കണ്ണൂര്: ക്ഷേത്രോത്സവത്തിന്റെ ഭാഗമായുള്ള കലശത്തില് സിപിഐഎം നേതാവ് പി ജയരാജന്റെ ചിത്രം ഉള്പ്പെടുത്തിയതില് അത്ഭുതപ്പെടാനൊന്നുമില്ലെന്നും പാര്ട്ടി എത്തിച്ചേര്ന്നിരിക്കുന്ന അവസ്ഥയുടെ നേര്ച്ചിത്രമാണ് ഇതില് നിന്നും വ്യക്തമാകുന്നതെന്നും ആര്എസ്പി സംസ്ഥാന സെക്രട്ടറി ഷിബു ബേബിജോണ് ആരോപിച്ചു. എന്നാല് അക്കൂട്ടത്തില് ചെഗുവേരയുടെ ചിത്രം കൂടി ഉള്പ്പെടുത്തിയതാണ് തന്നെ അത്ഭുതപ്പെടുത്തിയതെന്നും അദ്ദേഹം ഫേസ്ബുക്കില് കുറിച്ചു. അദ്ദേഹമിന്ന് ജീവിച്ചിരുന്നെങ്കില് ക്യൂബയില് നിന്ന് കേരളത്തിലേക്ക് വണ്ടി കയറിയേനെ, അമ്മായിയപ്പനേയും മരുമോനെയുമടക്കം എല്ലാ സ്തുതിപാടകരെയും കൈകാര്യം ചെയ്യാനെന്നും ഷിബുവിന്റെ കുറിപ്പിലുണ്ട്.
പോസ്റ്റിന്റെ പൂര്ണ്ണരൂപം: ‘‘കണ്ണൂര് കതിരൂരിലെ ക്ഷേത്രത്തില് പി ജയരാജന്റെ ചിത്രവുമായി സിപിഐഎമ്മുകാര് കലാശമെഴുന്നള്ളിച്ചതില് അത്ഭുതപ്പെടാനൊന്നുമില്ല. അത് ഇന്ന് ആ പാര്ട്ടി എത്തിച്ചേര്ന്നിരിക്കുന്ന അവസ്ഥയുടെ നേര്ച്ചിത്രമാണ്. എന്നാല് അക്കൂട്ടത്തില് ചെഗുവേരയുടെ ചിത്രം കൂടി ഉള്പ്പെടുത്തിയതാണ് എന്നെ അത്ഭുതപ്പെടുത്തുന്നത്. അദ്ദേഹമിന്ന് ജീവിച്ചിരുന്നെങ്കില് ക്യൂബയില് നിന്ന് കേരളത്തിലേക്ക് വണ്ടി കയറിയേനെ, അമ്മായിയപ്പനേയും മരുമോനെയുമടക്കം എല്ലാ സ്തുതിപാടകരെയും കൈകാര്യം ചെയ്യാന്.” കതിരൂര് പുല്യോട്ടുംകാവ് ക്ഷേത്രോത്സവത്തിന്റെ ഭാഗമായുള്ള കലശത്തിലാണ് പി ജയരാജന്റെ ചിത്രം ഉള്പ്പെടുത്തിയത്. തെയ്യത്തിന്റെയും പാര്ട്ടി ചിഹ്നത്തിന്റെയും ഒപ്പമായിരുന്നു ജയരാജന്റെ ചിത്രം. ചെഗുവേരയുടെ ചിത്രവും കലശത്തില് ഉണ്ടായിരുന്നു. സംഭവത്തിനെതിരെ കണ്ണൂര് ജില്ലാ സെക്രട്ടറി എം വി ജയരാജന് രംഗത്തെത്തിയിരുന്നു. കലശത്തില് പാര്ട്ടി നേതാക്കളുടെ ചിത്രവും ചിഹ്നവും ഉള്പ്പെടുത്തിയത് പാര്ട്ടി നിലപാടിന് വിരുദ്ധമാണെന്ന് എം വി ജയരാജന് പറഞ്ഞു. കലശങ്ങളും ഘോഷയാത്രകളുമൊക്കെ രാഷ്ട്രീയ ചിഹ്നങ്ങളോ രാഷ്ട്രീയ നേതാക്കളുടെ ചിത്രങ്ങളോ ഇല്ലാതെയാണ് നടക്കേണ്ടത്. വിശ്വാസത്തെ രാഷ്ട്രീയവത്കരിക്കാന് പാടില്ലെന്നും അദ്ദേഹം പറഞ്ഞു.