കൊച്ചി:ഈ വര്ഷം അവസാനo എല്ലാ ആദിവാസി ഊരുകളിലും ഇന്റര്നെറ്റ് കണക്ടിവിറ്റി എത്തിക്കും മുഖ്യമന്ത്രി പിണറായി വിജയന്.ഡിജിറ്റല് പഠന സൗകര്യമൊരു ക്കുന്നതിന്റെ ഭാഗമായി ഈ വര്ഷാവസാനത്തോടെ എല്ലാ ആദിവാസി ഊരുകളിലും ഇന്റര്നെറ്റ് കണക്ടിവിറ്റി എത്തിക്കുന്നതിനുള്ള പ്രവര്ത്തനങ്ങള് ദ്രുതഗതിയില് നടക്കുകയാണെന്ന് മുഖ്യമന്ത്രി പറഞ്ഞു. എറണാകുളം ടൗണ്ഹാളില് പട്ടികജാതി പട്ടിക വര്ഗ പിന്നാക്ക വിഭാഗ വികസന വകുപ്പിന്റെ ആഭിമുഖ്യത്തില് സംഘടിപ്പിച്ച സാമൂഹ്യഐക്യദാര്ഢ്യ പക്ഷാചരണം 2023 ന്റെ സംസ്ഥാനതല ഉദ്ഘാടനം നിര്വഹിക്കുകയായിരുന്നു മുഖ്യമന്ത്രി.
കണക്ടിവിറ്റി ഇല്ലാതിരുന്ന 1284 ഊരുകളില് 1083 ലും ഇന്റര്നെറ്റ് സൗകര്യം എത്തിച്ചു. വിദ്യാഭ്യാസം, തൊഴില്, ശാക്തീകരണം എന്നീ മൂന്ന് അടിസ്ഥാനശിലകളില് ഊന്നി നിന്നുകൊണ്ട് പട്ടികജാതി, പട്ടികവര്ഗ, പിന്നാക്ക വിഭാഗങ്ങളുടെ ക്ഷേമവും വികസനവും ലക്ഷ്യമിടുന്ന വിവിധ പദ്ധതികളാണ് സംസ്ഥാനത്ത് നടപ്പാക്കുന്നത്.
ഒന്നാം ക്ലാസ് മുതല് എട്ടാം ക്ലാസ് വരെയുള്ള പിന്നാക്ക വിഭാഗ വിദ്യാര്ഥികളുടെ പ്രീ മെട്രിക് സ്കോളര്ഷിപ്പ് കേന്ദ്രസര്ക്കാര് നിര്ത്തലാക്കിയതിനു പകരമായി സംസ്ഥാന സര്ക്കാര് ആവിഷ്ക്കരിച്ച സ്കോളര്ഷിപ്പ് പദ്ധതി കെടാവിളക്കിന്റെ പോര്ട്ടല് ഓപ്പണിംഗ് മുഖ്യമന്ത്രി ഉദ്ഘാടനം ചെയ്തു. നിയമ ബിരുദധാരികളായ പട്ടികവിഭാഗക്കാരെ എ.ജി. ഓഫീസിലും ഗവ. പ്ലീഡര്മാരുടെ ഓഫീസുകളിലും പ്രവൃത്തി പരിചയത്തിന് ഓണറേറിയത്തോടു കൂടു നിയമിക്കുന്ന ജസ്റ്റിസ് വെല്ഫെയര് ആന്ഡ് ലീഗല് അസിസ്റ്റന്സ് (JWALA) പദ്ധതിയുടെ ഉദ്ഘാടനവും മുഖ്യമന്ത്രി നിര്വഹിച്ചു.
മാലിന്യ മുക്ത നവകേരള പ്രതിജ്ഞയോടെയാണ് ചടങ്ങുകള് തുടങ്ങിയത്. മേയര് അഡ്വ. എം. അനില്കുമാര് പ്രതിജ്ഞ ചൊല്ലിക്കൊടുത്തു. മന്ത്രി കെ. രാധാകൃഷ്ണന് അധ്യക്ഷത വഹിച്ചു. മന്ത്രിമാരായ പി. രാജീവ്, എം.ബി. രാജേഷ്, ഹൈബി ഈഡന് എം.പി., എംഎല്എമാരായ പി.വി. ശ്രീനിജിന്, കെ.എന്. ഉണ്ണികൃഷ്ണന്, ടി.ജെ. വിനോദ്, വാര്ഡ് കൗണ്സിലര്മാരായ പി.ആര്. റെനീഷ്, സുധ ദിലീപ് കുമാര്, സുനിത ഡിക്സണ്, വി.വി. പ്രവീണ്, സംസ്ഥാനതല പട്ടികജാതി ഉപദേശക സമിതി അംഗം സി. രാജേന്ദ്രന്, പട്ടികവര്ഗ ഉപദേശക സമിതി അംഗം ആര്. ദാമോദരന്, പട്ടികജാതി പിന്നാക്ക വിഭാഗ വികസന വകുപ്പ് ഡയറക്ടര് കെ. ഗോപാലകൃഷ്ണന് തുടങ്ങിയവര് പങ്കെടുത്തു.
