മുവാറ്റുപുഴ: തിരഞ്ഞെടുക്കപ്പെട്ട ഐ ടി ഐ കളില് നൂതന കോഴ്സുകള് ആരംഭിക്കുന്നതിനുള്ള സാധ്യത പരിശോധിക്കുമെന്ന് മന്ത്രി വി. ശിവന് കുട്ടി. മുവാറ്റുപുഴ ആരക്കുഴ ഗവ. ഐ ടി ഐ യുടെ പുതിയ കെട്ടിടം ഉദ്ഘാടനം ചെയ്യുകയായിരുന്നു മന്ത്രി.
തുറമുഖ മേഖലയില് നിരവധി തൊഴില് ലഭിക്കാന് ഉതകുന്ന എന്സിവിടിയുടെ മറൈന് ഫിറ്റര്, വെസല് നാവിഗേറ്റര് എന്നീ സിടിഎസ് കോഴ്സുകള്ക്ക് പുറമേ ലോജിസ്റ്റിക് മേഖലയുമായി ബന്ധപ്പെട്ട നാഷണല് ക്വാളിഫിക്കേഷന് രജിസ്റ്ററില് ഉള്പ്പെടുത്തിയിട്ടുള്ള ഹ്രസ്വകാല കോഴ്സുകളും തിരഞ്ഞെടുക്കപ്പെട്ട ഐ ടി ഐ കളില് ആരംഭിക്കുന്നതിനുള്ള സാധ്യത പരിശോധിക്കും. നിര്മ്മാണം പുരോഗമിക്കുന്ന വിഴിഞ്ഞം തുറമുഖം വലിയ തൊഴില് സാധ്യത നല്കുന്നു. മറൈന് മേഖലയുമായി ബന്ധപ്പെട്ട ട്രേഡുകള് ഐ ടി ഐകളില് തുടങ്ങുന്നതിനാവശ്യമായ സാധ്യതാ പഠനം നടത്തും.
സംസ്ഥാനത്തെ ഐ ടി ഐകള് മാറ്റത്തിന്റെ പാതയിലാണ്. തൊഴിലധിഷ്ഠിത വിദ്യാഭ്യാസം കാലഘട്ടത്തിന്റെ ആവശ്യമാണ്. ആധുനിക തൊഴില് കമ്പോളത്തിന് അനുസൃതമായി യുവതലമുറയെ വാര്ത്തെടുക്കണം.
ഐ ടി ഐ വിദ്യാര്ഥികള്ക്ക് പരിശീലന കാലത്ത് തന്നെ വ്യാവസായിക സ്ഥാപനങ്ങളില് പ്രായോഗിക പരിശീലനം ലഭിക്കുന്നതിന് നടപടി സ്വീകരിച്ചുവരികയാണ്. സംസ്ഥാനത്തെ എല്ലാ ഐ ടി ഐ വിദ്യാര്ഥികള്ക്കും പ്രതിവര്ഷം 150 മണിക്കൂര് പ്രായോഗിക പരിശീലനം ബന്ധപ്പെട്ട വ്യാവസായിക സ്ഥാപനങ്ങളില് ലഭ്യമാക്കുന്നതിനുള്ള ധാരണാപത്രം ഒപ്പിടുന്നതിനുള്ള നടപടി പുരോഗമിക്കുകയാണ്. നിലവില് 19 സര്ക്കാര് ഐ ടി ഐ കളില് വ്യാവസായിക സ്ഥാപനങ്ങളുമായി സഹകരിച്ച് ഓണ് ദ ജോബ് പരിശീലനം കഴിഞ്ഞ വര്ഷം മുതല് നല്കി വരുന്നുണ്ടെന്നും മന്ത്രി പറഞ്ഞു.
എം എല് എയുടെ അഭ്യര്ഥന പ്രകാരം ആരക്കുഴ ഗവ. ഐ ടി ഐയില് പുതിയ കോഴ്സുകള് ആരംഭിക്കുന്നതിനുള്ള സാധ്യത പരിശോധിക്കാന് മന്ത്രി അഡീഷണല് ഡയറക്ടര്ക്ക് വാക്കാല് നിര്ദേശം നല്കി. 3.72 ഏക്കര് സ്ഥലത്ത് പ്ലാന് ഫണ്ടില് നിന്നുള്ള 6.81 കോടി രൂപ ഉപയോഗിച്ചാണ് പുതിയ കെട്ടിടം നിര്മ്മിച്ചത്.
മാത്യു കുഴല് നാടന് എം.എല്.എ അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, ബ്ലോക്ക് പഞ്ചായത്ത് പ്രസിഡന്റ് ജോസ് അഗസ്റ്റിന്, ആരക്കുഴ പഞ്ചായത്ത് പ്രസിഡന്റ് ജാന്സി മാത്യു, മുന് എം.എല്.എമാരായ ബാബു പോള്, ജോസഫ് വാഴക്കന്, സാങ്കേതിക വിദ്യാഭ്യാസ വകുപ്പ് അഡീഷണല് ഡയറക്ടര് പി. ശിവശങ്കരന് തുടങ്ങിയവര് പങ്കെടുത്തു.