ആസൂത്രിത അക്രമങ്ങളാണ് ഹര്ത്താലിന്റെ മറവില് പോപ്പുലര് ഫ്രണ്ട് നടത്തിയതെന്ന് മുഖ്യമന്ത്രി പിണറായി വിജയന്. ഇന്നലെ കണ്ടത് ഇതുവരെ കാണാത്ത അക്രമ സംഭവങ്ങളാണ്. സാധാരണ ഹര്ത്താല് പ്രഖ്യാപിക്കുമ്പോള് സ്വീകരിക്കുന്ന മാര്ഗമല്ല അവര് സ്വീകരിച്ചത്. സംസ്ഥാനത്തിന്റെ എല്ലാ ഭാഗങ്ങളിലും സംഘടിതമായ ഇടപെടല് ഉണ്ടായിട്ടുണ്ട്. വലിയ നാശനഷ്ടങ്ങളാണ് ഹര്ത്താലില് സംഭവിച്ചിട്ടുള്ളത്. അടുത്ത കാലത്ത് ഉണ്ടാകാത്ത രീതിയിലുള്ള വ്യാപക അക്രമങ്ങളാണ് ഹര്ത്താലില് നടന്നത്. ഇത് തികച്ചും അപലപനീയമാണെന്നും മുഖ്യമന്ത്രി പറഞ്ഞു.
മുഖം മൂടി ധരിച്ച് വരെ ആക്രമണം നടത്തി, സംസ്ഥാനത്തെ പൊതു അന്തരീക്ഷം തകര്ക്കാനുള്ള ശ്രമം നടന്നു. ആരെയും രക്ഷപ്പെടാന് അനുവദിക്കില്ലെന്നും അദ്ദേഹം പറഞ്ഞു. കേരള പൊലീസ് സീനിയര് ഓഫീസേഴ്സ് അസോസിയേഷന് സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
വര്ഗീയ ശക്തികളെ വിട്ടുവീഴ്ചയില്ലാത ഒറ്റപ്പെടുത്തുകയാണ് വേണ്ടത്. എന്നാല് ചിലര് അവരുമായി സമരസപ്പെടുന്നു. അത് വര്ഗീയ ശക്തികള്ക്ക് പ്രോത്സാഹനമാകുന്നു. ചില ഘട്ടങ്ങളില് ചില താത്കാലിക നേട്ടങ്ങള്ക്കായി വര്ഗീയ ശക്തികളുടെ സഹായം തേടാം എന്നാണ് ചിലര് കരുതുന്നത്. ഇത് നമ്മുടെ നാടിന്റെ അനുഭവത്തിലുള്ളതാണ്.
രാജ്യത്ത് ഗൗരവമായ പ്രശ്നം വര്ഗീയതയാണെന്നും മുഖ്യമന്ത്രി ചൂണ്ടിക്കാണിച്ചു. അതിന്റെ ഭാഗമായി പലപ്പോഴും കലാപങ്ങളും കൊലപാതകങ്ങളും നടക്കുന്നുണ്ട്. അത്തരം ആപത്തില് നിന്നും മുക്തമായ നാടായി കേരളം നിലനില്ക്കുന്നുണ്ട്. കേരളത്തിലും വര്ഗീയ ശക്തികളെ പ്രോത്സാഹിപ്പിക്കുന്നവരുണ്ട്. വര്ഗീയത നാടിന് ആപത്താണെന്ന് തിരിച്ചറിഞ്ഞ് ഒറ്റപ്പെടുത്താനാണ് ശ്രമിക്കേണ്ടത്.
ഒരു വര്ഗീയതയെ മറ്റൊരു വര്ഗീയത കൊണ്ട് നേരിടാന് കഴിയില്ല. ഭൂരിപക്ഷ, ന്യൂനപക്ഷ വര്ഗീയതയും ഒരു പോലെ എതിര്ക്കപ്പെടണം. വര്ഗീയതയുടെ ഭാഗമായി തകര്ക്കപ്പെടുന്നത് ജനങ്ങളുടെ ഒരുമയാണെന്നും മുഖ്യമന്ത്രി പറഞ്ഞു.