മൂവാറ്റുപുഴ: മൂവാറ്റുപുഴയ്ക്കു സമീപം പായിപ്ര പഞ്ചായത്ത് മൂന്നാം വാര്ഡില് പോയാലിമലയുടെ താഴ്ഭാഗത്ത് പൈ്ളവുഡ് കമ്പനി നിര്മാണത്തിനു വേണ്ടി പണിതുയര്ത്തിയ കൂറ്റന് മതില് പൊളിഞ്ഞു വീണു. ബുധനാഴ്ച രാവിലെ ഏഴ് മണിയോടെയാണ് സംഭവം. പോയാലി മല – മില്ലും പടി റോഡിലേക്കാണ് 200 മീറ്ററിലേറെ നീളത്തിലുള്ള സംരക്ഷണ ഭിത്തി തകര്ന്നു വീണത്. റോഡ് പൂര്ണമായും മണ്ണും കല്ലും നിറഞ്ഞ് ഗതാഗതം മുടങ്ങി. ആളപായമില്ല. സ്കൂള് ബസ് ഉള്പ്പെടെ പോകുന്ന റോഡിലായിരുന്നു മതിലിടിഞ്ഞത്.
ടൂറിസം പ്രോജക്ടിനായി പദ്ധതി തയ്യാറാക്കുന്ന പോയാലി മലയുടെ ഭാഗത്ത് അപകടകരമായ രീതിയില് മണ്ണിടിച്ച് പ്ലൈവുഡ് കമ്പനി നിര്മിക്കുന്നതിനെതിരെ നാട്ടുകാരുടെ പരാതി നിലനില്ക്കെയാണ് ദുരന്തം സംഭവിച്ചത്. പോയാലി മലയിടിച്ചില് നാളെ രാവിലെ 10 മണിക്ക് RDO യുടെ ചേംബറില് യോഗം ചേരും.
മലഞ്ചെരുവില് പ്ലൈവുഡ് കമ്പനി നിര്മ്മിക്കാന് പഞ്ചായത്ത് അനുമതി നല്കിയിരുന്നു. തുടര്ന്ന് ഈ നിര്മാണ അനുമതിയുടെ മറവില് വന് തോതില് മണ്ണെടുത്തു. മല മണ്ണിടിച്ച് നിരത്തി നിര്മിച്ച സംരക്ഷണ ഭിത്തി കനത്ത മഴയില് മലയില് നിന്നു വെള്ളവും മണ്ണും കുത്തിയൊഴികിയെത്തിയതാവാം തകരാനിടയായതെന്നാണ് പ്രാധമിക നിഗമനം.
അതേസമയം കെട്ടിട നിര്മാണത്തിനു നിയമാനുസൃതമായ അനുമതി നല്കുക മാത്രമാണ് പഞ്ചായത്ത് ഭരണ സമിതി ചെയ്തതെന്നും അനധികൃതമായി മണ്ണെടുത്ത് നര്മാണം ആരംഭിച്ചതില് പഞ്ചായത്തിനു ഉത്തരവാദിത്വമില്ലെന്നും ഇത്തരം കാര്യങ്ങള് മൈനിങ് ആന്റ് ജിയോളജി വകുപ്പും മറ്റു അധികൃതരുമാണെന്ന് പഞ്ചായത്ത് പ്രസിഡന്റ് മാതൃൂസ് വര്ക്കി പറഞ്ഞു. നിര്മാണം തടയുന്നതിന് ഉടന് സ്റ്റോപ്പ് മെമ്മോ നല്കുമെന്നും മാതൃൂസ് വര്ക്കി പറഞ്ഞു.
പായിപ്ര പഞ്ചായത്തില് മണ്ണ് മാഫിയയുടെ പുതിയ തന്ത്രമാണ് അരങ്ങേറുന്നത്. ബില്ഡിംഗ് പെര്മിറ്റിന്റെ മറവില് 40 ഓളം സ്ഥലത്ത് മണ്ണ് മാഫിയ അനധികൃതമായി മണ്ണ് എടുക്കുകയാണ്. നിരവധി പരാതികള് ഉയര്ന്നെങ്കിലും അവ കാറ്റില് പറത്തിയാണ് മണ്ണ് മാഫിയയുടെ പ്രവര്ത്തനം. പെര്മിറ്റ് എടുത്ത് നല്കുന്നതിനായി മാഫിയ സംഘം പ്രവര്ത്തിക്കുന്നുണ്ടെന്നും ആക്ഷേപമുയരുന്നുണ്ട്.
അപകട വിവരമറിഞ്ഞ് മൂവാറ്റുപുഴ തഹസില്ദാര് കെ.എസ്. സതീഷ് എല്.ആര് തഹസില്ദാര് അസ്മാബീവി പി.വി, ഡെപ്പ്യൂട്ടി തഹസില്ദാര് ബി. മധു, വില്ലേജ് ആഫീസര് വിനോദ് പി.എച്ച്, പി.എച്ച് അഷഫറഫ്ഖാന് എന്നിവര് സ്ഥലത്തെത്തി പരിശോധന നടത്തി. സംഭവം സംബന്ധിച്ച് ഇന്നു തന്നെ കളക്ടര്ക്ക് റിപ്പോര്ട്ട് കൊടുക്കുമെന്ന് തഹസില്ദാര് കെ.എസ്. സതീഷ് പറഞ്ഞു. മണ്ണെടുപ്പിനു അനുമതി നല്കിയ മൈനിങ് ആന്റ് ജിയോളജി വകുപ്പാണെന്നും അവരാണ് ഇക്കാര്യം പരിശോധിക്കേണ്ടതെന്നും തഹസില്ദാര് വിശദീകരിച്ചു.
പഞ്ചായത്ത് പ്രസിഡന്റ് മാതൃൂസ് വര്ക്കി, പഞ്ചായത്ത് അംഗങ്ങളായ റജീന ഷിഹാജ്, സക്കീര് ഹുസൈന്, മുഹമ്മദ് ഷാഫി, വിവിധ രാഷ്ട്രീയ പാര്ട്ടി നേതാക്കളായ പി.ആര്. സുകുമാരന്, എം,പി, ഇബ്രാഹിം തുടങ്ങിയവരും സ്ഥലത്ത് എത്തി.
പഞ്ചായത്ത് ഭരണ സമിതി ഉള്പ്പെടെ അറിഞ്ഞു കൊണ്ടു അനധികൃത നിര്മാണ് നടന്നതെന്നും റവന്യൂ വകുപ്പ് ഉള്പ്പെടെ നിരവധി പരാതി നല്കിയെങ്കിലും അധികൃതര് തിരിഞ്ഞു നോക്കിയില്ലെന്നാണ് നാട്ടുകാരുടെ ആക്ഷേപം.