രാജ്യത്തിന്റെ നട്ടെല്ലൊടിക്കുന്ന കിരാതമായ കാര്‍ഷിക നിയമങ്ങള്‍ പിന്‍വലിക്കാനുള്ള ബിജെപി സര്‍ക്കാര്‍ നിര്‍ബന്ധിതമായത് ജനങ്ങളുടെ വിജയമാണെന്ന് എസ്ഡിപിഐ സംസ്ഥാന പ്രസിഡന്റ് മൂവാറ്റുപുഴ അഷ്റഫ് മൗലവി. ജനകീയ പോരാട്ടത്തിനു മുമ്പില്‍ ഏതൊരു മര്‍ദ്ദക ഭരണ കൂടത്തിനും മുട്ടുമടക്കേണ്ടി വരുമെന്ന തിരിച്ചറിവു കൂടി നല്‍കുന്നതാണ് ഈ നടപടിയെന്നും അദ്ദേഹം പറഞ്ഞു.
അതിശൈത്യത്തെയും കൊവിഡ് മഹാമാരിയെയും അവഗണിച്ച് സമരത്തിന് നേതൃത്വം നല്‍കിയ കര്‍ഷക സംഘടനകളെയും അവരോടൊപ്പം ഐക്യദാര്‍ഢ്യവുമായി സമരരംഗത്ത് ഉറച്ചു നിന്ന ജനാധിപത്യ വിശ്വാസികളെയും അഭിനന്ദിക്കുന്നു. രാജ്യത്തിന്റെ അതിജീവനത്തിനായുള്ള പോരാട്ടത്തിനിടെ ജീവന്‍ ത്യജിക്കേണ്ടി വന്ന 675 കര്‍ഷകരെ അനുസ്മരിക്കുകയാണ്. ഇത് അവരുടെ രക്തസാക്ഷിത്വത്തിന്റെ വിജയം കൂടിയാണെന്ന് അഷ്റഫ് മൗലവി പറഞ്ഞു.
അതേസമയം അടുത്തു വരാനിരിക്കുന്ന സംസ്ഥാന നിയമസഭാ തിരഞ്ഞെടുപ്പുകളോടനുബന്ധിച്ച് ജനങ്ങളുടെ കണ്ണില്‍ പൊടിയിടാനുള്ള അടവുനയമാണോ മോഡി സര്‍ക്കാരിന്റെ തീരുമാനം എന്ന ആശങ്കയുമുണ്ട്. 11 തവണ കര്‍ഷകരുമായി ചര്‍ച്ച നടത്തിയിട്ടും യാതൊരു വിട്ടുവീഴ്ചയ്ക്കും തയ്യാറായില്ലെന്നു മാത്രമല്ല, കര്‍ഷകര്‍ക്കിടയിലേക്ക് വാഹനം ഇടിച്ചു കയറ്റിയും സായുധ പോലീസിനെ കയറൂരി വിട്ടും സമരത്തെ ചോരയില്‍ മുക്കിക്കൊല്ലാനായിരുന്നു ബിജെപി സര്‍ക്കാര്‍ ശ്രമിച്ചിരുന്നത്.
കഴിഞ്ഞ ഉപതിരഞ്ഞെടുപ്പുകളില്‍ ബിജെപിക്കേറ്റ തിരിച്ചടിയും പ്രക്ഷോഭങ്ങള്‍ക്കു മുമ്പില്‍ കീഴടങ്ങാന്‍ കാരണമായെന്നും മൂവാറ്റുപുഴ അഷ്റഫ് മൗലവി വ്യക്തമാക്കി.
