തൃശൂരില് കെഎസ്ആര്ടിസി ബസിന് നേരെ ഒറ്റയാന് കബാലിയുടെ ആക്രമണം. ചാലക്കുടിയില് നിന്ന് മലക്കപ്പാറയ്ക്ക് പോയ ബസിന് നേരെയായിരുന്നു ആക്രമണം. ഇന്നലെ രാത്രി എട്ടു മണിയോടെ അമ്പലപ്പാറ ഒന്നാം ഹെയര്പിന് വളവിലായിരുന്നു സംഭവം.
അമ്പലപ്പാറ ഒന്നാം ഹെയര്പിന് വളവിലായിരുന്നു സംഭവം. പാഞ്ഞടുത്ത കബാലി കൊമ്പില് കുത്തി ബസുയര്ത്തി താഴെ വച്ചു. ആര്ക്കും പരിക്കില്ല, യാത്രക്കാരും ജീവനക്കാരും സുരക്ഷിതര് ആണ്. രണ്ടു മണിക്കൂറിലേറെ കബാലി പരാക്രമം തുടര്ന്നു. രാത്രി 8 മണിക്ക് മലക്കപ്പാറ എത്തേണ്ട ബസ് 11 മണിക്കാണ് എത്തിയത്.
സംഭവത്തെക്കുറിച്ച് കണ്ടക്ടര് ഷാനവാസ് പറഞ്ഞത്: ”ഇത്രയും പ്രകോപിതനായി ആദ്യമായിട്ടാണ് കബാലിയെ കാണുന്നത്. ബസിന് നേരെ പാഞ്ഞടുക്കുകയായിരുന്നു. ഗ്ലാസിന് താഴെ കൊമ്പ് കുത്തി ബസ് പൊക്കുകയായിരുന്നു. കുറച്ച് പൊക്കിയ ശേഷം താഴെ വച്ചു. ബസ് ഓഫാക്കിയിരുന്നില്ല. പതുക്കെ റേസ് ചെയ്തു കൊണ്ടിരുന്നു. ബസില് യാത്രക്കാര് കുറവായിരുന്നു. പരിഭ്രമമുണ്ടായിരുന്നു.”
സ്വകാര്യ ബസിന് മുന്നിലേക്ക് പാഞ്ഞടുത്ത കബാലിയില് നിന്ന് യാത്രക്കാരെ രക്ഷിക്കാന് ഡ്രൈവര് ബസ് എട്ട് കിലോമീറ്റര് പിന്നോട്ടോടിച്ചത് കഴിഞ്ഞ ആഴ്ചയാണ്. ചാലക്കുടി വാല്പ്പാറ പാതയിലായിരുന്നു സംഭവം. അമ്പലപ്പാറ മുതല് ആനക്കയം വരെയുള്ള ഭാഗത്ത് ബസ് സാഹസികമായി ഓടിച്ച് യാത്രക്കാരെ രക്ഷിച്ചത് വെറ്റിലപ്പാറ സ്വദേശി അംബുജാക്ഷനെന്ന ഡ്രൈവറാണ്.
ഈ ഭാഗത്ത് സ്ഥിരമായി കാണുന്ന കബാലിക്ക് മദപ്പാട് ഉണ്ടായതോടെയാണ് വ്യാപക അക്രമം തുടരുന്നതെന്നാണ് വനംവകുപ്പ് പറയുന്നത്.