തിരുവനന്തപുരം: മുതിര്‍ന്ന മാധ്യമപ്രവര്‍ത്തകന്‍ ബി സി ജോജോ(65) അന്തരിച്ചു. കേരള കൗമുദി എക്സിക്യൂട്ടീവ് എഡിറ്ററായിരുന്നു. തിരുവനന്തപുരം കിംസ് ആശുപത്രിയില്‍ ചികിത്സയിലായിരിക്കെ ഇന്ന് രാവിലെയായിരുന്നു അന്ത്യം. ഏറെ ചര്‍ച്ചയായ പാമോലിന്‍ അഴിമതി വാര്‍ത്ത പുറത്തുകൊണ്ടുവന്നത് ബി സി ജോജോയായിരുന്നു. മുല്ലപ്പെരിയാര്‍ കരാറിന് നിയമസാധുതയില്ലെന്ന് ആദ്യം റിപ്പോര്‍ട്ട് ചെയ്തതും അദ്ദേഹമായിരുന്നു. മുല്ലപ്പെരിയാറിലേക്ക് വീണ്ടും എന്ന പുസ്തകം എഴുതിയിട്ടുണ്ട്.
പേട്ട എസ് എന്‍ നഗറിലെ വസതിയായ ഉത്രാടത്തില്‍ നിന്ന് ഭൗതിക ശരീരം ബുധനാഴ്ച രാവിലെ 10ന് തിരുവനന്തപുരം പ്രസ്‌ക്ലബ്ബില്‍ പൊതുദര്‍ശനത്തിന് വയ്ക്കും. 11 ന് അവിടെ നിന്ന് കുടുംബ വീടായ കൊല്ലം മയ്യനാട് സുമതി ഭവനിലേക്ക് കൊണ്ടുപോവും. സംസ്‌കാരം വൈകുന്നേരം 4 ന് അവിടെ നടക്കും.
1958ല്‍ കൊല്ലം മയ്യനാട്ട് ആയിരുന്നു ജനനം. ഡി ബാലചന്ദ്രനും പി ലീലാവതിയുമാണ്
മാതാപിതാക്കള്‍ . മയ്യനാട് ഹൈസ്‌കൂള്‍, കൊല്ലം ശ്രീനാരായണ കോളേജ്, തിരുവനന്തപുരം യൂണിവേഴ്സിറ്റി കോളേജ്, ന്യൂഡല്‍ഹിയിലെ ഇന്ത്യന്‍ ഇന്‍സ്റ്റിറ്റ്യൂട്ട് ഒഫ് മാസ് കമ്യൂണിക്കേഷന്‍ എന്നിവിടങ്ങളിലായിരുന്നു വിദ്യാഭ്യാസം. മെയിന്‍ സ്ട്രീം, കാരവന്‍ എന്നിവിടങ്ങളില്‍ പ്രവര്‍ത്തിച്ചശേഷം 85 ല്‍ കേരളകൗമുദിയില്‍ ചേര്‍ന്നു. 2003 മുതല്‍ 2012 വരെ എക്സിക്യൂട്ടീവ് എഡിറ്ററായിരുന്നു. തുടര്‍ന്ന് വിന്‍സോഫ്റ്റ് ഡിജിറ്റല്‍ മീഡിയ പ്രൈവറ്റ് ലിമിറ്റഡിന്റെ മാനേജിംഗ് ഡയറക്ടറും ഇന്ത്യാ പോസ്റ്റ് ലൈവിന്റെ സി ഇ ഒയുമായിരുന്നു.
ഭാര്യ: ഡോ. ടി കെ സുഷമ (വര്‍ക്കല എസ് എന്‍ കോളെജ് ഹിന്ദി വിഭാഗം മുന്‍ മേധാവി), മക്കള്‍: ജെ.എസ് ദീപു ( സീനിയര്‍ അസോസിയറ്റ്, വാഡിയ ഗാന്ധി അഡ്വക്കേറ്റ്‌സ് ആന്റ് സോളിസിറ്റേഴ്‌സ്, മുംബയ്), ഡോ. ജെ.എസ് സുമി (അസിസ്റ്റന്റ് പ്രൊഫസര്‍, ഗോകുലം മെഡിക്കല്‍ കോളെജ്, വെഞ്ഞാറമൂട്) മരുമക്കള്‍: ഡോ. സുരി രാജന്‍ പാലയ്ക്കല്‍ ( നെയ്യാര്‍ മെഡിസിറ്റി ), അനീഷാകുമാര്‍ (പ്രിന്‍സിപ്പല്‍ അസോസിയറ്റ്, ഡി എസ് കെ അഡ്വക്കേറ്റ് സ് ആന്റ് സോളിസിറ്റേഴ്‌സ്, മുംബയ്)
മുതിര്‍ന്ന മാധ്യമ പ്രവര്‍ത്തകനും അന്വേഷണാത്മക പത്രപ്രവര്‍ത്തകനുമായ ബി.സി. ജോജോയുടെ നിര്യാണത്തില്‍ ഗവര്‍ണര്‍ ആരിഫ് മുഹമ്മദ് ഖാന്‍ അനുശോചിച്ചു.
