മൂവാറ്റുപുഴ: വിദ്യാര്‍ത്ഥികള്‍ക്ക് അവധിക്കാലം അറിവിന്റെയും കരുതലിന്റെയും സാമൂഹ്യ പ്രതിബദ്ധതയുടെയും ഭാഗമാക്കി മാറ്റാന്‍ പഠന ക്യാമ്പുമായി മൂവാറ്റുപുഴ ജനമൈത്രി പോലീസ്. പേഴയ്ക്കാപ്പിള്ളി ഗവ.ഹയര്‍ സെക്കന്ററി സ്‌കൂളില്‍ നടന്ന ‘ലെസിയം 2024 ക്യാമ്പ് ‘ ഡി വൈ എസ് പി ഏ.ജെ തോമസ് ഉദ്ഘാടനം ചെയ്തു. ഇന്‍സ്‌പെക്ടര്‍ ബി.കെ. അരുണ്‍ അധ്യക്ഷത വഹിച്ചു. പി.ആര്‍.ഒ അസി. സബ് ഇന്‍സ്‌പെക്ടര്‍ സിബി അച്ചുതന്‍ വിഷയം അവതരിപ്പിച്ചു. പ്രിന്‍സിപ്പല്‍ ടി.ബി സന്തോഷ്, ഹെഡ്മിസ്ട്രസ്സ് ഷൈല കുമാരി, പി ടി എ പ്രസിഡന്റ് ഹസീന ആരിഫ്, സബ് ഇന്‍സ്‌പെക്ടര്‍മാരായ വിഷ്ണു രാജു , എം.എം ഉബൈസ് തുടങ്ങിയവര്‍ പ്രസംഗിച്ചു.
എന്റെ ശരീരം എന്റെ അവകാശം എന്ന വിഷയത്തില്‍ സബ് ഇന്‍സ്‌പെക്ടര്‍ ശാന്തി.കെ ബാബു. സ്‌ട്രെസ് ആന്റ് ആര്‍ട് എന്ന വിഷയത്തില്‍ ഡോ. ജാക്‌സണ്‍ തോട്ടുങ്കല്‍, സൈബര്‍ സ്‌പെസില്‍ സൈബര്‍ വിദഗ്ദനും, സീനിയര്‍ സീ പി ഒ യുമായ പി.എം തല്‍ഹത്ത് , മധുരം മലയാളത്തില്‍ എന്‍.സി വിജയകുമാര്‍ , അപകടങ്ങളില്‍ പതറരുത് എന്ന വിഷയത്തില്‍ ഫയര്‍ ഫോഴ്‌സിലെ സി.എ നിഷാദ്, എം.എന്‍ അയൂബ് എന്നിവര്‍ ക്ലാസെടുത്തു. കാലാവസ്ഥാ വ്യതിയാനത്തെക്കുറിച്ച് ഡോ.ജിജി.കെ.ജോസഫ് പ്രശ്‌നോത്തരി നടത്തി. ഇന്‍സ്‌പെക്ടര്‍ ബി.കെ അരുണ്‍ വിദ്യാര്‍ത്ഥികളും രക്ഷകര്‍ത്താക്കളുമായി സംവദിച്ചു. ക്യാമ്പില്‍ നൂറ്റിയമ്പതിലേറെ വിദ്യാര്‍ത്ഥികള്‍ പങ്കെടുത്തു.
