മൂവാറ്റുപുഴ: 2023 -24 കേന്ദ്ര ബജറ്റില്‍ 100 കോടി രൂപ അനുവദിച്ചിട്ടുള്ള അങ്കമാലി -ശബരി റയില്‍വെ പദ്ധതിയുടെ പുതുക്കിയ എസ്റ്റിമേറ്റ് കേന്ദ്ര സംസ്ഥാന സര്‍ക്കാരുകളുടെ സംയുക്ത സംരംഭമായ KRDCL തയ്യാറാക്കി റെയില്‍വേ ബോര്‍ഡിന് സമര്‍പ്പിച്ചിരിക്കുകയാണ്. പുതുക്കിയ എസ്റ്റിമേറ്റിന് ബോര്‍ഡ് നാളിതുവരെയും അനുമതി നല്‍കിയിട്ടില്ല. ഈ സാഹചര്യത്തില്‍ സംസ്ഥാന സര്‍ക്കാരും ഇക്കാര്യത്തില്‍ കേന്ദ്രസര്‍ക്കാരില്‍ സമ്മര്‍ദ്ദം ചെലുത്തണമെന്ന് ആവശ്യപ്പെട്ട് ഡീന്‍ കുര്യാക്കോസ് എം.പി. മുഖ്യമന്ത്രിക്ക് കത്ത് നല്‍കി.
25 വര്‍ഷം മുന്‍പ് അനുമതി ലഭിച്ച് 8 കിലോമീറ്റര്‍ റെയില്‍പാതയും കാലടി റെയില്‍വേ സ്റ്റേഷനും ഒരു കിലോമീറ്റര്‍ ദൈര്‍ഘ്യത്തില്‍ പെരിയാറിന് കുറുകെ റെയില്‍വേ പാലവും നിര്‍മ്മിച്ചു കഴിഞ്ഞ പദ്ധതി വര്‍ഷങ്ങളായി നിലച്ചിരിക്കുകയാണ്.അങ്കമാലിയില്‍ നിന്ന് തിരുവനന്തപുരത്തിനുള്ള സമാന്തര റെയില്‍വേയുടെ ആദ്യ ഘട്ടമായ അങ്കമാലി- ശബരി റെയില്‍വേയുടെ രണ്ടാം ഘട്ടം കൂടി പൂര്‍ത്തിയാകുമ്പോള്‍ 25 പുതിയ റെയില്‍വേ സ്റ്റേഷനുകള്‍ കേരളത്തിന് പുതിയതായി ലഭ്യമാക്കുന്നതും എറണാകുളം, ഇടുക്കി, കോട്ടയം, പത്തനംതിട്ട, കൊല്ലം, തിരുവന്തപുരം ജില്ലകളിലെ ഗതാഗത സൗകര്യങ്ങളില്‍ വന്‍ വികസനം സാധ്യമാകുന്നതുമായ പദ്ധതിയാണ്.
ശബരി റെയില്‍ യാഥാര്‍ത്ഥ്യമായാല്‍ പെരുമ്പാവൂര്‍ മേഖലയിലെ പ്ലൈ വുഡ് വ്യാവസായങ്ങള്‍ക്കും ഐരാപുരം കിന്‍ഫ്രാ റബ്ബര്‍ പാര്‍ക്കിനെയും, കോതമംഗലം- നെല്ലികുഴിയിലെ ഫര്‍ണ്ണീച്ചര്‍ നിര്‍മ്മാണ ക്ലസ്റ്ററിനും മൂവാറ്റുപുഴ-നെല്ലാടിലെ കിന്‍ഫ്രാ ഫുഡ് പാര്‍ക്കിനും കേരളത്തില്‍ ഉപയോഗിക്കുന്ന അരിയുടെ 80% വും സംസ്‌കരിക്കുന്ന കാലടിയിലെ അരിമില്ല് വ്യാവസായങ്ങള്‍ക്കും ഇന്‍ഡ്യയുടെ വിവിധ സംസ്ഥാനങ്ങളിലേക്ക് പൈനാപ്പിള്‍ കയറ്റി അയക്കുന്ന ഇന്ത്യയുടെ പൈനാപ്പിള്‍ സിറ്റിയായ മുവാറ്റുപുഴ-വാഴക്കുളം പൈനാപ്പിള്‍ മാര്‍ക്കറ്റിനും സുഗന്ധവൃഞ്ജനങ്ങളുടെ നാടായ ഇടുക്കിക്കും ഇടുക്കിയിലെ വിനോദസഞ്ചാര മേഖലക്കും കരുത്തു പകരുമെന്നും ഇത് കേരളത്തിന്റെ വ്യാവസായിക കുതിപ്പിന് ആക്കം കൂട്ടുമെന്നും എംപി പറഞ്ഞു.
പുതുക്കിയ എസ്റ്റിമേറ്റിന് നാളിതുവരെയും അനുമതി ലഭിക്കാത്തതിനാലും ശബരി റയില്‍വെയുടെ പുതിയ അലൈന്‍മെന്റാണെന്നു പറഞ്ഞു ചെങ്ങന്നൂരില്‍ നിന്ന് പമ്പയിലേയ്ക്ക് ആകാശ റെയില്‍വേയ്ക്ക് സര്‍വ്വേ നടത്തുന്നതിനാലും 25 വര്‍ഷം മുന്‍പ് കല്ലിട്ട് തിരിച്ച് മരവിപ്പിച്ചിട്ടുള്ളതുമായ അങ്കമാലി- ശബരി റയില്‍വേയുടെ സ്ഥലമുടമകളും 6 ജില്ലകളിലെ ജനങ്ങളും ആശങ്കയിലായിരിക്കുകയാണ്.
അതുകൊണ്ട് അങ്കമാലി-ശബരി റെയില്‍ പദ്ധതിയുടെ പുതുക്കിയ എസ്റ്റിമേറ്റിന് അടിയന്തിരമായി അനുമതി നല്കന്നതിന് സംസ്ഥാന സര്‍ക്കാര്‍ കേന്ദ്ര സര്‍ക്കാരില്‍ സമ്മര്‍ദ്ദം ചെലുത്തണമെന്നും പ്രധാനമന്ത്രിക്കും കേന്ദ്ര റെയില്‍വേ വകുപ്പ് മന്ത്രിക്കും മുഖ്യമന്ത്രി കത്ത് അയക്കണമെന്നും പദ്ധതിക്കായി സ്ഥലം ഏറ്റെടുക്കല്‍ നടപടികള്‍ പുനരാരംഭിക്കണമെന്നും ഡീന്‍ കുര്യാക്കോസ് എം.പി. ആവശ്യപ്പെട്ടു.
