ഒടുവില് ലോകം കാത്തിരുന്ന ആ പേരുകള്ക്കവകാശിയായി. ലോക്ക് ഡൗണില് തങ്ങള് അനുഭവിച്ച ബുദ്ധിമുട്ടുകള്ക്കും കഷ്ടപ്പാടുകള്ക്കും ഓര്മയായിട്ടാണ് ഛത്തീസ്ഗഡിലെ റായ്പൂരിലെ മാതാപിതാക്കള് ഈ പേരുകള് മക്കള്ക്ക് തെരഞ്ഞെടുത്തത്.
കഴിഞ്ഞ മാസം 26ന് അര്ദ്ധരാത്രിയിലാണ് കൊറോണയുടെയും കൊവിഡിന്റെയും ജനനം. ലോക്ക് ഡൗണില്, എല്ലാവരും ദുരിതം അനുഭവിക്കുമ്പോള് ജനിച്ചതിനാലാണ് കുട്ടികള്ക്ക് ഈ പേരിട്ടത് തന്നെ. എന്നാല് ചിലപ്പോള് മക്കളുടെ പേര് മാറ്റാനും സാധ്യതയുണ്ടെന്ന് മാതാപിതാക്കള് പറയുന്നു. സിസേറിയനിലൂടെ പുറത്തെത്തിയ രണ്ടു കുട്ടികളും സുഖമായിരിക്കുന്നുവെന്ന് ആശുപത്രി അധികൃതര് വ്യക്തമാക്കി.
ഇപ്പോള് ഞങ്ങള് ആണ്കുട്ടിക്ക് പേരിട്ടിരിക്കുന്നത് കൊവിഡ് എന്നും പെണ്കുഞ്ഞിന് പേര് നല്കിയിരിക്കുന്നത് കൊറോണയെന്നുമാണ്’ 27 വയസുകാരിയായ അമ്മ പ്രീതി വെര്മ വാര്ത്താ ഏജന്സിയായ പിടിഐയോട് പറഞ്ഞു. ‘കുട്ടികളുടെ പ്രസവം നടന്നത് ഒരുപാട് കഷ്ടപ്പാടുകളും ബുദ്ധിമുട്ടുകളും നേരിട്ടുകൊണ്ടാണ്. അതിനാല് തന്നെ എന്റെ ഭര്ത്താവിനും എനിക്കും ആ ദിവസം മറക്കാന് കഴിയില്ല. വൈറസ് ഭീകരവും ജീവന് ഭീഷണിയുമാണ്. എന്നാല് അവയുടെ വരവ് ഒരുപാട് നല്ല ശീലങ്ങള് ആളുകളിലുണ്ടാക്കി. വൃത്തിയും വെടിപ്പും ശീലിക്കാന് കാരണമായി. അതിനാലാണ് ഈ പേരുകള് ഞങ്ങളിലുടക്കിയത്.’
പ്രീതിക്ക് പ്രസവ വേദന തുടങ്ങിയതിനാല് ആംബുലന്സിനെ വിളിച്ചു. എന്നാല് ആംബുലന്സിന് കനത്ത ചെക്കിംഗ് കടന്നാണ് ആശുപത്രിയിലെത്താനായത്. പക്ഷേ ലോക്ക് ഡൗണ് ആയതിനാല് ബന്ധുക്കള്ക്കൊന്നും ആശുപത്രിയിലെത്താന് സാധിച്ചില്ല. കുഞ്ഞുങ്ങള് ജനിച്ചത് ബിആര് അംബേദ്കര് മെമ്മോറിയല് ആശുപത്രിയിലാണ്. ഇപ്പോള് ആശുപത്രിയിലെ ജീവനക്കാരും സ്നേഹത്തോടെ അവരെ കൊവിഡെന്നും കൊറോണയെന്നും വിളിക്കുന്നു.