മൂവാറ്റുപുഴ: കേന്ദ്ര സര്ക്കാരിന്റെ നിയന്ത്രണത്തിലുള്ള നാഷണല് ഹെല്ത്ത് മിഷന് മൂവാറ്റുപുഴ നഗരസഭക്ക് അനുവദിച്ച കുര്യന്മല ആരോഗ്യ ഉപകേന്ദ്ര (ഹെല്ത്ത് ആന്റ് വെല്നസ് സെന്റര്) ത്തിന്റെ ഉദ്ഘാടനം ഇന്ന് നടക്കും. വൈകിട്ട് 4 ന് ഡീന് കുര്യാക്കോസ് എം.പി. ഉദ്ഘാടനം നിര്വഹിക്കും. നഗരസഭ ചെയര്മാന് പി.പി. എല്ദോസ് അധ്യക്ഷത വഹിക്കും. ഡോ. മാത്യു കുഴല്നാടന് എം.എല്.എ. മുഖ്യ പ്രഭാഷണം നടത്തും. നഗര സഭ വൈസ് ചെയര്പഴ്സണ് സിനി ബിജു, ഉപ സമിതി അധ്യക്ഷന്മാരായ പി.എ. അബ്ദുള് സലാം, അബ്ദുള് ഖാദര് അജിമോന്, പ്രമീള ഗിരീഷ് കുമാര്, നിസ അഷറഫ്, ജോസ് കുര്യാക്കോസ്, പ്രതിപക്ഷ നേതാവ് ആര്. രാകേഷ്, മുനിസിപ്പല് സെക്രട്ടറി എം. മുഹമ്മദ് ആരിഫ് ഖാന്, കൗണ്സിലര്മാര് തുടങ്ങിയവര് പ്രസംഗിക്കും.
കുര്യന്മലയിലും രണ്ടാര്കരയിലുമാണ് പുതിയ ആരോഗ്യ കേന്ദ്രങ്ങള് അനുവദിച്ചിരുന്നത്. രണ്ടാര്കര സെന്ററും ഉടന് പ്രവര്ത്തനം ആരംഭിക്കും. നഗരസഭ ചെയര്മാന് നേരത്തെ ബന്ധപ്പെട്ടവര്ക്ക് നിവേദനം സമര്പ്പിച്ചിരുന്നു. ഇതേ തുടര്ന്നാണ് ആരോഗ്യ കേന്ദ്രങ്ങള് അനുവദിച്ച് ഉത്തരവായത്. ജനസംഖ്യ, ചികിത്സ സൗകര്യങ്ങളുടെ അപര്യാപ്തത എന്നിവ കണക്കിലെടുത്താണ് കുര്യന്മലയിലും രണ്ടാര്കരയിലും സെന്റര് തുറക്കാന് തീരുമാനിച്ചത്. ഇരു കേന്ദ്രങ്ങളുടെയും പ്രവര്ത്തനം ആരംഭിക്കുന്നതിന് 50 ലക്ഷം രൂപ അനുവദിച്ചിട്ടുണ്ട്. ഇതിനുപുറമെ മരുന്നു വാങ്ങുന്നതിന് കേരള മെഡിക്കല് സര്വീസ് കോര്പ്പറേഷന് 5ലക്ഷവും മെഡിക്കല് ഉപകരണങ്ങള് വാങ്ങുന്നതിന് രണ്ടു ലക്ഷം രൂപയും അനുവദിച്ചു.
നഗരസഭ ഉടമസ്ഥതയിലുള്ള കെട്ടിടങ്ങളിലാണ് പുതിയ ആരോഗ്യ കേന്ദ്രം ആരംഭിക്കുന്നത്. കുര്യന്മല വനിത വ്യവസായ കേന്ദ്രം ബില്ഡിങ്ങിലും മണിയം കുളം കവലയിലെ നഗരസഭ ഉടമസ്ഥതയിലുള്ള കെട്ടിടത്തിലും സെന്റര് പ്രവര്ത്തിക്കും. ഇരു കെട്ടിടങ്ങളുടേയും അറ്റകുറ്റപ്പണികള് പൂര്ത്തിയാക്കി. രാവിലെ 8 മുതല് വൈകിട്ട് അഞ്ച് വരെയാകും പ്രവര്ത്തനസമയം. ഓരോ ആരോഗ്യ കേന്ദ്രത്തിലും ഒന്ന് വീതം ഡോക്ടര്, ഫാര്മസിസ്റ്റ്, സ്റ്റാഫ് നഴ്സ്, ജൂനിയര് ഹെല്ത്ത് ഇന്സ്പെക്ടര്, ഇതര ജോലികള്ക്കായി ജീവനക്കാരന് എന്നിവര് സേവനം അനുഷ്ഠിക്കും.
ടെലി മെഡിസിന് സംവിധാനവും ഉണ്ടാകും. ഇതിനായി നാല് ലക്ഷം രൂപയും അനുവദിച്ചിട്ടുണ്ട്. ഗ്രാമീണ മേഖലകളില് ചികിത്സ സൗകര്യം ഉറപ്പുവരുത്തുക എന്ന ലക്ഷ്യത്തോടെയാണ് ആരോഗ്യ കേന്ദ്രങ്ങള് തുറക്കുന്നത്. നഗരസഭയുടെ അങ്ങേ അതിര്ത്തിയിലുള്ള രണ്ടാര്കരയിലെയും ഇങ്ങേ അതിര്ത്തിയിലുള്ള കുര്യന് മലയിലെയും ആളുകള്ക്ക് മൂവാറ്റുപുഴ ജനറല് ആശുപത്രിയെ ആശ്രയിക്കേണ്ട സ്ഥിതിയാണ് നിലവിലുള്ളത്. ചെറിയ രോഗങ്ങള് പിടിപെട്ടാല് പോലും ഇവര്ക്ക് ജനറല് ആശുപത്രി ആണ് ആശ്രയം പുതിയ ആരോഗ്യ ഉപകേന്ദ്രങ്ങള് പ്രവര്ത്തനം ആരംഭിക്കുന്നതോടെ ഈ പ്രശ്നത്തിന് പൂര്ണ്ണ പരിഹാരമാകുമെന്നും നഗരസഭ ചെയര്മാന് പി.പി. എല്ദോസ് വ്യക്തമാക്കി.