ബിജെപിയുടെ ഏക സീറ്റായിരുന്ന നേമം പിടിച്ചെടുത്ത് എല്ഡിഎഫ് സ്ഥാനാര്ഥി വി. ശിവന്കുട്ടി. 5421 വോട്ടിനാണ് ജയം. ബിജെപി സ്ഥാനാര്ഥി കുമ്മനം രാജശേഖരന് രണ്ടാം സ്ഥാനത്തേക്ക് പിന്തള്ളപ്പെട്ടു. കെ മുരളീധരന് മൂന്നാമത്. ഇതോടെ കേരള നിയമസഭയിലെ ഏക അക്കൗണ്ടും ബിജെപിക്ക് നഷ്ടപ്പെട്ടു.
പ്രധാനമന്ത്രി നരേന്ദ്ര മോദി, ആഭ്യന്തരമന്ത്രി അമിത് ഷാ എന്നിവരുള്പ്പെടെ വമ്പന് നേതാക്കള് പ്രചാരണക്കളം നിറഞ്ഞാടിയിട്ടും കേരളത്തില് ഉണ്ടായിരുന്ന സീറ്റ് പോലും നേടാനാകാതെ തകര്ന്നടിഞ്ഞ് ബിജെപി. സ്വര്ണക്കടത്ത് ഉള്പ്പെടെ സര്ക്കാരിനെതിരെ ഉയര്ന്ന അഴിമതിയാരോപണങ്ങളും വിവാദങ്ങളും ശബരിമല സ്ത്രീപ്രവേശന വിഷയവും ഉയര്ത്തിക്കാട്ടി വമ്പന് പ്രചാരണം അഴിച്ചുവിട്ട ബിജെപിക്ക് വിജയ പ്രതീക്ഷയുണ്ടായിരുന്ന നേമം ഉള്പ്പെടെയുള്ള മണ്ഡലങ്ങളില് പോലും വന് തിരിച്ചടിയാണ് നേരിടേണ്ടി വന്നത്.
തിരഞ്ഞെടുപ്പിനു തൊട്ടുമുമ്പ് മെട്രോമാന് ഇ. ശ്രീധരനെ ഒപ്പം നിര്ത്തി താമരചിഹ്നത്തില് മത്സരിപ്പിക്കാന് കഴിഞ്ഞത് നിഷ്പക്ഷ വോട്ടുകള് അനുകൂലമാക്കുമെന്ന പാര്ട്ടി പ്രതീക്ഷയും പാളി. പാലക്കാട് കടുത്ത മത്സരം കാഴ്ചവെച്ച ഇ ശ്രീധരനും തോല്വി.
