അങ്കമാലി : കാലത്തിന്റെ മാറ്റം ഉള്‍ക്കൊള്ളാന്‍ കഴിയാത്ത പുഴുക്കുത്തുകള്‍ ഇപ്പോഴും പോലീസ് സേനയിലുണ്ടെന്നും ഇത്തരക്കാരോട് ഒരു വിട്ടുവീഴ്ചയുമില്ലെന്നും അവരെ നിയമത്തിനു മുന്നില്‍ കൊണ്ടുവരുമെന്നും മുഖ്യമന്ത്രി പിണറായി വിജയന്‍. കേരള പോലീസ് ഓഫീസേഴ്സ് അസോസിയേഷന്‍ സംസ്ഥാന സമ്മേളനത്തിന്റെ ഭാഗമായി നടന്ന പ്രതിനിധി സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
പോലീസിന് ചേരാത്ത പ്രവര്‍ത്തനങ്ങളുമായി സേനയില്‍ തുടരാമെന്ന ധാരണ ആര്‍ക്കും വേണ്ട. എന്നാല്‍, പോലീസ് സേനയുടെ ആത്മവീര്യം തകര്‍ക്കുന്ന ഒരു നിലപാടും സര്‍ക്കാരിന്റെ ഭാഗത്തുനിന്ന് ഉണ്ടാവുകയുമില്ല. ലഹരി മാഫിയയുടെ പ്രവര്‍ത്തനങ്ങളെ ചെറുത്തുതോല്‍പ്പിക്കാന്‍ കര്‍മ പദ്ധതികള്‍ നടപ്പാക്കും. ലഹരി പിടികൂടുന്നുണ്ടെങ്കിലും അതിന്റെ ഉറവിടം കണ്ടെത്താന്‍ പലപ്പോഴും സേനയ്ക്ക് കഴിയുന്നില്ല. വര്‍ഗീയ ശക്തികളോട് വിട്ടുവീഴ്ചയില്ലാത്ത സമീപനമാണ് സ്വീകരിക്കുന്നതെന്നും മുഖ്യമന്ത്രി പറഞ്ഞു. യോഗത്തില്‍ അസോസിയേഷന്‍ സംസ്ഥാന പ്രസിഡന്റ് ആര്‍. പ്രശാന്ത് അധ്യക്ഷത വഹിച്ചു.
റോജി എം. ജോണ്‍ എം.എല്‍.എ. മുഖ്യാതിഥിയായിരുന്നു. സംസ്ഥാന പോലീസ് മേധാവി അനില്‍കാന്ത്, എ.ഡി.ജി.പി. കെ. പദ്മകുമാര്‍, ഡി.ഐ.ജി. ഡോ. എ. ശ്രീനിവാസ്, റൂറല്‍ ജില്ലാ പോലീസ് മേധാവി വിവേക് കുമാര്‍, പോലീസ് സീനിയര്‍ ഓഫീസേഴ്സ് അസോസിയേഷന്‍ ജനറല്‍ സെക്രട്ടറി വി. സുഗതന്‍, കേരള പോലീസ് അസോസിയേഷന്‍ സംസ്ഥാന ജനറല്‍ സെക്രട്ടറി കെ.പി. പ്രവീണ്‍, അസോസിയേഷന്‍ ഭാരവാഹികളായ സി.ആര്‍. ബിജു, കെ.എസ്. ഔസേഫ്, ടി.എസ്. അനില്‍കുമാര്‍, പി.പി. മഹേഷ്, ബെന്നി കുര്യാക്കോസ് തുടങ്ങിയവര്‍ പ്രസംഗിച്ചു. സമാപന സമ്മേളനം മന്ത്രി പി. രാജീവ് ഉദ്ഘാടനം ചെയ്തു.
