തിരുവനന്തപുരത്ത് ശുചീകരണ തൊഴിലാളികളെ പിരിച്ചുവിട്ട സംഭവത്തില് മേയര് ആര്യാ രാജേന്ദ്രന്റെ നടപടിയെ തള്ളി സിപിഐഎം സംസ്ഥാന സെക്രട്ടറി എം.വി. ഗോവിന്ദന്. പ്രതിഷേധിക്കുന്നവരെ പിരിച്ചു വിടുക എന്നത് പാര്ട്ടി നയമല്ല. എന്താണ് നടന്നതെന്ന് മനസിലാക്കിയാലേ കൂടുതല് പ്രതികരിക്കാനാകുവെന്ന് അദ്ദേഹം പറഞ്ഞു.
ശുചീകരണ തൊഴിലാളികള്ക്കെതിരായ തിരുവനന്തപുരം നഗരസഭയുടെ നടപടിക്കെതിരെ വ്യാപക പ്രതിഷേധമാണ് ഉയരുന്നത്. നടപടി പിന്വലിക്കണമെന്ന് സിഐടിയുവും ഐഎന്ടിയുസിയും ആവശ്യപ്പെട്ടു.
ശനിയാഴ്ചയായിരുന്നു തിരുവനന്തപുരം കോര്പ്പറേഷനിലെ ചാലാ സര്ക്കിളിലെ ശുചീകരണ തൊഴിലാളികള് സ്വന്തം പണം മുടക്കി വാങ്ങിയ ഓണസദ്യ മാലിന്യക്കുപ്പയില് തള്ളിയത്. തൊഴിലാളികളുടെ ഓണാഘോഷം മുടക്കി ഷിഫ്റ്റ് തീര്ന്നിട്ടും പണി ചെയ്യിപ്പിച്ചതില് പ്രതിഷേധിച്ചായിരുന്നു നടപടി. ദൃശ്യങ്ങള് വൈറലായതോടെ ഹെല്ത്ത് ഇന്സ്പെക്ടറുടേയും ഹെല്ത്ത് സൂപ്പര്വൈസറുടേയും റിപ്പോര്ട്ടിന്റെ അടിസ്ഥാനത്തില് ഏഴ് സ്ഥിരം തൊഴിലാളികളെ മേയര് ആര്യാ രാജേന്ദ്രന് സസ്പെന്ഡ് ചെയ്തു. നാല് താത്കാലികക്കാരെ പിരിച്ചുവിട്ടു.
ഭക്ഷണം വലിച്ചെറിഞ്ഞതിനെ വിമര്ശിച്ച് മേയര് ഫേസ്ബുക്ക് പോസ്റ്റിട്ടു. നടപടി നേരിട്ട തൊഴിലാളികളില് ഭൂരിഭാഗവും സിഐടിയുക്കാരാണ്. തൊഴിലാളികളുടെ ഭാഗം കേള്ക്കാതെയാണ് നടപടി എന്നാണ് ഇവരുടെ പരാതി.
മേയറുടെ നടപടിക്കെതിരെ സമൂഹ മാധ്യമങ്ങളില് വ്യാപക പ്രതിഷേധമാണ് ഉയരുന്നത്. പ്രതിഷേധിക്കാനുള്ള തൊഴിലാളികളുടെ അവകാശത്തെ അടിച്ചമര്ത്തി എന്നാണ് വിമര്ശനം. വിവാദം ശക്തമായതടെ സിപിഐഎം ജില്ലാ കമ്മിറ്റി ഒത്ത് തീര്പ്പിന് ശ്രമം തുടങ്ങിയിട്ടുണ്ട്.