കൊച്ചി: കേരളകോണ്ഗ്രസ് പാര്ട്ടികള്ക്ക് പുറമേ ക്രൈസ്തവ സമൂഹത്തിന് വേണ്ടി പുതിയ രാഷ്ട്രീയ പാര്ട്ടി വരുന്നു. ബി.ജെ.പി. പിന്തുണയോടെയുള്ള പുതിയ പാര്ട്ടിയുടെ പേര് നാഷണലിസ്റ്റ് പ്രോഗ്രസ്സീവ് പാര്ട്ടി (എന്.പി.പി.) എന്നാണ്. കേരള കോണ്ഗ്രസ്, കോണ്ഗ്രസ് പാര്ട്ടികളില് എറണാകുളം, ഇടുക്കി ജില്ലകളില്നിന്നുള്ള രണ്ട് മുന് എം.എല്.എ.മാരും,രണ്ട് മുന് എം.പി.മരും പുതിയ പാര്ട്ടിയിലെത്തും. ഇവര്ക്കായി കേന്ദ്രസര്ക്കാര് നിയന്ത്രണത്തിലുള്ള ബോര്ഡ്, കോര്പ്പറേഷന് സ്ഥാനങ്ങള് പുതിയ പാര്ട്ടിയുടെ നേതാക്കള്ക്ക് നല്കും. ഇത് സംബന്ധിച്ചുള്ള ഉറപ്പും ബിജെപി നേതൃത്വം നല്കി കഴിഞ്ഞു.
മുന് മെത്രാന്റെ സാനിധ്യത്തില് ചില കോണ്ഗ്രസ്, കേരള കോണ്ഗ്രസ് നേതാക്കളുടെ നേതൃത്വത്തില് ഒരു വര്ഷത്തിലേറെയായി നടന്നുവരുന്ന ചര്ച്ചകള്ക്കൊടുവിലാണ് പാര്ട്ടി രൂപവത്കരിക്കാന് തീരുമാനിച്ചത്. നടപടികള് പൂര്ത്തിയാക്കി. പേര് നിര്ദ്ദേശിച്ചതും രജിസ്ട്രേഷന് നടപടികള് പൂര്ത്തിയാക്കുന്നതും ബി.ജെ.പി. കേന്ദ്രനേതൃത്വം തന്നെ. പാര്ലമെന്റ് തെരഞ്ഞെടുപ്പിനു മുന്നേ പാര്ട്ടിയുടെ ഔദ്യോഗിക പ്രഖ്യാപനമുണ്ടാകും, ബി.ഡി.ജെ.എസ്. പോലെ ഒരു പുതിയ ക്രൈസ്തവ പാര്ട്ടി രൂപവത്കരിച്ച് എന്.ഡി.എ.യുടെ ഭാഗമാക്കുകയാണ് ബി.ജെ.പി.യുടെ ലക്ഷ്യം.
വടക്കുകിഴക്കന് സംസ്ഥാനങ്ങളിലെ ചില ക്രൈസ്തവ ഗ്രൂപ്പുകളെക്കൂടി എന്.പി.പി.യുടെ ഭാഗമാക്കാനാണ് ശ്രമം. നിലവില് കേരളത്തില് പ്രവര്ത്തിക്കുന്ന ഒരു അല്മായ സംഘടനയും പുതിയ പാര്ട്ടിയില് ചേരും. ഡല്ഹി, എറണാകുളം, കോട്ടയം,തിരുവനന്തപുരം എന്നിവിടങ്ങളില് ഇതുസംബന്ധിച്ച ചര്ച്ചകള് പലതവണ കഴിഞ്ഞു. ചര്ച്ചകളില് കേരളത്തിലെ മുതിര്ന്ന ബി.ജെ.പി. നേതാക്കളും പങ്കെടുക്കുന്നുണ്ട്.