രാജ്യത്തെ 15 വര്ഷത്തില് അധികം പഴക്കം വരുന്ന സര്ക്കാര് ഉടമസ്ഥതയിലുള്ള വാഹനങ്ങളെല്ലാം പൊളിക്കാന് കേന്ദ്രസര്ക്കാര് നിര്ദേശം. എല്ലാ സംസ്ഥാനങ്ങള്ക്കും ഇത് സംബന്ധിച്ച നിര്ദേശം നല്കിയിട്ടുണ്ട് എന്ന് കേന്ദ്രമന്ത്രി നിതിന് ഗഡ്ഗരി വ്യക്തമാക്കി. കാറുകളും ട്രക്കുകളും ബസുകളും ഉള്പ്പെടെ എല്ലാ കേന്ദ്ര, സംസ്ഥാന സര്ക്കാര് വാഹനങ്ങളും സ്ക്രാപ്പ് ചെയ്യാനാണ് നിര്ദേശം നല്കിയിട്ടുള്ളത്. 15 വര്ഷം ഉപയോഗിച്ച വാഹനങ്ങളാണ് ഇത്തരത്തില് ഒഴിവാക്കുന്നത്.
നാഗ്പൂരില് അഗ്രോവിഷന്റെ 2022 പതിപ്പ് ഉദ്ഘാടനം ചെയ്ത് സംസാരിക്കവേ ആണ് 15 വര്ഷത്തിലധികം പഴക്കമുള്ള എല്ലാ സര്ക്കാര് വാഹനങ്ങളും സ്ക്രാപ്പ് ചെയ്യാനുള്ള തീരുമാനം കേന്ദ്ര റോഡ് ട്രാന്സ്പോര്ട്ട്, ഹൈവേ മന്ത്രി നിതിന് ഗഡ്കരി വെളിപ്പെടുത്തിയത്. പ്രധാനമന്ത്രി നരേന്ദ്ര മോദിയുടെ മാര്ഗനിര്ദേശ പ്രകാരം, 15 വര്ഷം പൂര്ത്തിയാക്കിയ കേന്ദ്ര സര്ക്കാരിന്റെ എല്ലാ വാഹനങ്ങളും റദ്ദാക്കാനുള്ള ഫയലില് താന് ഒപ്പുവച്ചുവെന്നും അദ്ദേഹം പറഞ്ഞു.
വാഹനങ്ങള് ഒഴിവാക്കാനുള്ള കേന്ദ്ര സര്ക്കാരിന്റെ നയം എല്ലാ സംസ്ഥാനങ്ങളിലേക്കും അയച്ചിട്ടുണ്ട്. എല്ലാ സംസ്ഥാന സര്ക്കാരുകളും സംസ്ഥാന തലത്തില് ഈ നയം പിന്തുടരണമെന്ന് മന്ത്രി പറഞ്ഞു. അമേരിക്കയില് റോഡുകളില് നിന്ന് മലിനീകരണത്തിന് കാരണമാകുന്ന പഴയ കാറുകളുടെ എണ്ണം കുറയ്ക്കുന്നതിനായി പഴയ കാറുകളുടെ ഉടമകളെ അവരുടെ വാഹനങ്ങള് സ്ക്രാപ്പ് ചെയ്യുന്നതിന് പ്രേരിപ്പിക്കുന്ന ‘ക്യാഷ് ഫോര് ക്ലങ്കേഴ്സ്’ പ്രോഗ്രാം നടത്തിയിരുന്നു. ഇതിനെ അടിസ്ഥാനമാക്കി 2021 ഫെബ്രുവരിയിലാണ് കേന്ദ്രസര്ക്കാര് സ്ക്രാപ്പേജ് നയം അവതരിപ്പിച്ചത്.