ആലപ്പുഴ: രണ്ടാംവിവാഹത്തെച്ചൊല്ലിയുള്ള തര്ക്കത്തില് വയോധികയായ സഹോദരിയെ ചുറ്റികകൊണ്ടു തലയ്ക്കടിച്ചുകൊന്ന് കുഴിച്ചുമൂടിയ സഹോദരന് അറസ്റ്റില്. മാരാരിക്കുളം തെക്ക് പഞ്ചായത്ത് 12-ാം വാര്ഡ് പൂങ്കാവ് വടക്കന്പറമ്പില് റോസമ്മ (61) കൊല്ലപ്പെട്ട കേസില് സഹോദരന് ബെന്നി (63) ആണ് അറസ്റ്റിലായത്. ഇയാള് കുറ്റം സമ്മതിച്ചതായി പോലീസ് പറഞ്ഞു.
കഴിഞ്ഞ വ്യാഴാഴ്ച മുതല് റോസമ്മയെ കാണാനില്ലായിരുന്നു. ബന്ധുക്കളും നാട്ടുകാരും അന്വേഷിച്ചപ്പോള് ജോലിക്കുപോയെന്നാണ് ബെന്നി പറഞ്ഞത്. സംശയം തോന്നിയ ചിലര് പരാതി നല്കാനൊരുങ്ങുമ്പോഴാണ് മറ്റൊരു സഹോദരന്റെ മകളോട് ബെന്നി കുറ്റസമ്മതം നടത്തിയത്. തുടര്ന്ന് പോലീസെത്തി ഇയാളെ ചോദ്യംചെയ്തശേഷം കുഴിമാന്തി മൃതദേഹം പുറത്തെടുക്കുകയായിരുന്നു. റോസമ്മയും ബെന്നിയും അടുത്തടുത്ത വീടുകളിലായിരുന്നു താമസം. ബെന്നിയുടെ വീടിന്റെ അടുക്കളയുടെ പിന്വശത്തെ വാതില്പ്പടിയോടു ചേര്ന്നുള്ള ഭാഗം കുഴിച്ചാണ് മൃതദേഹം കണ്ടെടുത്തത്. പ്രതി തന്നെയാണ് സ്ഥലം കാട്ടിക്കൊടുത്തത്.
റോസമ്മ രണ്ടാംവിവാഹത്തിനു തയ്യാറെടുത്തിരുന്നു. ചമ്പക്കുളം സ്വദേശിയുമായി മേയ് ഒന്നിനു കല്യാണവും നിശ്ചയിച്ചു. ഇതില് ബന്ധുക്കള്ക്ക് എതിര്പ്പുണ്ടായിരുന്നു. അതു വകവെക്കാതെ ഇവര് കല്യാണത്തിനായി സ്വര്ണമാലയും മോതിരവും വാങ്ങി. വിവാഹവുമായി ബന്ധപ്പെട്ട തര്ക്കമാണ് കൊലപാതകത്തില് കലാശിച്ചതെന്ന് പ്രതി പോലീസിനോടു സമ്മതിച്ചു. 18-ന് ഉച്ചയ്ക്ക് ഇതേച്ചൊല്ലിയുള്ള തര്ക്കത്തില് പ്രകോപിതനായ ബെന്നി ചുറ്റികകൊണ്ട് തലയ്ക്കടിച്ചുവീഴ്ത്തി കൊല്ലുകയായിരുന്നു. പിന്നിലെ വാതിലിനരികെ കുഴിയെടുത്ത് ഇഷ്ടികനിരത്തി മൂടുകയും ചെയ്തു. ബെന്നി കുറ്റസമ്മതം നടത്തിയ സഹോദരന്റെ മകളാണ് ആലപ്പുഴ പോലീസില് അറിയിച്ചത്. മേസ്തിരിപ്പണിക്കാരനായ ബെന്നിയെ വെട്ടുകാട് ഭാഗത്തെ ചായക്കടയില്നിന്നാണ് പിടികൂടിയത്. റോസമ്മയുടെ മൃതദേഹം വണ്ടാനം മെഡിക്കല് കോളേജ് ആശുപത്രി മോര്ച്ചറിയിലേക്കു മാറ്റി.
ഭര്ത്താവ് ഉപേക്ഷിച്ച റോസമ്മയ്ക്ക് രണ്ടുമക്കളുണ്ട്. ഇളയമകന് ജോമോനോടൊപ്പമാണ് താമസമെങ്കിലും ബെന്നിക്കു സഹായമായി മിക്കപ്പോഴും അയാളുടെ വീട്ടിലാണു ചെലവഴിച്ചിരുന്നത്.