ജവഹർലാൽ നെഹ്റുവിന്റെ സ്മരണയിൽ ജവഹർ കൾച്ചറൽ സൊസൈറ്റി ഏർപ്പെടുത്തിയ ജവഹർ പുരസ്കാരങ്ങൾ പ്രഖ്യാപിച്ചു. പൊതുസേവന രംഗത്തും നിയമനിർമ്മാണ സഭയിലും മാധ്യമ രംഗത്തും വ്യക്തിമുദ്ര പതിപ്പിച്ചവരെയാണ് ഇത്തവണ ജൂറി തിരഞ്ഞെടുത്തത്.
രാഷ്ട്രീയ രംഗത്തെ രണ്ട് തലമുറകൾക്ക് ആദരം
മികച്ച സാമൂഹിക പ്രവർത്തകനുള്ള പുരസ്കാരം മുൻമന്ത്രിയും കേരള കോൺഗ്രസ് ചെയർമാനുമായ പി ജെ ജോസഫിന്. അഞ്ച് പതിറ്റാണ്ടിലേറെ നീണ്ട രാഷ്ട്രീയ ജീവിതത്തിൽ കർഷക പ്രശ്നങ്ങളിലും ജനകീയ വിഷയങ്ങളിലും നടത്തിയ ഇടപെടലുകൾക്കാണ് അംഗീകാരം.
മികച്ച നിയമസഭാ സാമാജികനുള്ള പുരസ്കാരം പുതുപ്പള്ളി എംഎൽഎ ചാണ്ടി ഉമ്മന്. അന്തരിച്ച മുൻ മുഖ്യമന്ത്രി ഉമ്മൻ ചാണ്ടിയുടെ പാത പിന്തുടർന്ന് നിയമസഭയിലും മണ്ഡലത്തിലും നടത്തുന്ന സജീവ ഇടപെടലുകൾ ജൂറി പ്രത്യേകം എടുത്തുപറഞ്ഞു.
മാധ്യമരംഗം: ക്യാമറയ്ക്ക് പിന്നിലും മുന്നിലും തിളങ്ങിയവർ
വാർത്തയ്ക്ക് പിന്നാലെ ഓടുന്നവരുടെ അധ്വാനത്തിന് അംഗീകാരവുമായാണ് ഇത്തവണത്തെ മാധ്യമ പുരസ്കാരങ്ങൾ. ഏഷ്യാനെറ്റ് കോട്ടയം ബ്യൂറോ ചീഫ് ബിദിൻ എം ദാസ്, മനോരമ ന്യൂസ് സീനിയർ കറസ്പോണ്ടന്റ് ബിനോയ് രാജൻ, റിപ്പോർട്ടർ ടിവി ചീഫ് റിപ്പോർട്ടർ മഹേഷ് മഹിപാൽ, 24 ന്യൂസ് കോട്ടയം ബ്യൂറോ ചീഫ് ടോബി ജോൺസൺ, ബിഗ് ടിവി കൊച്ചി ബ്യൂറോ ചീഫ് വൈശാഖ് കോമാട്ടിൽ, കൈരളി ടിവി ചീഫ് ബ്രോഡ്കാസ്റ്റ് ജേർണലിസ്റ്റ് സനോജ് സുരേന്ദ്രൻ, ന്യൂസ് മലയാളം 24×7 സബ് എഡിറ്റർ ബി ശ്രീരാജ്, ന്യൂസ് 18 കേരള സ്പെഷ്യൽ കറസ്പോണ്ടന്റ് ജി ശ്രീജിത്ത്, മാതൃഭൂമി ന്യൂസ് സീനിയർ ക്യാമറാമാൻ സുധീഷ് എം എസ്, മീഡിയവൺ പത്തനംതിട്ട ബ്രോഡ്കാസ്റ്റ് ജേർണലിസ്റ്റ് വിഷ്ണു പുതുശ്ശേരി, ജനം ടിവി സീനിയർ റിപ്പോർട്ടർ മിഥുൻ അയ്യപ്പൻ, മംഗളം കൊച്ചി ബ്യൂറോ ചീഫ് ബൈജു ഭാസി എന്നിവരാണ് പുരസ്കാര ജേതാക്കൾ.
മെയ് 27, നാഗമ്പടം സാക്ഷി
2026 മെയ് 27 ബുധനാഴ്ച വൈകുന്നേരം 4.30ന് കോട്ടയം നാഗമ്പടം ഹോട്ടൽ സീസർ പാലസിലാണ് പുരസ്കാര സമർപ്പണം. കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, ജലസേചന വകുപ്പ് മന്ത്രി മോൻസ് ജോസഫ്, ചീഫ് വിപ്പ് അപു ജോൺ ജോസഫ് എന്നിവർ ചേർന്ന് പുരസ്കാരങ്ങൾ സമ്മാനിക്കും. ഫ്രാൻസിസ് ജോർജ് എംപി, എംഎൽഎമാരായ നാട്ടകം സുരേഷ്, വിനു ജോബ് കുഴിമണ്ണിൽ, ജില്ലാ പഞ്ചായത്ത് പ്രസിഡന്റ് ജോഷി ഫിലിപ്പ്, നഗരസഭ ചെയർമാൻ എം പി സന്തോഷ് കുമാർ, ജോസഫ് വാഴക്കൻ, ജയ്സൺ ജോസ്ഥ് തുടങ്ങിയവർ ചടങ്ങിൽ പങ്കെടുക്കും.
മുതിർന്ന മാധ്യമ പ്രവർത്തകൻ പി.എം. ഹുസൈൻ ജിഫ്രി തങ്ങൾ ചെയർമാനായ ജൂറിയാണ് ജേതാക്കളെ തിരഞ്ഞെടുത്തത്. സെയ്ദ് സബർമതി, മുഹമ്മദ് ആസിഫ്, അനുജ എസ്, ദുനുംസ് പേഴുംമൂട് എന്നിവരായിരുന്നു മറ്റ് അംഗങ്ങൾ.
12 -ാം വയസ്സിലേക്ക്
തിരുവനന്തപുരം കേന്ദ്രമായി കഴിഞ്ഞ 12 വർഷമായി കലാ-സാംസ്കാരിക-ജീവകാരുണ്യ മേഖലകളിൽ പ്രവർത്തിക്കുന്ന സംഘടനയാണ് ജവഹർലാൽ നെഹ്റു കൾച്ചറൽ സൊസൈറ്റി. എല്ലാ വർഷവും നെഹ്റുവിന്റെ ചരമദിനത്തിൽ സാമൂഹ്യ-കലാ-സാംസ്കാരിക-ജീവകാരുണ്യ-മാധ്യമ-വിദ്യാഭ്യാസ മേഖലകളിൽ മികവ് തെളിയിച്ചവരെയാണ് ജവഹർ പുരസ്കാരം നൽകി ആദരിക്കുന്നതെന്ന് പ്രസിഡന്റ് പൂവച്ചൽ സുധീർ അറിയിച്ചു.
ഒരു പുരസ്കാരം വെറും അംഗീകാരമല്ല, ഉത്തരവാദിത്തത്തിന്റെ ഓർമ്മപ്പെടുത്തൽ കൂടിയാണ്. നെഹ്റുവിന്റെ ജനാധിപത്യ ബോധവും സേവന തൽപ്പരതയും പുതിയ കാലത്തിലേക്ക് പകർത്തുന്നവരെയാണ് ജവഹർ പുരസ്കാരം തേടിയെത്തുന്നത്.
