പാലാരിവട്ടം അഴിമതിക്കേസില്‍ പ്രതിയായ മുന്‍ മന്ത്രി ഇബ്രാഹിം കുഞ്ഞിന്റെ ആരോഗ്യസ്ഥിതി വ്യക്തമാകാന്‍ മെഡിക്കല്‍ ബോര്‍ഡ് രൂപീകരിക്കണമെന്ന് മൂവാറ്റുപുഴ വിജിലന്‍സ് കോടതി. വിജിലന്‍സ് സമര്‍പ്പിച്ച കസ്റ്റഡി അപേക്ഷയും ഇബ്രാഹിം കുഞ്ഞിന്റെ ജാമ്യാപേക്ഷയും ചൊവ്വാഴ്ച പരിഗണിക്കാനായി മാറ്റിവച്ചു കൊണ്ടാണ് കോടതി നിര്‍ദേശം. മന്ത്രിയും റോഡ് ഫണ്ട് ബോര്‍ഡ് വൈസ് ചെയര്‍മാനുമെന്ന നിലയില്‍ ഇബ്രാഹിം കുഞ്ഞിന് ഉത്തരവാദിത്വത്തില്‍നിന്ന് ഒഴിവാകാനാകില്ലെന്നും വിജിലന്‍സ് കോടതിയില്‍ പറഞ്ഞു.
റോഡ് ഫണ്ട് ബോര്‍ഡില്‍നിന്നാണ് റോഡ്‌സ് ആന്‍ഡ് ബ്രിഡ്ജസ് കോര്‍പറേഷന് പാലം പണിക്കായി പണം അനുവദിച്ചത്.മന്ത്രിയായിരുന്ന ഇബ്രാഹിം കുഞ്ഞായിരുന്നു ഫണ്ടിങ് ഏജന്‍സിയായ റോഡ് ഫണ്ട് ബോര്‍ഡിന്റെ വൈസ് ചെയര്‍മാന്‍. ഇബ്രാഹിം കുഞ്ഞിന്റെ ജാമ്യാപേക്ഷയെ എതിര്‍ത്തു കൊണ്ടാണ് വിജിലന്‍സിന്റെ ഈ വാദം. അറസ്റ്റ് ഉണ്ടായത് ആശുപത്രിയില്‍ വച്ചായതിനാല്‍ കസ്റ്റഡിയില്‍ നല്‍കണമെങ്കില്‍ പ്രതിയുടെ ആരോഗ്യസ്ഥിതി വ്യക്തമാകണമെന്ന് ചൂണ്ടിക്കാട്ടിയാണ് ജനറല്‍ ആശുപത്രിയിലെ ഡോക്ടര്‍മാര്‍ ഉള്‍പ്പെടുന്ന മെഡിക്കല്‍ ബോര്‍ഡ് രൂപീകരിക്കാന്‍ കോടതി നിര്‍ദേശിച്ചത്.
ഇതിന്റെ അടിസ്ഥാനത്തില്‍ വിജിലന്‍സ് കോടതിയില്‍ പ്രത്യേകം അപേക്ഷ സമര്‍പിച്ചു. അതേസമയം കൈക്കൂലി വാങ്ങിയിട്ടില്ലെന്ന് ഇബ്രാഹിം കുഞ്ഞിന്റെ അഭിഭാഷകന്‍ കെ.രാമന്‍പിള്ള കോടതിയില്‍ പറഞ്ഞു. പാലം നിര്‍മാണത്തിന് അനുമതി നല്‍കിയത് കൊണ്ടുമാത്രമാണ് പ്രതി ചേര്‍ത്തത്. മൊബിലൈസേഷന്‍ ഫണ്ട് അനുവദിച്ചതില്‍ ക്രമക്കേടില്ല. ഇതിന് ക്യാബിനറ്റിന്റെ അനുമതി ആവശ്യമില്ലെന്നും അഭിഭാഷകന്‍ കോടതിയില്‍ പറഞ്ഞു.
