കണ്ണൂരില് സഹപാഠി കഞ്ചാവ് നല്കി ശാരീരികമായി പീഡിപ്പിച്ചെന്ന് ഒമ്പതാം ക്ലാസുകാരി വെളിപ്പെടുത്തിയതിന് പിന്നാലെ ബാലാവകാശ കമ്മിഷന് റിപ്പോര്ട്ട് തേടി. സ്കൂള് വിദ്യാര്ത്ഥികളെ ലഹരി നല്കി പീഡിപ്പിച്ച സംഭവം ഞെട്ടിക്കുന്നതാണെന്നും ഇത്തരം സംഭവങ്ങള് ആവര്ത്തിക്കപ്പെടാതിരിക്കാന് ശ്രദ്ധിക്കണമെന്നും ബാലാവകാശ കമ്മിഷന് വ്യക്തമാക്കി. വിഷയത്തില് റിപ്പോര്ട്ട് വന്ന ശേഷം തുടര് നടപടികളിലേക്ക് കടക്കും.
പല പ്രായത്തിലുള്ള 11 പെണ്കുട്ടികള്ക്ക് ലഹരി എത്തിക്കുന്നത് പ്രായപൂര്ത്തിയാകാത്ത പയ്യനാണെന്ന ഞെട്ടിക്കുന്ന വെളിപ്പെടുത്തലാണ് പീഡനത്തിന് ഇരയായ ഒമ്പതാം ക്ലാസുകാരി നടത്തിയത്. കണ്ണൂര് സിറ്റിയിലെ ഏറ്റവും വലിയ ലഹരി ഡീലര്മാരില് ഒരാളാണ് ഈ പയ്യനെന്ന് പെണ്കുട്ടിയുടെ പിതാവ് വെളിപ്പെടുത്തുന്നു. തനിക്ക് കഞ്ചാവ് മാത്രമേ നല്കിയിട്ടുള്ളൂ എന്നും എന്നാല് ചേച്ചിമാര്ക്ക് എം.ഡി.എം.എ, എല്.എസ്.ഡി സ്റ്റാമ്പ് തുടങ്ങിയവ നല്കി പീഡിപ്പിക്കുന്നുണ്ടെന്നും പെണ്കുട്ടി പറയുന്നു.
ഒമ്പതാം ക്ലാസുകാരിയുടെ സഹപാഠിയെ അറസ്റ്റ് ചെയ്ത് ജുവനൈല് ഹോമിലേക്ക് മാറ്റിയിട്ടുണ്ട്. മാതാപിതാക്കളുടെ പരാതിയില് പൊലീസ് കേസെടുത്തു. സംഘത്തില് ക്യാരിയര്മാരായും സ്കൂള് വിദ്യാര്ത്ഥികളെ തന്നെയാണ് ഉപയോഗിക്കുന്നത്. സംസ്ഥാനത്ത് വിദ്യാര്ത്ഥികള്ക്ക് ലഹരി എത്തിച്ച് നല്കുന്ന സംഘങ്ങള് സജീവമാണ്.
താന് പുറത്താണ് പഠിച്ചതെന്നും അവിടെ റാഗിങ്ങിന് ഇരയായതിന്റെ ഡിപ്രഷന് ഉണ്ടായിരുന്നെന്നും പെണ്കുട്ടി പറയുന്നു. ഈ ഡിപ്രഷന് മാറ്റാന് വേണ്ടിയാണെന്ന് പറഞ്ഞ് സഹപാഠി നിര്ബന്ധിച്ച് കഞ്ചാവ് തന്നിട്ടുണ്ടെന്നും അതിന് ശേഷമാണ് ക്രൂരമായി പീഡിപ്പിച്ചതെന്നും പെണ്കുട്ടി വെളിപ്പെടുത്തി. പലപ്പോഴും ലഹരി ഉപയോഗിച്ച ശേഷം പെണ്കുട്ടികളുടെ കൂടെയാണ് അവന് രാത്രി കഴിയാറ്. പീഡന ദൃശ്യങ്ങള് ചിത്രീകരിച്ച് ബ്ലാക്ക് മെയില് ചെയ്യാനായി ഉപയോഗിക്കുന്നുണ്ട്. ഇത്തരത്തില് തന്നെക്കൊണ്ട് കഞ്ചാവ് വലിപ്പിക്കുന്ന ദൃശ്യങ്ങളും എടുത്തിട്ടുണ്ട്. ഇതിന് ശേഷമാണ് ബ്ലാക്ക്മയില് ചെയ്യുന്നതെന്ന് പെണ്കുട്ടി വെളിപ്പെടുത്തുന്നു.
സഹപാഠിക്ക് ഒപ്പം മകള് കഞ്ചാവ് ഉപയോഗിക്കുന്ന വിഡിയോ പയ്യന്റെ ബന്ധു ഫോണില് അയച്ച് തന്നപ്പോഴാണ് പൊലീസില് പരാതി നല്കിയതെന്ന് പെണ്കുട്ടിയുടെ പിതാവ് പറഞ്ഞു. തുടര്ന്ന് കൗണ്സിലിങ്ങിലൂടെയാണ് പെണ്കുട്ടി പീഡന വിവരം ഉള്പ്പടെ പുറത്തു പറയുന്നത്.