മംഗളൂരു: കുഞ്ഞിനെ ഉപയോഗിച്ച് വിദേശത്തുനിന്ന് സ്വര്ണം കടത്താന് ശ്രമിച്ച പിതാവ് പിടിയിലായി. രണ്ടുവയസ്സുള്ള സ്വന്തം കുഞ്ഞിനെ ഉപയോഗിച്ചാണ് മലയാളിയായ പിതാവ് സ്വര്ണം കടത്താന് ശ്രമിച്ചത്. സ്വര്ണം കടത്താന് ശ്രമിക്കുന്നതിനിടെ കാസര്കോട്ടുകാരനെയാണ് മംഗളൂരു വിമാനത്താവളത്തിലെ കസ്റ്റംസ് അധികൃതര് അറസ്റ്റുചെയ്തത്.
കുഞ്ഞിന്റെ ഡയപ്പറിലും സ്വന്തം ശരീരത്തിനുള്ളിലും സ്വര്ണം ഒളിപ്പിച്ച് കടത്താന് ശ്രമിക്കുന്നതിനിടെയാണ് യുവാവ് പിടിയിലായത്. 21 മാസം പ്രായമുള്ള കുട്ടിയുടെ അടിവസ്ത്രത്തിനുള്ളിലെ ഡയപ്പറിലാണ് സ്വര്ണം ഒളിപ്പിച്ചിരുന്നത്. സ്കാനിങിനിടെയായിരുന്നു സ്വര്ണം കണ്ടെത്തിയത്. പിതാവും കുഞ്ഞും ദുബായില് നിന്നും എത്തിയതായിരുന്നു. പിതാവിനെ ചോദ്യം ചെയ്തതിനുപിന്നാലെ ഇയാളുടെ ശരീരത്തിനുള്ളില്നിന്നും പശരൂപത്തിലാക്കിയ സ്വര്ണവും കണ്ടെത്തി. 1.350 കിലോ സ്വര്ണമാണ് പിടികൂടിയത്. പിടികൂടിയ സ്വര്ണത്തിന് 76 ലക്ഷം രൂപയോളം വിലവരും. കേസില് കുഞ്ഞ് ഉള്പ്പെട്ടതിനാല് മറ്റു വിവരങ്ങള് അധികൃതര് പുറത്തുവിട്ടിട്ടില്ല.