തിരുവനന്തപുരം: മുഖ്യമന്ത്രിക്കെതിരെ വിമാനത്തിനുള്ളില്‍ പ്രതിഷേധം നടത്താനുള്ള ചര്‍ച്ച നടന്ന വാട്സ്ആപ് ഗ്രൂപ്പിന് പൂട്ടിട്ട് നേതൃത്വം. ഇനി ഷാഫിക്കും ജോബിനും മാത്രമേ സന്ദേശങ്ങള്‍ അയക്കാന്‍ കഴിയൂ. ചോര്‍ച്ചക്ക് പിന്നില്‍ സംസ്ഥാനത്തെ ഗ്രൂപ്പ് പോരുതന്നെയെന്ന് വ്യക്തമായി. ഇതോടെ ചാറ്റുകള്‍ ചോര്‍ന്ന സംഭവത്തില്‍ യൂത്ത് കോണ്‍ഗ്രസ് അന്വേഷണം ആരംഭിച്ചു. ചാറ്റുകള്‍ പുറത്തായി ചര്‍ച്ചയായതിന് പിന്നാലെ വാട്സ്ആപ് ഗ്രൂപ്പിലെ ചര്‍ച്ചകള്‍ക്ക് നിയന്ത്രണം ഏര്‍പ്പെടുത്തിയിരുന്നു. അഡ്മിന് മാത്രം സന്ദേശം അയക്കാവുന്ന രീതിയിലാണ് ഇപ്പോള്‍ യൂത്ത് കോണ്‍ഗ്രസ് ഔദ്യോഗിക ഗ്രൂപ്പ്.
പ്രതിഷേധം നടന്നത് സംസ്ഥാന നേതൃത്വത്തിന്റെ അറിവോടെയല്ലെന്നാണ് സംസ്ഥാന അദ്ധ്യക്ഷന്‍ ഷാഫി പറമ്പില്‍ പറഞ്ഞിരുന്നത്. ഈ വാദത്തെ തള്ളുന്നതാണ് പുറത്തായ വാട്സ്ആപ് ചാറ്റുകള്‍. പൊലീസ് നടപടിയെ സംഘടന ഭയപ്പെടുന്നില്ലെങ്കില്‍ ഔദ്യോഗിക ഗ്രൂപ്പിലെ ചര്‍ച്ച പുറത്തായതിനെ ഗൗരവത്തിലെടുക്കുന്നുണ്ട്. ഇതിനെ തുടര്‍ന്നാണ് വാട്സ്ആപ് ഗ്രൂപ്പിന് നിയന്ത്രണമേര്‍പ്പെടുത്തിയത്. ഗ്രൂപ്പ് അഡ്മിനുകളായ ഷാഫി പറമ്പിലിനും ജനറല്‍ സെക്രട്ടറി ജോബിന്‍ ജോസഫിനും മാത്രമേ നിലവില്‍ സന്ദേശമയക്കാനാവൂ.
