വീട്ടൂര്‍ എബനേസര്‍ ഹയര്‍ സെക്കന്ററി സ്‌കൂള്‍ പ്രവേശനോത്സവം വേറിട്ട പരിപാടികള്‍ കൊണ്ട് ശ്രദ്ധേയമായി. കുട്ടികളുടെ പ്രിയങ്കരരായ കാര്‍ട്ടൂണ്‍ കഥാപാത്രങ്ങളായ സ്‌പൈഡര്‍ മാന്‍ സ്‌പൈഡര്‍ വുമണ്‍, ക്യാപ്റ്റന്‍ അമേരിക്ക, അയണ്‍മാന്‍, സൂപ്പര്‍ വുമണ്‍ എന്നിവരുടെ വേഷം ധരിച്ച കുട്ടികള്‍ ചേര്‍ന്ന് നവാഗതരെ മധുരം നല്‍കി സ്വീകരിച്ചു. പ്രവേശനോത്സവഗാനത്തിന്റെ നൃത്താവിഷ്‌കാരത്തോടെ ചടങ്ങുകള്‍ ആരംഭിച്ചു.
പരിസ്ഥിതി സൗഹാര്‍ദ്ദപരമായി സജ്ജീകരിച്ച അലങ്കാരങ്ങളും കൗതുകമായി. അറിവിന്റെ മാന്ത്രികന്‍ അശ്വമേധം ഫെയിം ഗ്രാന്‍ഡ് മാസ്റ്റര്‍ ജിഎസ് പ്രദീപ് ഉദ്ഘാടനം നിര്‍വ്വഹിച്ചു കൊണ്ട് ദീര്‍ഘനേരം കുട്ടികളുമായി സംവദിച്ചു. ജീവിതവിജയത്തിന്റെ താക്കോല്‍ അറിവിലാണെന്ന സന്ദേശമാണ് അദ്ദേഹം കൂട്ടികള്‍ക്കു നല്‍കിയത്.സ്‌കൂള്‍ മാനേജര്‍ കമാന്റര്‍ സി.കെ.ഷാജി സ്വാഗതം ആശംസിച്ചു.
വാര്‍ഡ് മെമ്പര്‍ എല്‍ദോ പി.കെ അധ്യക്ഷത വഹിച്ചു. റവ.ഫാ: ജോര്‍ജ് മാന്തോട്ടം കോര്‍ എപ്പിസ്‌കോപ്പ അനുഗ്രഹ പ്രഭാഷണം നടത്തി. പ്രിന്‍സിപ്പല്‍ ബിജുകുമാര്‍, സീനിയര്‍ അധ്യാപിക ജീമോള്‍ കെ. ജോര്‍ജ്, പിടിഎ പ്രസിഡന്റ് പ്രമോദ് ഘോഷ്, എംപിടിഎ പ്രസിഡന്റ് അനി എല്‍ദോ എന്നിവര്‍ ആശംസകള്‍ അര്‍പ്പിച്ച് സംസാരിച്ചു. ഹെഡ്മിസ്ട്രസ് അനിത കെ.നായര്‍ ചടങ്ങില്‍ നന്ദി പ്രകാശിപ്പിച്ചു. സ്‌കൂളിലെ പൂര്‍വ്വ വിദ്യാര്‍ത്ഥിനിയും ഇന്ത്യന്‍ വോയ്‌സ് ജൂനിയര്‍ മത്സര വിജയിയുമായ ഭാവന വിജയന്റെ ഗാനാലാപനവും ചടങ്ങിന് മിഴിവേകി.
