ശബരിമലയില് ഈ വര്ഷത്തെ മണ്ഡല മകരവിളക്ക് തീര്ത്ഥാടന കാലത്ത് 351 കോടിയുടെ വരുമാനം കിട്ടിയെന്ന് തിരുവിതാംകൂര് ദേവസ്വം ബോര്ഡ് പ്രസിഡണ്ട് അഡ്വ. എസ്. അനന്തഗോപന്.
20 കോടിയോളം രൂപയുടെ നാണയം കാണിക്കയായി കിട്ടിയെന്നാണ് വിലയിരുത്തല്. നാണയങ്ങള് ഇനിയും എണ്ണിത്തീരാനുണ്ട്. നാണയം എണ്ണാന് നിയോഗിച്ച ജീവനക്കാര്ക്ക് വിശ്രമം നല്കാനാണ് ദേവസ്വം ബോര്ഡിന്റെ തീരുമാനം.
ബാക്കിയുള്ള നാണയങ്ങള് ഫെബ്രുവരി 5 മുതല് എണ്ണും. അരവണ പായസത്തിന് ഉപയോഗിക്കുന്ന ഏലക്കയുടെ ഗുണനിലവാരം സംബന്ധിച്ച് ആക്ഷേപം ഉയര്ന്ന സാഹചര്യത്തില്, ഭാവിയില് ഏലക്ക ഉപയോഗിക്കുന്നത് ഒഴിവാക്കുന്നത് പരിഗണിക്കും.
പമ്പയിലെ ലാബില് ടെസ്റ്റ് ചെയ്താണ് എല്ലാം ഉപയോഗിക്കുന്നത്. നിലവില് ബോര്ഡിനു ഭക്ഷ്യ സുരക്ഷ ലൈസന്സ് ഇല്ലെന്നും ദേവസ്വം ബോര്ഡ് പ്രസിഡന്റ് വ്യക്തമാക്കി. ലൈസന്സ് എടുക്കണമെന്ന നിര്ദ്ദേശം വന്നാല് എടുക്കുമെന്നും അദ്ദേഹം വ്യക്തമാക്കി.
