മുംബൈ: മാതാവിനെ ക്രൂരമായി കൊലപ്പെടുത്തിയ ശേഷം അവയവങ്ങള്‍ വറുത്ത് കഴിച്ച 35 കാരനായ മകന് വധശിക്ഷ. സുനില്‍ രാമ കുഛ്കൊറാവിയെ ആണ് മരണംവരെ തൂക്കിലേറ്റാന്‍ വിധിച്ചത്. മഹാരാഷ്ട്രയിലെ കോലാപൂരിലെ കോടതിയാണ് അപൂര്‍വങ്ങളില്‍ അപൂര്‍വമെന്ന് വിധി എഴുതി യുവാവിന് തൂക്കുമരം വിധിച്ചത്.
സംഭവം നടുക്കുന്നതാണെന്നും സമൂഹ മനസാക്ഷിയെ ഞെട്ടിച്ചതായി ജഡ്ജി നിരീക്ഷിച്ചു. കൊലപാതകം അതിക്രൂരവും ലജ്ജാവഹമാണെന്നും കോടതി ചൂണ്ടിക്കാട്ടി. കോലാപൂര്‍ അഡീഷനല്‍ സെഷന്‍സ് ജഡ്ജി മഹേഷ് കൃഷ്ണജിയാണ് വിധി പറഞ്ഞത്.
പെശാചിക കൃത്യത്തിന് ശേഷവും പ്രതിയുടെ പെരുമാറ്റത്തില്‍ നിന്ന് മാനസാന്തരമോ പശ്ചാത്താപമോ പ്രകടമായില്ലെന്നും കോടതി നിരീക്ഷിച്ചു. ‘ആ അമ്മ അനുഭവിച്ച വേദന വാക്കുകളിലൂടെ വിശദീകരിക്കാന്‍ കഴിയില്ല. മദ്യാസക്തി കാരണമാണ് അയാള്‍ കുറ്റം ചെയ്തിരിക്കുന്നത്. നിസഹായയായ അമ്മയുടെ ജീവിതം അവന്‍ ഇല്ലാതാക്കി. മാതൃത്വത്തിനുള്ള ഏറ്റവും വലിയ അപമാനമാണിത്’ -കോടതി നിരീക്ഷിച്ചു .
2017 ആഗസ്റ്റിലാണ് കേസിനാസ്പദമായ സംഭവം നടന്നത്. അയല്‍വാസിയായ ഒരു കുട്ടിയാണ് അമ്മയുടെ മൃതദേഹത്തിന് സമീപം പ്രതി നില്‍ക്കുന്നത് കണ്ടത്. കുട്ടി ഇത് കണ്ട് കരഞ്ഞതോടെ ആളുകള്‍ പൊലീസിനെ വിളക്കുകയായിരുന്നു. സംഭവ സ്ഥലത്തെത്തിയ പൊലീസ് രക്തത്തില്‍ കുളിച്ച്‌ കിടക്കുന്ന മാതാവിന്‍റെ മൃതശരീരമാണ് കണ്ടത്. ചില അവയവങ്ങള്‍ പുറത്തെടുത്ത നിലയിലായിരുന്നു. ഹൃദയം ഒരു തളികയില്‍ വെച്ചപ്പോള്‍ മറ്റ് ചില അവയവങ്ങള്‍ ഒരു എണ്ണപാത്രത്തിലാണ് കാണപ്പെട്ടത്. അക്രമാസക്തരായ ജനങ്ങളുടെ ഇടയില്‍ നിന്ന് വളരെ സാഹസികമായാണ് പൊലീസ് പ്രതിയെ പിടികൂടി അറസ്റ്റ് ചെയ്തത്.
മദ്യത്തിന് അടിമയായ പ്രതി സുനില്‍ നിരന്തരം മര്‍ദിച്ചതിനെ തുടര്‍ന്ന് ഭാര്യ ഉപേക്ഷിച്ച്‌ പോയിരുന്നു. വീട്ടു ചെലവുകള്‍ നടത്തിയിരുന്ന മാതാവിന്‍റെ പെന്‍ഷന്‍ തുക മദ്യപിക്കാനായി തട്ടിയെടുക്കാന്‍ ഇയാള്‍ ശ്രമിക്കാറുണ്ടായിരുന്നു. സാക്ഷികള്‍ ഇല്ലാത്തിനാല്‍ സാഹചര്യ തെളിവുകളുടെ അടിസ്ഥാനത്തിലായിരുന്നു കേസ്. സുനിലിന്‍റെ വസ്ത്രത്തില്‍ കണ്ട രക്തക്കറ മാതാവിന്‍റെ രക്തവുമായി സാമ്യമുള്ളതായി പോലീസ് കണ്ടെത്തി. തുടര്‍ന്നാണ് പോലീസ് കേസെടുത്തത്.
