ചെന്നൈ: പൊലീസ് സ്റ്റേഷനിലെത്തിയ കര്‍ഷകന്‍ വിഷം കഴിച്ച് ജീവനൊടുക്കി. തമിഴ്നാട്ടിലെ ഡിണ്ടിഗല്‍ ജില്ലയിലെ അമ്മനാകൂര്‍ പൊലീസ് സ്റ്റേഷനിലാണ് സംഭവം. നിലക്കോട്ട സ്വദേശിയായ പണ്ടി എന്ന 55 കാരനാണ് ജീവനൊടുക്കിയത്. ചൊവ്വാഴ്ച്ച രാത്രിയാണ് പാണ്ടി വിഷം കഴിച്ചത്. പൊലീസ് ഇദ്ദേഹത്തെ നിലക്കോട്ടയിലെ സര്‍ക്കാര്‍ ആശുപത്രിയില്‍ പ്രവേശിപ്പിച്ചു. പിന്നീട് നില വഷളായതോടെ ഡിണ്ടിഗലിലെ ആശുപത്രിയിലേക്ക് മറ്റിയെങ്കിലും മരിച്ചു.
ഒരു സംഘം ആളുകള്‍ തങ്ങളുടെ കൃഷിസ്ഥലം കയ്യേറാന്‍ ശ്രമിക്കുന്നുവെന്നും തന്നെയും കുടുംബത്തേയും വധിക്കാന്‍ ശ്രമിക്കുമെന്നും ഭീഷണപ്പെടുത്തിയതായി കാണിച്ച് പാണ്ടിയുടെ മകന്‍ സതീഷ് നേരത്തെ പൊലീസ് സ്റ്റേഷനില്‍ പരാതി നല്‍കിയിരുന്നു. എന്നാല്‍ ഇതില്‍ കാര്യമായ നടപടിയുണ്ടായില്ല. പിന്നീട് ഇവര്‍ മജിസ്ട്രേറ്റിനെ സമീപിച്ചു. തുടര്‍ന്ന് പരാതിയില്‍ കര്‍ശന നടപടിയെടുക്കണമെന്ന് നിര്‍ദേശം നല്‍കി.
എന്നാല്‍ പെലീസ് പിന്നെയും നിഷ്‌ക്രിയത്വം തുടര്‍ന്നു. ഇതില്‍ മനംമടുത്താണ് പാണ്ടി പൊലീസ് സ്റ്റേഷനിലെത്തി വിഷം കഴിച്ച് ജീവനൊടുക്കിയത്.
പൊലീസ് സ്റ്റേഷനില്‍ കര്‍ഷകന്‍ വിഷം കഴിക്കുന്നതിന്റെ വീഡിയോ പുറത്ത് വന്നു. സ്റ്റേഷന്റെ പടിക്കെട്ടില്‍ ഇരിക്കുന്ന പാണ്ടി പതിയെ ബോധരഹിതനാകുന്നതാണ് ദൃശ്യങ്ങളില്‍. ഈ സമയം ഇദ്ദേഹത്തെ ആശുപത്രിയിലെത്തിക്കുന്നതിന് പകരം അടുത്ത് നിന്ന് ഫോണില്‍ സംസാരിക്കുന്ന ഇന്സ്പെക്ടര് ഷണ്‍മുഖ ലക്ഷമിയേയും കാണാം. മൂന്ന് മിനിറ്റോളമാണ് ഇവര്‍ ഫോണില്‍ സംസാരിച്ചത്. സംഭവത്തില്‍ ഇവരെ സസ്പെന്റ് ചെയ്തു.
