മലപ്പുറം: പെരിന്തല്മണ്ണയിലെ ബാലറ്റ് പെട്ടി കാണാതായ സംഭവത്തില് പൊലീസ് കേസെടുത്തു. ജനപ്രാതിനിത്യ നിയമ പ്രകാരമാണ് പൊലീസ് കേസെടുത്തത്. ജില്ലാ കളക്ടര് എസ്പിക്ക് നല്കിയ അന്വേഷണ റിപ്പോര്ട്ടിന്റെ അടിസ്ഥാനത്തിലാണ് നടപടി.
പെരിന്തല്മണ്ണ നിയമസഭാ തെരഞ്ഞെടുപ്പ് ഫലത്തില് തര്ക്കത്തിലായിരുന്ന വോട്ടുപെട്ടികളില് ഒന്നാണ് കാണാതാകുകയും പിന്നീട് മറ്റൊരിടത്ത് കണ്ടെത്തുകയും ചെയ്തത്. ഹൈക്കോടതിയിലേക്ക് മാറ്റണമെന്ന ഉത്തരവിനെ തുടര്ന്ന് പെട്ടി കൊണ്ടുപോകാന് ട്രഷറിയിലെത്തി സ്ട്രോങ് റൂം തുറന്നപ്പോഴാണ് പെട്ടി കാണാനില്ലെന്ന് വ്യക്തമായത്. പിന്നീട് മലപ്പുറം സഹകരണ ജോയിന്റ് രജിസ്ട്രാര് ഓഫീസില് നിന്നാണ് പെട്ടി കണ്ടെത്തിയത്.
സംഭവത്തില് നാല് ഉദ്യോഗസ്ഥര്ക്ക് ജില്ലാ കലക്ടര് കാരണം കാണിക്കല് നോട്ടീസ് നല്കിയിരുന്നു. പെരിന്തല്മണ്ണ ട്രഷറി ഓഫീസര് എന്. സതീഷ് കുമാര്, സീനിയര് അക്കൗണ്ടന്റ് എസ്. രാജീവ്, സഹകരണ ജോ. രജിസ്ട്രാര് ഓഫീസിലെ സീനിയര് ഇന്സ്പെക്ടര് സി എന് പ്രതീഷ്, നിലവില് തിരുവനന്തപുരത്ത് ജോ. രജിസ്ട്രാറായ എസ് പ്രബിത്ത് എന്നിവര്ക്കായിരുന്നു ഒരാഴ്ചക്കുള്ളില് മറുപടി നല്കണമെന്നാവശ്യപ്പെട്ടുള്ള നോട്ടീസ്. ഉദ്യോഗസ്ഥര് കഴിഞ്ഞ ദിവസം നോട്ടീസിന് മറുപടി നല്കി.
ജില്ല കലക്ടറുടെ നേതൃത്വത്തില് നടത്തിയ അന്വേഷണ റിപ്പോര്ട്ടും ഉദ്യോഗസ്ഥരുടെ വിശദീകരണവും ഉള്പ്പെടുത്തിയാണ് അന്തിമ റിപ്പോര്ട്ട് മുഖ്യതെരഞ്ഞെടുപ്പ് ഓഫീസര്ക്ക് കൈമാറുക. ഇതിന് ശേഷമാകും സംഭവത്തില് തുടര്നടപടികള് സ്വീകരിക്കുക.