തിരുവനന്തപുരം: സാമ്പത്തിക വർഷത്തെ പുതുക്കിയ ബജറ്റിൽ സിൽവർ ഇക്കോണമിക്കും മാരിടൈം വികസനത്തിനും ഊന്നൽ നൽകുന്ന പ്രഖ്യാപനങ്ങളുമായി മുഖ്യമന്ത്രി വി.ഡി. സതീശൻ. യുവാക്കൾ വിദേശത്തേക്ക് കുടിയേറുന്ന സാഹചര്യത്തിൽ സംസ്ഥാനത്തെ ജനസംഖ്യാ ഘടനയിലെ മാറ്റങ്ങളെക്കുറിച്ച് സമഗ്ര പഠനം നടത്തുമെന്ന് മുഖ്യമന്ത്രി നിയമസഭയിൽ വ്യക്തമാക്കി.
സിൽവർ ഇക്കോണമി: വയോജന ക്ഷേമത്തിന് മുൻഗണന
വയോജനങ്ങളുടെ കഴിവുകൾ പരമാവധി പ്രയോജനപ്പെടുത്തി ഒരു സിൽവർ ഇക്കോണമി രൂപീകരിക്കാനാണ് സർക്കാർ ലക്ഷ്യമിടുന്നത്. വയോജന വകുപ്പിന്റെ പ്രവർത്തനങ്ങൾക്കായി 10 കോടി രൂപ വകയിരുത്തി. കെയർ ഗിവർ പദ്ധതി വഴി ആറുമാസത്തെ അന്താരാഷ്ട്ര നിലവാരമുള്ള സർട്ടിഫിക്കറ്റ് കോഴ്സുകൾ ആരംഭിക്കും. വയോജന പാർക്കുകൾ, പകൽ വീടുകൾ, ഫിറ്റ്നസ് സെന്ററുകൾ എന്നിവയും സജ്ജമാക്കും.
മിഷൻ സമുദ്ര: 400 കോടിയുടെ മാരിടൈം പദ്ധതി
കേരളത്തെ ആഗോള മാരിടൈം ഭൂപടത്തിൽ ശക്തിയാക്കി മാറ്റാൻ മിഷൻ സമുദ്ര പദ്ധതിക്ക് 400 കോടി രൂപ ബജറ്റിൽ വകയിരുത്തി. 600 കിലോമീറ്റർ തീരദേശം, രണ്ട് അന്താരാഷ്ട്ര തുറമുഖങ്ങൾ, ഒരു കണ്ടെയ്നർ ട്രാൻഷിപ്പ്മെന്റ് ടെർമിനൽ, 17 നോൺ മേജർ തുറമുഖങ്ങൾ എന്നിവയുടെ സാധ്യതകൾ സംയോജിപ്പിച്ചാണ് പദ്ധതി. വിഴിഞ്ഞത്തെ ഗ്രീൻ ബങ്കറിംഗ് സേവനം നൽകുന്ന ഇന്ത്യയിലെ ആദ്യ തുറമുഖമാക്കും. കപ്പൽ നിർമ്മാണ കേന്ദ്രവും സ്ഥാപിക്കും. തൊഴിൽ അവസരങ്ങളിൽ തീരദേശവാസികൾക്ക് സംവരണം നൽകും.
വിഴിഞ്ഞം വികസനം വേഗത്തിലാക്കും
വിഴിഞ്ഞം ട്രാൻഷിപ്പ്മെന്റ് ടെർമിനലിനെ രാജ്യത്തിന്റെ വിവിധ ഭാഗങ്ങളുമായി ബന്ധിപ്പിക്കുന്ന ബാലരാമപുരം-വിഴിഞ്ഞം ഭൂഗർഭ റെയിൽ, വിഴിഞ്ഞം-നാവായിക്കുളം ഔട്ടർ റിംഗ് റോഡ് എന്നിവയുടെ നിർമ്മാണം വേഗത്തിലാക്കും. വിഴിഞ്ഞം, കൊച്ചി തുറമുഖങ്ങൾക്ക് ചുറ്റും നിർമ്മാണ മേഖലകളും ഡ്രൈ പോർട്ടുകളും സ്റ്റഫിംഗ് സെന്ററുകളും ആരംഭിക്കും.
