മൂവാറ്റുപുഴ: ദൈവ വിശ്വാസികൾ ദൈവത്തെ ഭയക്കും പോലെ ജനപ്രതിനിതികൾ ജനങ്ങളെ ഭയക്കുക തന്നെ വേണമെന്ന് പ്രതിപക്ഷ നേതാവ് വിഡി സതീശൻ പറഞ്ഞു. മൂവാറ്റുപുഴയിൽ മാത്യു കുഴൽ നാടൻ എംഎൽഎയുടെ ഒന്നാം വാർഷിക ആഘോഷങ്ങളുടെ ഭാഗമായി പുറത്തിറക്കിയ പ്രവർത്തനങ്ങളുടെ പ്രോഗ്രസ് കാര്ഡ് പ്രകാശനവും ആശാ പ്രവര്ത്തകയ്ക്ക് നിര്മ്മിച്ച് നല്കുന്ന വീടിന്റെ താക്കോല് ദാനവും നിർവ്വഹിച്ച് സംസാരിക്കുകയായിരുന്നു അദ്ദേഹം.
ജനങ്ങൾക്കിഷ്ടപെടാത്ത ഒന്നും ജനപ്രതിനിതികൾ ചെയ്യരുതെന്നും അദ്ദേഹം പറഞ്ഞു. പ്രയാസങ്ങൾ ഉണ്ടാകുന്നിടത്ത് സഹായം എത്തിക്കുക എന്നത് ഒരോ ജനപ്രതിനിതിയുടേയും കടമയാണെന്നും അത്തരം ബോധ്യങ്ങളാണ് ജനപ്രതിനിതികൾക്കുണ്ടാകേണ്ടതെന്നും അദ്ദേഹം പറഞ്ഞു. മാത്യു കുഴൽനാടൻ എം എൽ എയുടെ കാർഷിക- വികസന കാഴ്ചപാടുകളും പ്രവർത്തനങ്ങളും നാടിന് മാതൃകയാണന്നും അദ്ദേഹം കൂട്ടിചേർത്തു.
ചടങ്ങിൽ എംഎല്എ ഡോ. മാത്യു കുഴല്നാടന് അദ്ധ്യക്ഷത വഹിച്ചു. നിയമാസഭാംഗമായി ഒരു വര്ഷം പൂര്ത്തീകരിച്ചു. മുവാറ്റുപുഴക്ക് പുതിയ ദിശാബോധം നല്കാനും മുടങ്ങി കിടന്ന പദ്ധതികള് പുനരാരംഭിക്കുവാനും കഴിഞ്ഞ ഒരു വര്ഷമാണ് കടന്നുപോയതെന്ന് എംഎല്എ പറഞ്ഞു. സ്ഥാനം ഏറ്റെടുത്തപ്പോള് ജനങ്ങള്ക്ക് നല്കിയ വാഗ്ദാനങ്ങള് ഓരോന്നായി നടപ്പിലാക്കി കൊണ്ടിരിക്കുകയാണ്. മികച്ച മൂവാറ്റുപുഴയാണ് പ്രധാന ലക്ഷ്യം. അതിനായുള്ള കൂടുതൽ ഇടപെടലുകൾ നടത്തുമെന്നും അദ്ദേഹം പറഞ്ഞു.
ഡീന്കുര്യാക്കോസ് എംപി മുഖ്യ പ്രഭാക്ഷണം നടത്തി. മുന് എംപി. ഫ്രാന്സിസ് ജോര്ജ്, മുന് എംഎല്എ ജോണിനെല്ലൂര്, ജില്ലാ പഞ്ചായത്ത് പ്രസിഡന്റ് ഉല്ലാസ് തോമസ്, കെ.പി.സി.സി ജനറല് സെക്രട്ടറി അഡ്വ.എസ് അശോകന്, ബ്ലോക്ക് പഞ്ചായത്ത് പ്രസിഡന്റ് മാരായ പ്രൊഫ. ജോസ് അഗസ്റ്റിന്, പി എ എം ബഷീർ (കോതമംഗലം) പായിപ്ര പഞ്ചായത്ത് പ്രസിഡന്റ് മാത്യൂസ് വർക്കി, ജില്ലാ പഞ്ചായത്ത് അംഗങ്ങളായ റാണികുട്ടി ജോർജ് , ഷാന്റി ഏബ്രഹാം, വിവിധ രാഷ്ട്രീയ പാർട്ടി നേതാക്കളായ വർഗീസ് മാത്യു, കെ.എം സലീം, കെ.എം. പരീത്, പി എ ബഷീർ, ജോസ് പെരുമ്പള്ളിക്കുന്നേൽ, റെജി ജോർജ് , സമീർ കോണിക്കൽ , ടോമി പാലമല , ബേബി ജോൺ , ജിക്കു താണിവീട്ടിൽ എന്നിവര് സംസാരിച്ചു. ഗ്രാമ പഞ്ചായത്ത് പ്രസിഡന്റ് ഓ.പി.ബേബി സ്വാഗതവും കോൺഗ്രസ് മണ്ഡലം പ്രസിഡന്റ് സാബു ജോൺ നന്ദിയും പറഞ്ഞു.