ഭാരത് ജോഡോ യാത്രയിലുടനീളം വളര്ത്തിയിരുന്ന താടിയും മുടിയും വെട്ടിമാറ്റി. കോട്ടും സ്യൂട്ടും ടൈയ്യും ധരിച്ചെത്തിയ രാഹുല് ഗാന്ധിയുടെ ചിത്രങ്ങള് സമൂഹമാധ്യമത്തില് വൈറലായി. യുകെയിലെ കേംബ്രിഡ്ജ് സര്വ്വകലാശാലയില് വിദ്യാര്ത്ഥികളോട് സംസാരിക്കാനെത്തിയതായിരുന്നു രാഹുല് ഗാന്ധി.
സര്വ്വകലാശാലയില് ‘ലേണിങ് ടു ലിസണ് ഇന് ദ ട്വന്റി ഫസ്റ്റ് സെഞ്ച്വറി’ എന്ന വിഷയത്തിലാണ് രാഹുല് ഗാന്ധി സര്വ്വകലാശാലയിലെ വിദ്യാര്ത്ഥികളുമായി സംസാരിക്കുന്നത്. ഒപ്പം ഭാരത് ജോഡോ യാത്രയുടെ വിശേഷങ്ങളും പങ്കുവെച്ചു. കൂടാതെ കോര്പ്പസ് ക്രിസ്റ്റി കോളേജിലെ ഇന്ത്യന് വംശജയും സ്റ്റഡീസ് ഡയറക്ടറുമായ പ്രൊഫസര് ശ്രുതി കപിലയുമായി ‘ബിഗ് ഡാറ്റയും ഡെമോക്രസിയും’, ‘ഇന്ത്യ-ചൈന ബന്ധങ്ങള്’ എന്ന വിഷയത്തില് സെഷനുകള് നടത്താന് രാഹുല് ഗാന്ധി പദ്ധതിയിടുന്നുണ്ടെന്ന് ഗ്ലോബല് ഹ്യുമാനിറ്റീസ് ഇനിഷ്യേറ്റീവിന്റെ ഡയറക്ടര് പറഞ്ഞു.
രാജ്യത്തെ 12 സംസ്ഥാനങ്ങലൂടെ കാല് നടയാത്ര ചെയ്ത രാഹുല് ഗാന്ധി യാത്രയില് ഉടനീളം മുടിയും താടിയും വളര്ത്തിയിരുന്നു. യാത്ര ആരംഭിച്ചത് മുതല് വെള്ള വസ്ത്രം മാത്രമാണ് രാഹുല് ഗാന്ധി ധരിച്ചിരുന്നത്. യാത്രക്ക് ശേഷവും പൊതുവേദികളില് വെളുത്ത ടീഷര്ട്ടില് മാത്രമായിരുന്നു രാഹുല് ഗാന്ധി പ്രത്യക്ഷപ്പെട്ടിരുന്നത്. ഭാരത് ജോഡോ യാത്രയുടെ അതേ രൂപത്തിലും വെള്ള വസ്ത്രത്തിലുമായിരുന്നു റായ്പൂരില് നടന്ന പ്ലീനറി സമ്മേളനത്തില് രാഹുല് ഗാന്ധിയെത്തിയത്.