മൂവാറ്റുപുഴ: വര്‍ഷങ്ങളായി ഉപയോഗിക്കാതെ പൂട്ടിയിട്ടിരുന്ന വില്ലേജ് ഓഫീസര്‍ ക്വാര്‍ട്ടേഴ്സിന് ഒടുവില്‍ ശാപമോക്ഷം. ചോര്‍ന്നൊലിച്ച് അപകടാവസ്ഥയിലായ കല്ലൂര്‍ക്കാട് വില്ലേജ് ഓഫീസ് ഇനി ഈ കെട്ടിടത്തിലേക്ക് മാറ്റിപ്രവര്‍ത്തിക്കും. ജീര്‍ണിച്ച് ഏതുനിമിഷവും നിലംപൊത്താറായ പഴയ കെട്ടിടത്തില്‍ നിന്നും ഓഫീസിന്റെ പ്രവര്‍ത്തനം അടിയന്തരമായി മാറ്റി, സൗകര്യങ്ങളുള്ള ‘സ്മാര്‍ട്ട്’ വില്ലേജ് ഓഫീസാക്കാനാണ് അധികൃതരുടെ തീരുമാനം. ഇതുമായി ബന്ധപ്പെട്ട് അഡീഷണല്‍ ജില്ലാ മജിസ്ട്രേറ്റ് (ADM) മനോജ് കെ. സ്ഥലം സന്ദര്‍ശിച്ച് സ്ഥിതിഗതികള്‍ വിലയിരുത്തി. പരിശോധനാ റിപ്പോര്‍ട്ട് ഉടന്‍തന്നെ സര്‍ക്കാരിന് സമര്‍പ്പിക്കും.
പേടിച്ച് കയറണം, 57 വര്‍ഷത്തെ പഴക്കം!
1969 ജൂണ്‍ 23-നാണ് മൂവാറ്റുപുഴ-തേനി പാതയോരത്ത് പഞ്ചായത്ത് ഓഫീസിന് സമീപത്തായി നിലവിലെ വില്ലേജ് ഓഫീസ് പ്രവര്‍ത്തനം ആരംഭിക്കുന്നത്. 57 വര്‍ഷത്തെ പഴക്കമുള്ള കെട്ടിടം കാല്‍നൂറ്റാണ്ടിലേറെയായി തീര്‍ത്തും ശോചനീയാവസ്ഥയിലാണ്. പ്രധാനമായും കാര്‍ഷിക മേഖലയായ കല്ലൂര്‍ക്കാട്ട് പ്രതിദിനം നൂറുകണക്കിന് ആളുകളാണ് വില്ലേജ് ഓഫീസിനെ ആശ്രയിച്ച് എത്തുന്നത്. എന്നാല്‍ മഴക്കാലത്ത് മേല്‍ക്കൂര ചോര്‍ന്നൊലിച്ച് ഭിത്തികള്‍ ഇളകി വീഴുന്ന അവസ്ഥയിലായതോടെ വലിയ ഭീതിയോടെയാണ് ജീവനക്കാരും നാട്ടുകാരും കെട്ടിടത്തിനുള്ളില്‍ കഴിഞ്ഞിരുന്നത്.
ഇടപെടലുമായി ജില്ലാ പഞ്ചായത്ത് പ്രസിഡന്റ്
നാട്ടുകാരും ജീവനക്കാരും നേരിടുന്ന കടുത്ത ദുരിതം ചൂണ്ടിക്കാട്ടി കല്ലൂര്‍ക്കാട് സ്വദേശി കൂടിയായ ജില്ലാ പഞ്ചായത്ത് പ്രസിഡന്റ് കെ.ജി. രാധാകൃഷ്ണന്‍ ജില്ലാ കളക്ടറെ നേരിട്ട് കണ്ടതോടെയാണ് നടപടികള്‍ക്ക് വേഗമേറിയത്. 2016-ല്‍ നിര്‍മ്മിച്ച് ആരും ഉപയോഗിക്കാതെ കിടന്നിരുന്ന ക്വാര്‍ട്ടേഴ്സിലേക്ക് ഓഫീസ് മാറ്റാമെന്ന പ്രായോഗിക നിര്‍ദ്ദേശം മുന്നോട്ടുവെച്ചതും അദ്ദേഹമാണ്. ചെറിയ തോതിലുള്ള അറ്റകുറ്റപ്പണികളും പെയിന്റിംഗും പൂര്‍ത്തിയാക്കുന്നതോടെ ഈ കോണ്‍ക്രീറ്റ് കെട്ടിടം മികച്ച സൗകര്യങ്ങളുള്ള സ്മാര്‍ട്ട് ഓഫീസായി മാറും.
‘മിനി സിവില്‍ സ്റ്റേഷന്‍’ വരുമോ?
അതേസമയം, നിലവിലെ പഴയ കെട്ടിടം പൊളിച്ചുനീക്കി അവിടെ കല്ലൂര്‍ക്കാട്ടുകാരുടെ ചിരകാല സ്വപ്നമായ ‘മിനി സിവില്‍ സ്റ്റേഷന്‍’ നിര്‍മ്മിക്കണമെന്ന ആവശ്യവും ശക്തമായിട്ടുണ്ട്. നിലവില്‍ വാടകക്കെട്ടിടങ്ങളില്‍ പ്രവര്‍ത്തിക്കുന്ന വിവിധ സര്‍ക്കാര്‍ ഓഫീസുകള്‍ ഒരു കുടക്കീഴിലാക്കാന്‍ ഇത് ഉപകരിക്കും. ഇക്കാര്യം ചൂണ്ടിക്കാട്ടി ജില്ലാ പഞ്ചായത്ത് പ്രസിഡന്റും മാത്യു കുഴല്‍നാടന്‍ എംഎല്‍എയും റവന്യൂ മന്ത്രിക്ക് കത്ത് നല്‍കിയിട്ടുണ്ട്.
ADM-ന്റെ സ്ഥലസന്ദര്‍ശന വേളയില്‍ ഗ്രാമപഞ്ചായത്ത് പ്രസിഡന്റ് സിനി മനോജ്, ജില്ലാ പഞ്ചായത്ത് അംഗം ഷെല്‍മി ജോണ്‍സ്, ബ്ലോക്ക് പഞ്ചായത്ത് മെമ്പര്‍ ലിസി ജോളി, ഗ്രാമപഞ്ചായത്ത് സ്റ്റാന്‍ഡിങ് കമ്മിറ്റി ചെയര്‍മാന്‍ നീതു ജോസഫ്, ജനപ്രതിനിധികളായ റാണി സിജോ, റെജീന ജോബി, പ്രൊഫ. ജോസ് അഗസ്റ്റിന്‍, സൂസമ്മ പോള്‍, ബാങ്ക് പ്രസിഡന്റ് ജോളി ജോര്‍ജ് നെടുങ്കല്ലല്‍, ബിജു ജോസഫ്, ബൈജി ആത്രശ്ശേരി, ജോര്‍ജ് ഫ്രാന്‍സിസ് തെക്കേക്കര, അനില്‍ പുത്തന്‍പുര, വിജയന്‍ മരുതൂര്‍ തുടങ്ങിയവരും പങ്കെടുത്തു.
