കൊച്ചി: തൃക്കാക്കര ഉപതെരഞ്ഞെടുപ്പില് ആദ്യ മണിക്കൂറില് തന്നെ വോട്ടുചെയ്ത് സ്ഥാനാര്ത്ഥികള്. പാലാരിവട്ടം ബൂത്തില് യുഡിഎഫ് സ്ഥാനാര്ത്ഥി ഉമാതോമസ് വോട്ട് രേഖപ്പെടുത്തി. വിജയിക്കുമെന്ന ആത്മവിശ്വാസമുണ്ടെന്നും പി ടി തോമസിന്റെ ആത്മാവ് ഒപ്പമുണ്ടെന്നും തൃക്കാക്കരയിലെ ജനങ്ങള് അംഗീകരിക്കുമെന്ന ഉറച്ച വിശ്വാസമുണ്ടെന്നും ഉമ തോമസ് പറഞ്ഞു. പടമുകള് സ്കൂളിലെ 140 ആം നമ്പര് ബൂത്തിലാണ് ഇടതുമുന്നണി സ്ഥാനാര്ത്ഥി ഡോ. ജോ ജോസഫും ഭാര്യ ദയ പാസ്കലും വോട്ടുകള് രേഖപ്പെടുത്തിയത്. എല്ഡിഎഫ് സെഞ്ചുറിയടിക്കുമെന്ന ആത്മവിശ്വാസത്തിലാണ് വേട്ട് രേഖപ്പെടുത്തിയതെന്നും ജോ ജോസഫ് പറഞ്ഞു. മഴമാറി നില്ക്കുന്നു. അനുകൂലമായ കാലാവസ്ഥയാണ് ഇപ്പോള് ഉള്ളതെന്നുമായിരുന്നു ആദ്യ പ്രതീകരണം. നൂറ് ശതമാനം വിജയ പ്രതീക്ഷയെന്ന് എന്ഡിഎ സ്ഥാനാര്ത്ഥി എഎന് രാധാകൃഷ്ണന്. ബിജെപിക്കനുകൂലമായ ശക്തമായ അടിയൊഴുക്ക് മണ്ഡലത്തിലുണ്ടെന്നും എഎന് രാധാകൃഷ്ണന് പറഞ്ഞു. ‘നൂറ് ശതമാനം വിജയ പ്രതീക്ഷയുണ്ട്. ഞങ്ങള്ക്കനുകൂലമായ അടിയൊഴുക്ക് ഇവിടെ നടക്കുന്നുണ്ട്. ആ അടിയൊഴുക്കില് ഞാന് പ്രതീക്ഷിക്കുന്നുവെന്നും രാധാകൃഷ്ണന് പറഞ്ഞു.
ഉമാതോമസ്
‘നല്ല ആത്മവിശ്വാസമുണ്ട്. പിടിയുടെ ആത്മാവ് എന്നോട് കൂടിയുണ്ട്. ഈശ്വരാനുഗ്രഹം ഉണ്ട്. തൃക്കാക്കരയിലെ ജനത എന്നെ മനസ്സില് അംഗീകരിക്കും എന്ന് ഉത്തമ വിശ്വാസത്തിലാണ് പോവുന്നത്. തീര്ച്ചയായും നല്ല വിജയം നേടാനാവും. രാവിലെ മഴയുണ്ടാവുമോയെന്ന് പലരും സംശയം പ്രകടിപ്പിച്ചിരുന്നു. പക്ഷെ പ്രകൃതി പോലും അനുഗ്രഹിച്ചിരിക്കുകയാണ്. എല്ലാം അനുകൂലമായ ഘടകങ്ങളാണ്. എല്ലാവരുടെയും പ്രാര്ത്ഥനയും അനുഗ്രഹവും എനിക്കുണ്ടാവും,’ ഉമ തോമസ് പറഞ്ഞു. പി ടിയെ പ്രാര്ത്ഥിച്ച് തന്നെയാണ് വോട്ട് ചെയ്തത്. പിടിയെ പിന്ഗാമായാവാനാണല്ലോ ഞാന് നില്ക്കുന്നത്. പിടിയുടെ പൂര്ത്തീകരണം തന്നെയാണ് എന്റെ മനസ്സിലെന്നും ഉമ തോമസ് കൂട്ടിച്ചേര്ത്തു. കലൂര് പള്ളിയിലും പാലാരിവട്ടം ഹരിഹരസുത ക്ഷേത്രത്തിലും ദര്ശനം നടത്തിയ ശേഷമാണ് ഉമ തോമസ് പോളിംഗ് ബൂത്തിലേക്കെത്തിയത്.
ജോ ജോസഫ്
ആകാശം തെളിഞ്ഞതിനാല് തന്റെ മനസ്സും തെളിഞ്ഞിരിക്കുന്നെന്ന് ജോ ജോസഫ് പറഞ്ഞു. വോട്ടര്മാരുടെ തിരക്ക് കാണുമ്പോള് ആത്മ വിശ്വാസം കൂടുന്നു, പൊളിങ് ശതമാനം കൂടുമെന്നും അദ്ദേഹം അഭിപ്രായപ്പെട്ടു. തെരഞ്ഞെടുപ്പ് നടക്കുന്ന മണ്ഡലത്തിലെ എല്ലാ ബൂത്തുകളും സന്ദര്ശിക്കുമെന്നും ജോ ജോസഫ് അറിയിച്ചു. ശുഭപ്രതീക്ഷയിലാണ് പോസറ്റീവ് പൊളിറ്റിക്സിന് ജനം വോട്ട് ചെയ്യുമെന്നും അദ്ദേഹം പറഞ്ഞു.