മുവാറ്റുപുഴ: മൂവാറ്റുപുഴയിലെ ഹോട്ടലുകളില്‍ ഭക്ഷ്യസുരക്ഷാ വിഭാഗം ബുധനാഴ്ച നടത്തിയ പരിശോധനയില്‍ പുഴുവരിച്ചതടക്കം പഴകിയ ഭക്ഷണ സാധനങ്ങള്‍ പിടിച്ചെടുത്തു. പരിശോധിച്ച എട്ട്് ഹോട്ടലുകള്‍ക്കും നോട്ടീസ് നല്‍കി. നഗരസഭ ആരോഗ്യ വിഭാഗവുമായി ചേര്‍ന്ന് ഭക്ഷ്യസുരക്ഷാ വിഭാഗമാണ് പരിശോധന നടത്തിയത്. മൂന്ന് കടകളില്‍ നിന്നാണ് ഭക്ഷ്യയോഗ്യമല്ലാത്ത പഴകിയ ഭക്ഷണ സാധനങ്ങള്‍ പിടിച്ചെടുത്തത്. വൃത്തിഹീനമായ സാഹചര്യത്തിലാണ് ഭക്ഷണം പാചകം ചെയ്യുന്നതെന്ന് കണ്ടെത്തിയതോടെയാണ് എട്ട് ഹോട്ടലുകള്‍ക്കും അധികൃതര്‍ നോട്ടീസ് നല്‍കിയത്.
ഇവരില്‍ നിന്നും പിടിച്ചെടുത്ത ഭക്ഷണ പദാര്‍ത്തങ്ങള്‍ നഗരസഭക്ക് മുന്നില്‍ പ്രദര്‍ശിപ്പിച്ചു. കടാതിയിലെ രാജ് റിവേറിയ ബാര്‍, വാഴപ്പിള്ളിയിലെ അല്‍ അമീന്‍, ചാലിക്കടവിലെ ലക്ഷ്മി ഭവന്‍ എന്നിവിടങ്ങളില്‍ നിന്നുമാണ് പഴകിയ ഭക്ഷണം പിടികൂടിയത്. ഇവരെ പിഴയടപ്പിച്ചു. തൊട്ടുപിന്നാലെ ബാറും ഹോട്ടലുകളും പഴയപോലെ തുറന്നു പ്രവര്‍ത്തിക്കുന്നു.
കുറഞ്ഞ നിരക്കിലുള്ള നിയമാനുസൃത പിഴമാത്രം ഈടാക്കുന്നതാണ് നഗരത്തില്‍ പഴകിയ ഭക്ഷണങ്ങളുടെ വില്‍പ്പന വ്യാപകമാകാന്‍ കാരണം. ഇതിനൊപ്പം 15 ദിവസത്തേക്കെങ്കിലും ഹോട്ടലുകള്‍ അടച്ചിടണം. ഇങ്ങനെ ആയാല്‍മാത്രമെ പഴകിയ ഭക്ഷമ വില്‍പ്പന തടയാന്‍ കഴിയും. എന്തിനും ഏതിനും പ്രതിഷേധിക്കാറുള്ള വ്യാപര സംഘടനകള്‍ തങ്ങളുടെ അംഗങ്ങലെ ബോധവല്‍ക്കരിക്കണമെന്ന ആവശ്യവും ശക്തമാണ്. റെയ്ഡ് തുടരുമെന്ന് അധികൃതര്‍ അറിയിച്ചു.
