പാട്ടകരാര് ലംഘിച്ച് കനനം നടത്തിയത് കരാറുകാരനെന്ന് സഭയുടെ വിശദീകരണം
ചെന്നൈ: അനധികൃത മണല്ഖനന കേസില് മലങ്കര കത്തോലിക്കാ സഭ ബിഷപ്പും 5 വൈദീകരും അറസ്റ്റില്. തിരുനെല്വേലിയിലെ ആംബാസമുദ്രത്ത് താമരഭരണി നദിയില് നിന്ന് അനധികൃത മണല്ഖനനം നടത്തിയതിനാണ് അറസ്റ്റ്. പത്തനംതിട്ട അതിരൂപത ബിഷപ്പ് സാമുവല് മാര് ഐറേനിയോസ് ആണ് അറസ്റ്റിലായത്. ബിഷപ്പിനൊപ്പം വികാരി ജനറല് ഫാ. ഷാജി തോമസ്, ഫാ. ജോസ് ചാമക്കാല, ഫാ. ജോര്ജ് സാമുവേല്, ഫാ. ജിജോ ജെയിംസ്, ഫാ. ജോസ് കാലായില് എന്നീ അഞ്ച് വൈദികരെയും തമിഴ്നാട് സി.ബി-സി.ഐ.ഡി. സംഘം അറസ്റ്റ് ചെയ്തു. അറസ്റ്റിനു പിന്നാലെ ബിഷപ്പിനും ഫാ. ജോസ് ചാമക്കാലയ്ക്കും ദേഹാസ്വാസ്ഥ്യമുണ്ടായി. ഇരുവരും നിലവില് തിരുനെല്വേലി മെഡിക്കല് കോളേജ് ആശുപത്രിയില് ചികിത്സയിലാണ്. മറ്റുള്ളവരെ കോടതിയില് ഹാജരാക്കി റിമാന്ഡ് ചെയ്തു.
സഭയുടെ വിശദീകരണം ഇങ്ങനെ .
”തമിഴ്നാട്ടിലെ അംബാസമുദ്രത്ത് പത്തനംതിട്ട രൂപയ്ക്ക് 300 ഏക്കര് സ്ഥലമുണ്ട്. 40 വര്ഷമായി സഭയുടെ അധീനതയിലുള്ള ഈ സ്ഥലം കൃഷി ചെയ്യുന്നതിനായി മാനുവല് ജോര്ജ് എന്ന വ്യക്തിയെ കരാര്പ്രകാരം ചുമതലപ്പെടുത്തിയിരുന്നു. കോവിഡ് കാലമായിരുന്നതിനാല് കഴിഞ്ഞ രണ്ടു വര്ഷമായി രൂപതാ അധികൃതര്ക്ക് ഈ സ്ഥലത്ത് നേരിട്ട് പോകുവാന് കഴിഞ്ഞിരുന്നില്ല. ഈ കാലയളവില് മാനുവല് ജോര്ജ് കരാര് വ്യവസ്ഥ ലംഘിച്ചതായി അറിഞ്ഞതോടെ അദ്ദേഹത്തെ കരാറില് നിന്ന് ഒഴിവാക്കാന് നിയമ നടപടികള് ആരംഭിക്കുകയും ചെയ്തു. വസ്തുവിന്റെ യഥാര്ത്ഥ ഉടമസ്ഥന് എന്ന നിലയില് രൂപതാ അധികാരികളെ ഇത് സംബന്ധിച്ച് അന്വേഷണപരിധിയില് ഉള്പ്പെടുത്തിയിട്ടുണ്ട്. മാനുവല് ജോര്ജിനെതിരെ രൂപത നിയമ നടപടികള് ആരംഭിച്ചിട്ടുണ്ട്.” പത്തനംതിട്ട രൂപത പിആര്ഒ വിശദീകരണ കുറിപ്പില് പറഞ്ഞു.
