ലൈഫ് മിഷന് രണ്ടാംഘട്ട കരട് പട്ടികയുടെ ഒന്നാംഘട്ട അപ്പീല് നല്കാനുള്ള സമയ പരിധി അവസാനിക്കുമ്പോള് എറണാകുളം ജില്ലയില് ലഭ്യമായത് 2464 അപ്പീലുകളും 24 പരാതികളും. ഭൂവുടമകളായ ഭവന രഹിതരുടെ 1888 അപ്പീലുകളാണ് ലഭിച്ചിട്ടുള്ളത്. ബ്ലോക്ക് പഞ്ചായത്തുകളില് 1855, നഗരസഭകളില് 29, കൊച്ചി കോര്പ്പറേഷനില് നാലും അപ്പീലുകള് ലഭിച്ചു.
ഭൂരഹിതരായ ഭവന രഹിതരുടെ 576 അപ്പീലുകളാണ് ജില്ലയില് ലഭിച്ചിട്ടുള്ളത്. ഇതില് നഗരസഭകളില് 66, കോര്പ്പറേഷന് 23, ബ്ലോക്ക് പഞ്ചായത്തുകളില് 487 അപ്പീലുകള് ലഭിച്ചിട്ടുണ്ട്. ഏറ്റവും കൂടുതല് അപ്പീലുകള് ലഭിച്ചിരിക്കുന്നത് കോതമംഗലം ബ്ലോക്കില് നിന്നാണ്. ഭൂമി സ്വന്തമായുള്ള ഭവനരഹിതരുടെ 381 അപ്പീലുകളും, ഭൂരഹിതരും ഭവനരഹിതരുമായവരുടെ 65 അപ്പീലുകളും ഇവിടെ ലഭ്യമായിട്ടുണ്ട്.
കരട് പട്ടികയില് അനര്ഹര് കടന്നു കൂടിയിട്ടുണ്ടെന്നും, ഗുണഭോക്തൃ പട്ടികയിലെ മുന്ഗണനാക്രമത്തില് ആക്ഷേപമുണ്ടെന്നും ചൂണ്ടിക്കാട്ടി 24 പരാതികളാണ് ലഭിച്ചിരിക്കുന്നത്. വാഴക്കുളം വൈപ്പിന്, ബ്ലോക്കുകളില് നിന്നാണ് ഏറ്റവും കൂടുതല് പരാതികള്.
ആദ്യഘട്ട അപ്പീല് സമര്പ്പിക്കാനുള്ള സമയം ജൂണ് 17ന് അവസാനിച്ചിരുന്നു. ഈ മാസം 29 നകം അപ്പീലുകള് തീര്പ്പാക്കും. പഞ്ചായത്തുകളിലെ അപ്പീലുകള് ബ്ലോക്ക് പഞ്ചായത്ത് സെക്രട്ടറി അധ്യക്ഷനായ സമിതിയും, നഗരസഭകളിലേത് നഗരസഭാ സെക്രട്ടറി അധ്യക്ഷനായ സമിതിയുമാണ് തീര്പ്പാക്കുന്നത്.
അപ്പീലുകളും ആക്ഷേപങ്ങളും പരിഗണിച്ച ശേഷം പുതിയ പട്ടിക ജൂലൈ ഒന്നിന് പ്രസിദ്ധീകരിക്കും. ജൂലൈ എട്ടുവരെ രണ്ടാംഘട്ട അപ്പീല് നല്കാം. ജില്ലാ കളക്ടര് അധ്യക്ഷനായ സമിതിയാണ് രണ്ടാംഘട്ട അപ്പീലുകള് പരിശോധിക്കുക.തുടര്ന്ന് കരട് പട്ടിക ജൂലൈ 22ന് പ്രസിദ്ധീകരിക്കും. ഈ പട്ടിക ഗ്രാമ/ വാര്ഡ് സഭകളും, പഞ്ചായത്ത്/ നഗരസഭാ ഭരണ സമിതികളും ചര്ച്ച ചെയ്ത് അംഗീകരിക്കും. ഓഗസ്റ്റ് 16 ന് അന്തിമപട്ടിക പ്രസിദ്ധീകരിക്കും.