ഇടുക്കി : തികച്ചും മനുഷ്യത്വ രഹിതമായ സമീപനമാണ് ഇടുക്കിയിലെ ജനങ്ങളോട് സ്വീകരിക്കുന്നതെന്ന് ഡീന്‍ കുര്യാക്കോസ് എംപി. ഏലം നില്‍ക്കുന്നതെന്നും ഏലത്തിന് ഒരുക്കി ഇട്ടിരിക്കുന്നത് എന്നും ലാന്‍ഡ് രജിസ്റ്ററില്‍ തെറ്റായി രേഖപ്പെടുത്തിയതിന്റെ പേരില്‍ തോപ്രംകുടിയിലെ ആയിരക്കണക്കിന് കുടുംബങ്ങള്‍ക്ക് പട്ടയം നല്‍കാതെ സര്‍ക്കാര്‍ വഞ്ചിക്കുകയാണ്. ഇടുക്കിയിലെ കര്‍ഷകരുടെ പട്ടയ പ്രശ്‌നങ്ങള്‍ പരിഹരിക്കുന്നതിന് നടപടികള്‍ തുടങ്ങി വെച്ചത് മുന്‍ യുഡിഎഫ് സര്‍ക്കാരിന്റെ കാലത്താണ്. എന്നാല്‍ അതിന് തുടര്‍ നടപടികള്‍ സ്വീകരിക്കുവാന്‍ എല്‍ഡിഎഫ് സര്‍ക്കാരുകള്‍ കുറ്റകരമായ അനാസ്ഥ കാണിച്ചെന്ന് എംപി കുറ്റപ്പെടുത്തി.
എംപി നയിക്കുന്ന സമര യാത്ര ആറാം ദിവസത്തിലേക്ക് കടന്നു. തോപ്രംക്കുടിയില്‍ നിന്നും ആരംഭിച്ച യാത്ര പറത്തോട് സമാപിച്ചു.
കുടിയേറ്റ മേഖലകളിലും ഉപേക്ഷിക്കപ്പെട്ട പദ്ധതി മേഖലകളിലും പട്ടയം നല്‍കുന്നതിന് മുന്‍ ജില്ല കലക്ടര്‍ അനുകൂലമായ റിപ്പോര്‍ട്ട് സര്‍ക്കാരിന് നല്‍കിയെങ്കിലും സര്‍ക്കാര്‍ തീരുമാനമെടുത്തിട്ടില്ലെന്ന് എംപി കുറ്റപ്പെടുത്തി. പിഴ അടച്ചാല്‍ നിര്‍മ്മാണ നിരോധനം സാധുകരിക്കപ്പെടുമെന്ന സര്‍ക്കാര്‍ നിലപാട് ഉദ്യോഗസ്ഥ കൊള്ളക്കും കൈക്കൂലിക്കും വഴിവെക്കും. പ്രശ്‌നങ്ങള്‍ പരിഹരിക്കുന്നതിന് സര്‍ക്കാര്‍ ഉദാസീനത കാണിക്കുകയാണ്. കര്‍ഷകരെ സാര്‍ക്കാര്‍ എല്ലാ അര്‍ത്ഥത്തിലും ദ്രോഹിക്കുകയാണ്.
എല്‍ഡിഎഫ് മലയോര ജനതയെ കുത്തകകള്‍ക്ക് തീറെഴുതി നല്‍കിയെന്ന് യാത്രയുടെ ആറാം ദിനം ഉദ്ഘാടനം നിര്‍വഹിച്ച ഇബ്രാഹിം ക്കുട്ടി കല്ലാര്‍ പറഞ്ഞു. ബഫര്‍ സോണ്‍ യാഥാര്‍ഥ്യമാണെന്നാണ് എല്‍ഡിഎഫ് നേതാക്കള്‍ പറയുന്നത്. നാളെകളില്‍ ജനങ്ങളോട് സിപിഎമ്മിന് മറുപടി പറയേണ്ടി വരുമെന്ന് അദ്ദേഹം മുന്നറിയിപ്പ് നല്‍കി.
ജില്ലയില്‍ നിന്നുള്ള മന്ത്രിമാര്‍ കര്‍ഷകരുടെ വികാരം മുഖ്യമന്ത്രിയെ അറിയിക്കുന്നതില്‍ പരാജയപ്പെട്ടെന്ന് ചടങ്ങില്‍ മുഖ്യ പ്രഭാഷണം നടത്തിയ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി അബിന്‍ വര്‍ക്കി കോടിയാട്ട് പറഞ്ഞു. ഇടുക്കിയിലെ പ്രശ്‌നങ്ങളും ആശങ്കകളും കൃത്യമായി സര്‍ക്കാരിനെ ധരിപ്പിച്ചു പ്രശ്‌ന പരിഹാരത്തിന് ജില്ലയിലെ എല്‍ഡിഎഫ് നിയമസഭാംഗങ്ങള്‍ക്ക് സാധിക്കാത്തത് അവരുടെ കഴിവ് കെടാണെന്നും അദ്ദേഹം പറഞ്ഞു.
യുഡിഎഫ് മണ്ഡലം ചെയര്‍മാന്‍ വിനോദ് ജോസഫ് അധ്യക്ഷത വഹിച്ചു. കെ. ഫ്രാന്‍സിസ് ജോര്‍ജ് എക്‌സ് എം.പി, ഡിസിസി പ്രസിഡന്റ് സി.പി മാത്യൂ, തോമസ് രാജന്‍, ജോയി വെട്ടിക്കുഴി, എം.എന്‍ ഗോപി, എ.പി ഉസ്മാന്‍, കേരളാ കോണ്‍ഗ്രസ് സംസ്ഥാന കമ്മിറ്റി അംഗങ്ങളായ നോബിള്‍ ജോസഫ്, ഷൈനി ജോസഫ്, ഡിസിസി ഭാരവാഹികളായ സേനാപതി വേണു, ജെയ്‌സണ്‍ കെ ആന്റണി, കെവി സെല്‍വം, വിജയകുമാര്‍ മറ്റക്കര, മനോജ് മുരളി, എബി തോമസ് , ഫിലിപ്പ് മലയാറ്റ്, വി എ ഉലഹന്നാന്‍, കെ.എ കുര്യന്‍, അനീഷ് ചേനക്കര, മിനി സാബു, ഡിക്ലര്‍ക് എന്നിവര്‍ പ്രസംഗിച്ചു.
