ലണ്ടന്: താന് ജോലിചെയ്ത സ്റ്റേഷനോടുള്ള പ്രണയം മൂലം പേരിനൊപ്പം സ്റ്റേഷന്റെ പേര്ചേര്ത്ത റെയില്വേ ജീവനക്കാരി സമൂഹ മാധ്യമങ്ങളില് തരംഗമായി. ചില്ട്ടേണ് റെയില്വേയിലെ ജീവനക്കാരിയായിരുന്ന രഹന ഇസ്മത്ത് ഖവാജയാണ് തന്റെ പേരിലെ മാറ്റത്തിലൂടെ വലിയ ചര്ച്ചകള്ക്ക് കാരണമായത്. 20 വര്ഷത്തോളം ലണ്ടനിലെ മേരിലിബോണ് റെയില്വേ സ്റ്റേഷനില് ജോലി ചെയ്ത രഹന, സ്റ്റേഷനോടുണ്ടായ പ്രണയത്തിന്റെ (ആത്മബന്ധത്തിന്റെ) പുറത്ത് തന്റെ പേരിലെ ഇസ്മത്ത് മാറ്റുകയും പകരം മേരിലിബോണ് എന്ന പേര് സ്വീകരിക്കുകയും ചെയ്തു. നിയമപരമായി തന്നെ പേരുമാറ്റിയതെന്നതാണ് ഏറെ ശ്രദ്ധേയം. റെയില്വേയില് ജോലി ചെയ്ത കാലത്ത് കൂടുതലും മേരിലിബോണ് തന്നെയായിരുന്നു രഹനയുടെ പ്രവര്ത്തന മേഖല. സ്റ്റേഷന് മാനേജര്, ട്രെയിന് ഡിസ്പാച്ചര് തുടങ്ങി നിരവധി തസ്തികകളില് രഹന ജോലി ചെയ്തിട്ടുണ്ട്.
ട്രെയിന് ഒപ്പറേറ്റര്മാരുടെ സുരക്ഷയുടെ കൂടി ചുമതല വഹിച്ചിരുന്ന രഹന സമയം കിട്ടുമ്പോഴെല്ലാം മേരിലിബോണിലേക്ക് തിരികെ വരുമായിരുന്നു. മേരിലിബോണ് സ്റ്റേഷന് അത്ര വലുതല്ലെങ്കിലും അതിനൊരാത്മാവ് ഉണ്ടെന്നും ഓരോ തവണയും തനിക്കിവിടെ പുതുമ കണ്ടെത്താന് സാധിക്കുന്നുവെന്നും രഹന പറയുന്നു. കൂടാതെ സ്റ്റേഷന് തനിക്ക് മറ്റൊരു വീടുപോലെയാണെന്നും രഹന പറഞ്ഞു.
ലണ്ടനിലെ എല്ലാ സ്റ്റേഷനുകള്ക്കും ഇല്ലാത്ത ഒരു ഊഷ്മളതയും വ്യത്യസ്തതയും ഇവിടെ തനിക്ക് അനുഭവിക്കാന് സാധിക്കുന്നുണ്ടെന്നും ഈ സ്റ്റേഷനെയും ആളുകളെയും അതിന്റെ ചരിത്രത്തെയും താന് അത്രത്തോളം സ്നേഹിക്കുന്നുവെന്നും രഹന പറയുന്നു. മേരിലിബോണ് ശരിക്കും തന്റെ ജീവിതത്തിന്റെ ഭാഗമായിരിക്കുന്നുവെന്നും രഹന കൂട്ടിച്ചേര്ത്തു.