ചെന്നൈ: വരാനിരിക്കുന്ന ലോക്‌സഭാ തെരഞ്ഞെടുപ്പില്‍ ബിജെപിയെ പരാജയപ്പെടുത്താന്‍ ഒരുമിച്ച് നില്‍ക്കണമെന്ന് തമിഴ്‌നാട് മുഖ്യമന്ത്രി എം കെ സ്റ്റാലിന്‍. 2024 അവരെ പാഠം പഠിപ്പിക്കും. രാജ്യത്ത് നിരപരാധികളായ മുസ്ലിംകളെ പത്തും ഇരുപതും കൊല്ലം വിചാരണയില്ലാതെ തടവിലിടുന്ന കേന്ദ്ര സര്‍ക്കാര്‍ നടപടിക്കെതിരെ നിയമം പാസാക്കിയിട്ടുണ്ട്. എന്നാല്‍ അതിന് ഇതുവരെ അനുമതി ലഭിച്ചിട്ടില്ല. മതം കൊണ്ട് രാജ്യത്ത് വെറുപ്പ് പടര്‍ത്താന്‍ ചിലര്‍ ശ്രമിക്കുന്നുണ്ട്. ദ്രാവിഡ ഭരണമാതൃക രാജ്യം മുഴുവന്‍ വ്യാപിപ്പിക്കണമെന്നും അദ്ദേഹം ആവശ്യപ്പെട്ടു. ചെന്നൈ വൈ എം സി എ ഗ്രൗണ്ടില്‍ മുസ്ലിം ലീ?ഗ് പ്ലാറ്റിനം ജൂബിലി സമ്മേളനത്തില്‍ മുഖ്യാതിഥിയായി സംസാരിക്കുകയായിരുന്നു എം കെ സ്റ്റാലിന്‍.
അണ്ണാദുരൈയുെം കരുണാനിധിയും ഇസ്ലാമിനെ പഠിച്ച് ആണ് ദ്രാവിഡ രാഷ്ട്രീയം പയറ്റിയത്. കലൈഞ്ജറെയും അണ്ണാ അവര്‍കളെയും വളര്‍ത്തിയത് ഇസ്ലാമിക സമൂഹമാണ്. ചെറുപ്പത്തില്‍ മുസ്ലിംകള്‍ മികച്ച പിന്തുണയും സഹകരണവും നല്‍കിയിട്ടുണ്ടെന്നും അദ്ദേഹം കൂട്ടിച്ചേര്‍ത്തു. മുസ്ലിംകളും ദ്രാവിഡ രാഷ്ട്രീയവും തമ്മിലുളള ബന്ധം തകര്‍ക്കാന്‍ ആര്‍ക്കുമാകില്ല. ഒരേ മതം നടപ്പാക്കാന്‍ ശ്രമിക്കുന്നവര്‍ നാടിന്റെ ശത്രുക്കളാണ്. ഇന്ത്യയുടെ വൈവിധ്യവും സാമൂഹിക നീതിയും തകര്‍ക്കാനാണ് കേന്ദ്ര സര്‍ക്കാര്‍ ശ്രമിക്കുന്നതെന്നും അദ്ദേഹം വിമര്‍ശിച്ചു.
മുസ്ലിം ലീഗ് ഒരു സമ്മേളനത്തിന് വിളിച്ചാല്‍ തനിക്ക് വരാതിരിക്കാനാകില്ല. ദ്രാവിഡ മുന്നേറ്റ കഴകത്തിന്റെ ശക്തിയായി ഖാഇദെ മില്ലത്തിന്റെ കാലം മുതലേ മുസ്ലിം ലീഗുണ്ടായിരുന്നു. ഖാഇദെ മില്ലത്ത് ആവശ്യപ്പെട്ട കാര്യങ്ങളെല്ലാം കലൈഞ്ജര്‍ മുസ്ലിം സമുദായത്തിന് വേണ്ടി നിറവേറ്റി. സമ്മേളനത്തില്‍ അവതരിപ്പിച്ച പ്രമേയത്തിലെ കാര്യങ്ങള്‍ ആവുന്നതും ചെയ്യാന്‍ ശ്രമിക്കും. ഈ തെരഞ്ഞെടുപ്പ് വിജയിക്കാന്‍ നാം ഒരുമിച്ച് നില്‍ക്കണം. ദ്രാവിഡ ഭരണ മാതൃക രാജ്യം മുഴുവന്‍ വ്യാപിപ്പിക്കണം,’ എം കെ സ്റ്റാലിന്‍ പറഞ്ഞു. നവംബറില്‍ ലീഗ് ഡല്‍ഹിയില്‍ വിളിച്ചുചേര്‍ക്കുന്ന മഹാസമ്മേളനത്തിലും പങ്കെടുക്കും. നിങ്ങളില്‍ ഒരുവനായാണ് ഞാന്‍ വന്നത്. ഈ പരിപാടിയിലേക്ക് ക്ഷണിച്ച നേതാക്കള്‍ക്ക് നന്ദിയുണ്ടെന്നും സ്റ്റാലിന്‍ കൂട്ടിച്ചേര്‍ത്തു.
