കീര്ത്തി സുരേഷ് വിവാഹിതയാവുന്നുവെന്ന വാര്ത്ത വ്യാജമെന്ന് നടിയുടെ പിതാവും നിര്മാതാവുമായ സുരേഷ് കുമാര്. കീര്ത്തി സുഹൃത്ത് ഫര്ഹാന് ബിന് ലിഖായത്തും വിവാഹിതരാകുന്നുവെന്നതരത്തില് പുറത്തുവന്ന വാര്ത്തകളോട് പ്രതീകരിക്കുകയായിരുന്നു സുരേഷ്കുമാര്.
ബിജെപി നേതാവ് ശോഭാ സുരേന്ദ്രന്റെ ഫെയ്സ്ബുക്ക് പേജിലൂടെ പുറത്തുവിട്ട വീഡിയോയിലൂടെയാണ് സുരേഷ് കുമാര് ഇക്കാര്യം പറഞ്ഞിരിക്കുന്നത്. കീര്ത്തിക്കൊപ്പം ചിത്രങ്ങളിലുണ്ടായിരുന്ന ഫര്ഹാനെ തനിക്കും അറിയാമെന്നും അവര് നല്ല സുഹൃത്തുക്കളാണെന്നും സുരേഷ് കുമാര് വ്യക്തമാക്കി. ഫര്ഹാനൊപ്പമുള്ള ചിത്രം പ്രചരിച്ചതിന് പിന്നാലെ ഇത് തന്റെ സുഹൃത്താണെന്ന് വെളിപ്പെടുത്തി കീര്ത്തിയും രംഗത്തെത്തിയിരുന്നു.
ഇതൊന്നും ആരും വിശ്വസിക്കരുത്, സുരേഷ്കുമാര് പറയുന്നത്
എന്റെ മകള് കീര്ത്തി സുരേഷിനെ കുറിച്ച് ഒരു വ്യാജ വാര്ത്ത ഓണ്ലൈന് പ്ലാറ്റ്ഫോമുകളില് കിടന്ന് കറങ്ങുന്നുണ്ട്. ഒരു പയ്യനെ ഡേറ്റ് ചെയ്യുന്നു, കല്യാണം കഴിക്കാന് പോകുന്നു, എന്നൊക്കെയുള്ള വാര്ത്ത. അത് വ്യാജമാണ്. ആ പയ്യന് കീര്ത്തിയുടെ നല്ല സുഹൃത്താണ്. അവന്റെ പിറന്നാളിന് കീര്ത്തി പോസ്റ്റ് ചെയ്ത ചിത്രമാണ് ഏതോ ഒരു ഓണ്ലൈന് തമിഴ് മാസിക വാര്ത്തയാക്കി. അതാണ് മറ്റുള്ളവര് ഏറ്റുപിടിച്ചത്.
ഇക്കാര്യം ചോദിച്ച് ആളുകളൊക്കെ എന്നെ വിളിച്ചുകൊണ്ടിരിക്കുകയാണ്. വളരെ കഷ്ടമാണ് ഇത്. മനുഷ്യനെ ജീവിക്കാന് സമ്മതിക്കണം. മര്യാദയ്ക്ക് ജീവിക്കുന്നവരെ കൂടി വിഷമിപ്പിക്കുന്ന കാര്യമാണ് ഇപ്പോള് നടന്നുകൊണ്ടിരിക്കുന്നത്. തികച്ചും അടിസ്ഥാനരഹിതമായ വാര്ത്തയാണിത്. കീര്ത്തിയുടെ വിവാഹം വന്നാല് ആദ്യം അറിയിക്കുന്നത് ഞാനായിരിക്കും. വ്യാജവാര്ത്തകളിട്ട് കഷ്ടപ്പെടുത്തരുത്.
എനിക്കും അറിയാവുന്ന പയ്യനാണ് ഫര്ഹാന്. ഞങ്ങള് ഗള്ഫിലൊക്കെ പോകുമ്പോള് ഞങ്ങളുടെ ഒപ്പം ഷോപ്പിങിനെല്ലാം വരാറുണ്ട്. അവനും കുടുംബമില്ലേ? അവനും മുന്നോട്ട് ജീവിതമില്ലേ? ഇത് വളരെ മോശമായ പ്രവണതയാണ്. എന്റെ പല സുഹൃത്തുക്കളും വിളിച്ച് അന്വേഷിക്കുന്നതു കൊണ്ടാണ് ഞാന് ഇപ്പോള് ഈ വിഡിയോ ഇടുന്നത്. അടിസ്ഥാനരഹിതമായ ഇത്തരം വാര്ത്തകള് പ്രചരിപ്പിക്കരുത്. ഇതൊന്നും ആരും വിശ്വസിക്കരുത്.”-സുരേഷ് കുമാര് പറഞ്ഞു.