മൂവാറ്റുപുഴ: മൂവാറ്റുപുഴ -തേനി അന്തര്‍സംസ്ഥാന പാതയിലെ മണിയംകുളം കവലയില്‍ കണ്‍സ്യൂമര്‍ ഫെഡിന്റെ വിദേശമദ്യഷാപ്പു് തുടങ്ങാനുള്ള നീക്കം അനുവദിക്കരുതെന്ന് കിഴക്കേക്കരയില്‍ ചേര്‍ന്ന സര്‍വ്വകക്ഷി യോഗം സര്‍ക്കാരിനോടാവശ്യപ്പെട്ടു. എല്ലാ വിഭാഗം ജനങ്ങളും സമാധാനത്തോടെയും, സൗഹൃദാന്തരീക്ഷത്തിലും കഴിയുന്ന നഗരത്തിലെ ഏറ്റവും ജനനിബിഡമായ പ്രദേശത്ത് ഷാപ്പു് തുടങ്ങുന്നത് ദുരുദ്ദേശപരമാണ്. ആരാധനാലയങ്ങളും, മുനിസിപ്പല്‍ അങ്കണവാടിയും, സര്‍ക്കാര്‍ ഹെല്‍ത്ത് സെന്ററും പ്രവര്‍ത്തിക്കുന്ന സ്ഥലത്ത് ഷാപ്പ് തുടങ്ങുന്നത് നിയമ വിരുദ്ധവും, അനാരോഗ്യകരവുമാണെന്ന് മുനിസിപ്പല്‍ സ്റ്റാന്റിംഗ് കമ്മിറ്റി ചെയര്‍മാന്‍ അജി മുണ്ടാടിന്റെ അധ്യക്ഷതയില്‍ ചേര്‍ന്ന ജനപ്രതിനിധികളുടെയും സാമൂഹ്യ-രാഷ്ട്രീയ നേതാക്കളുടെയും യോഗം വിലയിരുത്തി.
മുനിസിപ്പല്‍ സ്റ്റാന്റിംഗ് കമ്മിറ്റി ചെയര്‍പേഴ്സണ്‍ പ്രമീള ഗിരീഷ് കുമാര്‍, മുനിസിപ്പല്‍ കൗണ്‍സിലര്‍ ലൈല ഹനീഫ, മുന്‍ കൗണ്‍സിലര്‍മാരായ കെ.എം.അബ്ദുല്‍ മജീദ്, സി.എം. സീതി, കെ.എ.അബ്ദുല്‍ സലാം, സി.എം.ഷുക്കൂര്‍, സി.പി.എം.ബ്രാഞ്ച് സെക്രട്ടറി കെ.യു.പ്രസാദ്, ഭഗവതി ക്ഷേത്രം ട്രസ്റ്റി ശിവദാസന്‍ നമ്പൂതിരി, മഹല്ല് പ്രസിഡന്റ് കെ.എം.മുസ്തഫ കമാല്‍, സെക്രട്ടറി സമദ് മലേക്കുടി, എന്‍.പി.ജയന്‍ (എന്‍.എസ്.എസ്.കരയോഗം ) തുടങ്ങിയവര്‍ പ്രസംഗിച്ചു.
