ഒരേ വ്യക്തിയുമായി പ്രണയ ബന്ധത്തിന് ശേഷം അയാളെ വിവാഹം കഴിക്കാത്തത് വഞ്ചനയല്ലെന്നും ഇത് ഇന്ത്യന് ശിക്ഷാ നിയമത്തിലെ (ഐപിസി) സെക്ഷന് 420 ബാധകമല്ലെന്നും കര്ണാടക ഹൈക്കോടതി. കാമുകനെതിരെ യുവതി നല്കിയ വഞ്ചന പരാതിയില് എഫ്ഐആര് പരിഗണിക്കുന്നതിനിടെയാണ് ജസ്റ്റിസ് കെ നടരാജന് അധ്യക്ഷനായ സിംഗിള് ബെഞ്ച് ശനിയാഴ്ച ഇത്തരത്തില് വിധി പ്രഖ്യാപിച്ചത്.
യുവാവിനും കുടുംബാംഗങ്ങള്ക്കുമെതിരെ രജിസ്റ്റര് ചെയ്ത എഫ്ഐആര് ഹൈക്കോടതി റദ്ദാക്കി. വഞ്ചനാപരമായ ഉദ്ദേശ്യത്തോടെയല്ല വിവാഹം കഴിക്കാമെന്ന് പറഞ്ഞ വാക്ക് ലംഘിച്ചതെന്നും വഞ്ചനാപരമായ ഉദ്ദേശ്യത്തോടെയാണ് ഇത് ചെയ്തതെന്ന് പറയാനാകില്ലെന്നും കോടതി നിരീക്ഷിച്ചു.
കാമുകനും കുടുംബവും തന്നെ വഞ്ചിച്ചെന്ന് ആരോപിച്ച് ഒരു സ്ത്രീ പരാതി നല്കിയതിനെത്തുടര്ന്ന് 2020 മെയ് 5 നാണ് വഞ്ചനാക്കുറ്റത്തിന് രാമമൂര്ത്തിനഗര് പോലീസ് യുവാവിനും കുടുംബത്തിനും എതിരെ കേസ് എടുത്ത് എഫ്ഐആര് രജിസ്റ്റര് ചെയ്തത്.
എട്ട് വര്ഷമായി ഇവര് പ്രണയത്തില് ആയിരുന്നു. എന്നാല്, യുവാവിന്റെ കുടുംബം മറ്റൊരു പെണ്കുട്ടിയുമായി വിവാഹം നിശ്ചയിച്ചു. ഇതോടെ യുവാവ് പരാതിക്കാരിയായ യുവതിയെ വിവാഹം കഴിക്കാന് സാധിക്കില്ലെന്ന് അറിയിക്കുകയായിരുന്നു. എഫ്ഐആര് ഇട്ടതിനെതിരെ യുവാവും കുടുംബവുമാണ് ഹൈക്കോടതിയെ സമീപിച്ചത്.