ജില്ലാ ഭരണകൂടം അനുമതി നിഷേധിച്ചെങ്കിലും കര്‍ണാലില്‍ മഹാപഞ്ചായത്തുമായി കര്‍ഷകര്‍ മുന്നോട്ട്. കര്‍ണാലിലെ മിനി സെക്രട്ടേറിയേറ്റിലേക്ക് മാര്‍ച്ച് നടത്തും. അനുനയ നീക്കത്തിന്റെ ഭാഗമായി കര്‍ഷക സംഘടനകളെ ജില്ലാ ഭരണ കൂടം ചര്‍ച്ചയ്ക്ക് ക്ഷണിച്ചു. കനത്ത പൊലീസ് വലയത്തിലുള്ള കര്‍ണാല്‍ ഉള്‍പ്പെടെ ആറ് ജില്ലകളില്‍ ഇന്റര്‍നെറ്റ് വിച്ഛേദിച്ചു.
ഓഗസ്റ്റ് 28 ന് കര്‍ഷകര്‍ക്ക് നേരെയുണ്ടായ പൊലീസ് ലാത്തിച്ചാര്‍ജില്‍ പ്രതിഷേധിച്ചാണ് സംയുക്ത കിസാന്‍ മോര്‍ച്ചയുടെ മഹാപഞ്ചായത്ത്. കര്‍ഷകരുടെ തലതല്ലിപ്പൊളിക്കാന്‍ ഉത്തരവിട്ട എസ്ഡിഎം ആയുഷ് സിന്‍ഹക്കെതിരെ കൊലക്കുറ്റത്തിന് കേസെടുത്ത് സര്‍വീസില്‍ നിന്ന് പിരിച്ചുവിടണമെന്നാണ് കര്‍ഷകരുടെ പ്രധാന ആവശ്യം.
ഹരിയാന, യുപി, പഞ്ചാബ് എന്നിവിടങ്ങളില്‍ നിന്നെത്തിയ കര്‍ഷകരാണ് കര്‍ണാലില്‍ ഒത്തുകൂടിയിട്ടുള്ളത്. സ്ഥലത്ത് പൊലീസ് നിരോധനാജ്ഞ പുറപ്പെടുവിച്ചു. ഒത്തുകൂടരുതെന്ന ജില്ലാ ഭരണകൂടത്തിന്റെ ആവശ്യം കര്‍ഷക സംഘടനകള്‍ തള്ളി.
ലാത്തിച്ചാര്‍ജില്‍ മരിച്ച കര്‍ഷകന്റെ കുടുംബത്തിന് 25 ലക്ഷവും പരിക്കേറ്റവര്‍ക്ക് രണ്ട് ലക്ഷം ധനസഹായം നല്‍കണമെന്നും കര്‍ഷകര്‍ ആവശ്യപ്പെടുന്നു. അതേസമയം കോണ്‍ഗ്രസില്‍ നിന്ന് പണം വാങ്ങിയാണ് കര്‍ഷക നേതാവ് ഗുര്‍നാം സിങ് സംസ്ഥാനത്ത് പ്രശ്‌നങ്ങള്‍ സൃഷ്ടിക്കുന്നതെന്ന ആരോപണവുമായി ഹരിയാന കൃഷി മന്ത്രി ജെപി ദലാല്‍ രംഗത്തുവന്നു.
അനിഷ്ട സംഭവങ്ങള്‍ ഒഴിവാക്കാന്‍ 40 കമ്പനി പൊലീസിനെയാണ് സുരക്ഷക്കായി നിയോഗിച്ചിട്ടുള്ളത്. കുരുക്ഷേത്ര, കൈതാല്‍, ജിന്ദ്, പാനിപ്പത്ത് എന്നിവിടങ്ങളില്‍ 24 മണിക്കൂര്‍ ഇന്റര്‍നെറ്റ് വിച്ഛേദിച്ചു.
