രണ്ടില ചിഹ്നത്തില്‍ ജോസ് കെ. മാണി വിഭാഗത്തിന് മത്സരിക്കാമന്ന് സുപ്രീംകോടതി. പി.ജെ ജോസഫിന്റെ ഹര്‍ജി സുപ്രീംകോടതി തള്ളി. ചിഹ്നവും പാര്‍ട്ടിയുടെ ഔദ്യോഗിക അംഗീകാരവും ജോസ് കെ. മാണിക്ക് അനുവദിച്ച ഹൈക്കോടതി വിധിക്കെതിരെയാണ് പി.ജെ ജോസഫ് സുപ്രീം കോടതിയെ സമീപിച്ചത്. ചിഹ്നം സംബന്ധിച്ച തര്‍ക്കം ഉണ്ടായതിനെ തുടര്‍ന്ന് ജോസഫ് വിഭാഗവും ജോസ് കെ. മാണിക്കൊപ്പം ഉള്ളവരും ചിഹ്നവും പാര്‍ട്ടിയുടെ ഔദ്യോഗിക അംഗീകാരവും ആവശ്യപ്പെട്ടു തിരഞ്ഞെടുപ്പ് കമ്മീഷനെ സമീപിച്ചിരുന്നു. കമ്മിഷന്‍ ജോസ് കെ. മാണിക്ക് അനുകൂലമായ തീരുമാനം എടുത്തിരുന്നു.
തുടര്‍ന്ന് പി.ജെ ജോസഫ് ഹൈക്കോടതിയെ സമീപിച്ചെങ്കിലും അനുകൂലവിധി ഉണ്ടായില്ല. പിന്നീടാണ് സുപ്രീം കോടതിയില്‍ ഹര്‍ജി നല്‍കിയത്. കേരളാ കോണ്‍ഗ്രസ് എം ചെയര്‍മാനായിരുന്ന കെ. എം മാണി മരിച്ചതോടെയാണ് പാര്‍ട്ടിയില്‍ പ്രശ്നങ്ങള്‍ ഉടലെടുത്തത്. വൈസ് ചെയര്‍മാനായിരുന്ന പി.ജെ ജോസഫ് പാര്‍ട്ടി ചെയര്‍മാനായി സ്വയം പ്രഖ്യാപിച്ചു. ജോസ് കെ. മാണിയും അദ്ദേഹത്തിനൊപ്പം ഉള്ളവരും ഇതിനെ എതിര്‍ത്തു.
കെ.എം മാണി മരിച്ച ശേഷം നടന്ന പാലാ ഉപതിരഞ്ഞെടുപ്പില്‍ കേരളാ കോണ്‍ഗ്രസ് മാണി വിഭാഗം സ്ഥാനാര്‍ഥിക്ക് മത്സരിക്കാന്‍ പി.ജെ ജോസഫ് രണ്ടില ചിഹ്നം നല്‍കിയില്ല. അങ്ങനെയാണ് രണ്ട് കൂട്ടരും നിയമ നടപടികള്‍ ആരംഭിച്ചത്. കേരളാ കോണ്‍ഗ്രസ് പാര്‍ട്ടിയും അതിന്റെ പൈതൃകവും കേരളാ കോണ്‍ഗ്രസ് ജോസ് കെ.മാണി വിഭാഗത്തിന് അര്‍ഹതപ്പെട്ടതാണെന്ന വാദം സുപ്രീംകോടതി അംഗീകരിച്ചെന്ന് റോഷി അഗസ്റ്റിന്‍ എം.എല്‍.എ പ്രതികരിച്ചു. ആദ്യം തിരഞ്ഞെടുപ്പ് കമ്മീഷനും പിന്നീട് ഹൈക്കോടതിയും ഇക്കാര്യം വ്യക്തമാക്കിയതാണെന്നും അദ്ദേഹം പറഞ്ഞു.
