്റുപുഴയിലെ ലീഗ് നിയോജക മണ്ഡലം കമ്മിറ്റി ഓഫീസില്‍ വിളിച്ചുചേര്‍ത്ത യോഗത്തില്‍ വലിയ വാദപ്രതിവാദങ്ങള്‍ നടന്നു. യൂത്ത് ലീഗ് നേതാക്കള്‍ കൂട്ടത്തോടെ നേതൃത്വത്തെ അക്രമിച്ചു. പഞ്ചായത്ത് ഭരണം നഷ്്ടപ്പെടുത്തിയപ്പോഴില്ലാത്ത സങ്കടം ഇപ്പോള്‍ വേണ്ടെന്നും അവര്‍ പറഞ്ഞു.
ചര്‍ച്ചയില്‍ പങ്കെടുത്ത ഭൂരിപക്ഷം നേതാക്കളും സംസ്ഥാന ജില്ലാ നേതൃത്വവും നേതാക്കളും തല്‍ക്കാലം ഇതിങ്ങനെ തന്നെ പോകട്ടെ എന്ന നിലപാട് എടുക്കുകയായിരുന്നു. മുന്നണി ബന്ധം മൂവാറ്റുപുഴയില്‍ ഇല്ല എന്ന മുന്‍ നിലപാടിന് മാറ്റം വരുത്തേണ്ട സാഹചര്യം നിലവിലില്ലെന്നാണ് മുതിര്‍ന്ന നേതാവ് യോഗത്തില്‍ പറഞ്ഞത്. കോണ്‍ഗ്രസ് നേതാവ് പി എം അസീസ് പഞ്ചായത്ത് പ്രസിഡന്റ് ആവുകയും ചെയ്തു. ഇവിടെ വോട്ട് അസാധുവായ വനിതാ അംഗത്തിനെതിരെ നടപടി എടുക്കാതിരുന്നതും ലീഗ് നേതൃത്വം ചൂണ്ടിക്കാട്ടുന്നു. അതേസമയം പ്രശ്‌നപരിഹാരത്തിന് ചിലകേന്ദ്രങ്ങള്‍ ശ്രമം തുടരുമ്പോഴും അണികളുടെ പ്രതിഷേധം പ്രതിസന്ധിക്കാ കാരണമാവുകയാണ്.