ആരോഗ്യ മേഖലയ്ക്ക് കുതിപ്പ്: 100 കോടിയുടെ ലൈഫ് സയൻസ് സിറ്റി
കേരള ഹെൽത്ത് ആൻഡ് ലൈഫ് സയൻസ് സിറ്റി പദ്ധതിക്കായി 100 കോടി രൂപ മാറ്റിവെച്ചു. മൾട്ടി സ്പെഷ്യാലിറ്റി ആശുപത്രികൾ, മെഡിക്കൽ കോളേജുകൾ, ഗവേഷണ ലാബുകൾ, ഡയഗ്നോസ്റ്റിക് കേന്ദ്രങ്ങൾ എന്നിവ ഉൾപ്പെടുന്നതാണ് പദ്ധതി. റിസർച്ച് പാർക്കിനായി 60 കോടി രൂപയും വകയിരുത്തി. ഐഐടി മദ്രാസ് മാതൃകയിൽ ഗവേഷണ സംവിധാനങ്ങളെ വ്യവസായങ്ങളുമായി സംയോജിപ്പിക്കും.
ഉമ്മൻചാണ്ടി ആരോഗ്യ ഇൻഷുറൻസ്: 25 ലക്ഷത്തിന്റെ സൗജന്യ പരിരക്ഷ
എല്ലാ കുടുംബങ്ങൾക്കും 25 ലക്ഷം രൂപയുടെ സൗജന്യ ആരോഗ്യ ഇൻഷുറൻസ് നൽകുന്ന ഉമ്മൻചാണ്ടി ആരോഗ്യ ഇൻഷുറൻസ് പദ്ധതി പ്രഖ്യാപിച്ചു. ഇന്ദിര ഗ്യാരണ്ടിയുടെ ഭാഗമായ പദ്ധതിയുടെ പ്രാരംഭ ചെലവുകൾക്കായി 10 കോടി രൂപ വകയിരുത്തി.
നിക്ഷേപ സൗഹൃദം: ഇൻവെസ്റ്റ് കേരളം സെൽ
നിക്ഷേപ സൗഹൃദ അന്തരീക്ഷം ഒരുക്കാൻ ഡാറ്റ അധിഷ്ഠിത ഇൻവെസ്റ്റ് കേരളം സെൽ രൂപീകരിക്കും. എംഎസ്എംഇ മേഖലയുടെ വളർച്ചയ്ക്കായി 100 കോടി രൂപ ചെലവിൽ കേരള എംഎസ്എംഇ ഗ്രോത്ത് സ്കീം നടപ്പിലാക്കും. സാമ്പത്തിക ബുദ്ധിമുട്ട് നേരിടുന്നവർക്കായി വൺ കേരള കരുതൽ മിഷൻ എന്ന സാങ്കേതിക പ്ലാറ്റ്ഫോമും ആരംഭിക്കും.
മറ്റ് പ്രധാന പ്രഖ്യാപനങ്ങൾ
1. പാചകകല ഇൻസ്റ്റിറ്റ്യൂട്ട് സ്ഥാപിക്കാൻ 2 കോടി.
2. കേരള ഡിസാസ്റ്റർ റെസിലിയൻസ് സെന്ററിന് 15 കോടി.
3. പിപിപി മോഡലിൽ കേരള സ്കൂൾ ഓഫ് പ്ലാനിംഗ് ആർക്കിടെക്ചർ ആൻഡ് ഡിസൈൻ സ്ഥാപിക്കാൻ 2 കോടി.
4. പ്രവാസി ഇൻവെസ്റ്റ്മെന്റ് ട്രസ്റ്റ് ഫണ്ട് രൂപീകരിക്കും.
5. കൊച്ചി-ആലുവ-പെരുമ്പാവൂർ ബെൽറ്റിൽ ഗ്ലോബൽ ഫർണിച്ചർ ഹബ്, കൊച്ചി-തൃശ്ശൂർ ബെൽറ്റിൽ ഗ്ലോബൽ ഗോൾഡ് ഹബ് എന്നിവ സ്ഥാപിക്കും.
വയോജന ക്ഷേമം, ആരോഗ്യം, മാരിടൈം, വ്യവസായം എന്നീ മേഖലകൾക്ക് മുൻഗണന നൽകിയാണ് വി.ഡി. സതീശൻ സർക്കാരിന്റെ കന്നി ബജറ്റ് അവതരിപ്പിച്ചത്. ….. continue
