ആലപ്പുഴ: പൊലീസ് ക്വാര്ട്ടേഴ്സില് മക്കളുമായി യുവതി ആത്മഹത്യ ചെയ്ത സംഭവത്തില് അന്വേഷണ സംഘം സമര്പ്പിച്ച കുറ്റപത്രത്തില് ഭര്ത്താവ് റെനീസ് ഒന്നാം പ്രതി. റെനീസിന്റെ പെണ്സുഹൃത്ത് ഷഹാനയാണ് രണ്ടാം പ്രതി. കുട്ടികളെ കൊന്ന് നജ്ല ആത്മഹത്യ ചെയ്തത് റെനീസിന്റെയും ഷഹാനയുടെയും ഭീഷണിയെ തുടര്ന്നാണെന്നും കുറ്റപത്രത്തില് പറയുന്നു. ആലപ്പുഴ ജുഡീഷ്യല് മജിസ്ട്രേറ്റ് ഫസ്റ്റ് ക്ലാസ് കോടതിയിലാണ് കുറ്റപത്രം സമര്പ്പിച്ചത്.
66 സാക്ഷികളും 38 രേഖകളുമാണ് കേസിലുള്ളത്. ആത്മഹത്യ പ്രേരണ, ഗാര്ഹിക പീഡനം എന്നിവ ഉള്പ്പെടെ ഇന്ത്യന് ശിക്ഷാ നിയമം 150, 306, 498(മ), 34 എന്നീ വകുപ്പുകളും ബാലാവകാശനിയമത്തിലെ 75-ാം വകുപ്പ് പ്രകാരവുമാണ് റെനീസിനും ഷഹാനയ്ക്കുമെതിരെ കുറ്റം ചുമത്തിയിരിക്കുന്നത്. ജാമ്യവ്യവസ്ഥ ലംഘിച്ച റെനീസിന്റെ ജാമ്യം റദ്ദാക്കണമെന്നും അന്വേഷണ സംഘം ആവശ്യപ്പെട്ടു. ആലപ്പുഴ മെഡിക്കല് കോളേജ് പൊലീസ് എയ്ഡ്പോസ്റ്റിലെ സിപിഒയായ റെനീസ് എല്ലാ ശനിയാഴ്ച്ചയും അന്വേഷണ സംഘത്തിന് മുന്നില് ഹാജരാകണമെന്ന വ്യവസ്ഥയാണ് ലംഘിച്ചത്.
സ്ത്രീധനത്തിന്റെ പേരില് റെനീസ് നജ്ലയെ ഉപദ്രവിച്ചിരുന്നതായി പ്രാഥമിക അന്വേഷണത്തില് തന്നെ പോലീസ് കണ്ടെത്തിയിരുന്നു. ഒപ്പം ഇയാളുടെ പെണ്സുഹൃത്തിന്റെ പങ്കും തെളിഞ്ഞു.
മെയ് 10 നാണ് ആലപ്പുഴ പോലീസ് ക്വട്ടേഴ്സില് മക്കളായ ടിപ്പു സുല്ത്താന്, മലാല എന്നിവരെ കൊലപെടുത്തിയശേഷം മാതാവ് നജ്ല ആത്മഹത്യ ചെയ്തത്. മകളുടെയും കുട്ടികളുടെയും മരണത്തിന് കാരണം ഭര്ത്താവും സിവില് പോലിസ് ഓഫിസറുമായ റെനീസാണെന്നു ചൂണ്ടിക്കാട്ടി നജ്ലയുടെ കുടുംബം നല്കിയ പരാതിയുടെ അടിസ്ഥാനത്തിലായിരുന്നു അന്വേഷണം.
റെനീസിന്റെ നിരന്തര പീഡനങ്ങളും, പരസ്ത്രീ ബന്ധവുമാണ് ആത്മഹത്യയ്ക്ക് കാരണമെന്ന് പൊലീസ് കണ്ടെത്തിയിരുന്നു. റെനീസിന്റെ കാമുകി ഷഹാനയുടെ പീഡനവും ആത്മഹത്യയ്ക്ക് കാരണമായെന്ന കണ്ടെത്തലിനെ തുടര്ന്ന് ഇരുവരെയും പൊലീസ് അറസ്റ്റ് ചെയ്യുകയായിരുന്നു.
റെനീസിന്റെ ഭാര്യയായി ക്വാര്ട്ടേഴ്സില് താമസിക്കാന് തന്നെ അനുവദിക്കണമെന്ന് ഷഹാന നിരന്തരം നജ്ലയോട് ആവശ്യപ്പെട്ടിരുന്നുവെന്ന് അന്വേഷണത്തില് കണ്ടെത്തിയിട്ടുണ്ട്. ആത്മഹത്യ നടന്ന ദിവസം വൈകീട്ട് ഷഹാന ക്വാര്ട്ടേഴ്സിലെത്തി നജ്ലയുമായി വഴക്കിടുന്നതിന്റെ ദൃശ്യങ്ങളും പൊലീസിന് ലഭിച്ചിരുന്നു. ഇതിനെല്ലാം റെനീസിന്റെ പിന്തുണയുണ്ടായതായാണ് കണ്ടെത്തല്. നജ്ലയെ നിരീക്ഷിക്കാന് സ്ഥാപിച്ച ക്യാമറ വഴി ആത്മഹത്യയുള്പ്പടെ റെനീസ് തത്സമയം കണ്ടിരിക്കാമെന്ന് പൊലീസ് കരുതിയിരുന്നുവെങ്കിലും, മരണം നടന്ന കിടപ്പുമുറി ക്യാമറയുടെ പരിധിയില് അല്ലെന്ന് അന്വേഷണ സംഘം വ്യക്തമാക്കി.
ഷഹാനയുമായുള്ള ബന്ധം ചോദ്യം ചെയ്തതിന് നജ്ലയെ റെനീസ് മാനസികമായും ശാരീരികമായും പീഡിപ്പിക്കുകയും ഉപദ്രവിക്കുകയും ചെയ്തിരുന്നു. നജ്ലയുടെ ബന്ധുക്കളുമായി ബന്ധം പുലര്ത്താന് റെനീസ് അനുവദിച്ചിരുന്നില്ല. നജ്ലയുടെ അമ്മയുമായി ഫോണില് സംസാരിക്കാന് മാത്രമായിരുന്നു അനുവാദം. 10 വര്ഷം മുന്പായിരുന്നു ആലപ്പുഴ വട്ടപ്പിള്ളി സ്വദേശിയായ റെനീസുമായുള്ള നജ്ലയുടെ വിവാഹം.