മൂവാറ്റുപുഴ: നഗരസഭാ ശ്മശാനത്തിന് സമീപം കണ്ടെത്തിയ വീട്ടമ്മയുടെ മൃതദേഹം പോസ്റ്റ്മോര്ട്ടത്തിനായി കളമശ്ശേരി മെഡിക്കല് കോളേജിലേക്ക് മാറ്റി. ഇടുക്കി പെരിയാര്വാലി പുത്തന്പുര ഭാസ്കരന്റെ ഭാര്യ കമലാക്ഷി (68) യെയാണ് ഇന്നലെ വൈകിട്ട് 4.30ഓടെ 130 ജംഗ്ഷന് സമീപം നഗരസഭാ ശ്മശാനത്തിനും മൃഗാശുപത്രിക്കും ഇടയിലുള്ള നഗരസഭയുടെ തന്നെ ഉടമസ്ഥയിലുള്ള സ്ഥലത്ത് മരിച്ച നിലയില് കണ്ടെത്തിയത്. ചികിത്സയുടെ ഭാഗമായി മൂവാറ്റുപുഴയിലെ സ്വകാര്യ ലോഡ്ജില് താമസിച്ചു വരികയായിരുന്നു കമലാക്ഷി.
പ്രദേശത്ത് രൂക്ഷമായ ദുര്ഗന്ധം അനുഭവപ്പെട്ടതിനെ തുടര്ന്ന് സമീപത്തെ പുരയിടം വൃത്തിയാക്കാന് എത്തിയ തൊഴിലാളി നടത്തിയ പരിശോധനയിലാണ് മൃതദേഹം കണ്ടെത്തിയത്. ഈ മാസം നാലു മുതല് കമലാക്ഷിയെ കാണ്മാനില്ലെന്ന് കാണിച്ച് മകന് സന്തോഷ് മൂവാറ്റുപുഴ പോലീസ് സ്റ്റേഷനില് പരാതിപ്പെട്ടിരുന്നു. തുടര്ന്ന് പോലീസ് കമലാക്ഷിക്കായുള്ള തിരച്ചില് നടത്തിവരുന്നതിനിടയിലാണ് ഇന്നലെ മൃതദേഹം കണ്ടെത്തിയത്.
മൃതദേഹത്തിന് മൂന്ന് ദിവസത്തെ പഴക്കമുണ്ടെന്നാണ് പോലീസിന്റെ പ്രാഥമിക നിഗമനം. സംഭവസ്ഥലത്ത് തന്നെ പോലീസ് കാവലില് സൂക്ഷിച്ചിരുന്ന മൃതദേഹം ഇന്ന് രാവിലെയാണ് കളമശ്ശേരി മെഡിക്കല് കോളേജിലേക്ക് മാറ്റിയത്. ഫോറന്സിക് വിഭാഗവും സ്ഥലത്തെത്തി പരിശോധന നടത്തിയിരുന്നു.