തിരുവനന്തപുരം: റോഡ് സുരക്ഷ ഉറപ്പാക്കുകയാണ് സംസ്ഥാന സര്‍ക്കാര്‍ എഐ ക്യാമറ സ്ഥാപിച്ചതിലൂടെ ലക്ഷ്യമാക്കുന്നതെന്ന് മുഖ്യമന്ത്രി പിണറായി വിജയന്‍ പറഞ്ഞു. എഐ ക്യാമറകളുടെ സംസ്ഥാന തല ഉദ്ഘാടനം നിര്‍വ്വഹിച്ചു സംസാരിക്കുകയായിരുന്നു മുഖ്യമന്ത്രി. റോഡ് അപകടങ്ങളിലൂടെ ജീവന്‍ അപകടത്തിലാവരുത്. സുഗമമായ സഞ്ചാരം ഉറപ്പ് വരുത്തണം. ഇതിനായി സാങ്കേതികവിദ്യ ഉപയോഗിക്കുകയാണ്. 14 ജില്ലകളിലും ജില്ലാതല കണ്‍ട്രോള്‍ റൂമുകള്‍ ഉണ്ടാകും. വാഹനം തടഞ്ഞുനിര്‍ത്തിയുള്ള പരിശോധന കുറയുമെന്നും മുഖ്യമന്ത്രി പറഞ്ഞു.
എഐ ക്യാമറ ഉള്‍പ്പെട്ട സേഫ് കേരള പദ്ധതിയും പിവിസി പിഇടിജി ലെസന്‍സ് കാര്‍ഡിന്റെ ഉദ്ഘാടനവും തിരുവനന്തപുരത്ത് നടന്ന ചടങ്ങില്‍ മുഖ്യമന്ത്രി നിര്‍വഹിച്ചു.
എഐ ക്യാമറ കണ്ടെത്തുന്ന നിയമലംഘനങ്ങള്‍ക്ക് ഒരു മാസത്തേക്ക് മോട്ടോര്‍ വാഹന വകുപ്പ് പിഴയീടാക്കില്ലെന്ന് ഗതാഗത മന്ത്രി ആന്റണി രാജു അറിയിച്ചു. മെയ് 19 വരെ ബോധവല്‍ക്കരണം മാത്രമായിരിക്കും നിയമലംഘകര്‍ക്കുള്ള നടപടി. ക്യാമറ സ്ഥാപിക്കുന്നതിന് മുമ്പ് ബോധവല്‍ക്കരണം നടത്തിയില്ല എന്ന പരാതി ഉയര്‍ന്നതിന്റെ അടിസ്ഥാനത്തിലാണ് പുതിയ തീരുമാനമെന്നും മന്ത്രി വ്യക്തമാക്കി.
വ്യാഴാഴ്ച മുതലാണ് സംസ്ഥാനത്ത് എഐ ക്യാമറകള്‍ മിഴി തുറന്നത്. 726 അത്യാധുനിക നിരീക്ഷണ ക്യാമറകളാണ് ഇതിനായി സ്ഥാപിച്ചിട്ടുള്ളത്. ഗതാഗത നിയമം ലംഘിച്ചുണ്ടാകുന്ന അപകടങ്ങള്‍ ഒഴിവാക്കുന്നതിനു വേണ്ടിയാണ് നിയമം കര്‍ശനമാക്കുന്നത്.
